توقتارالى تاڭجارىق. جۇتىلىپ ەسكى ءبىر ولەڭگە...
قازاقتىڭ جانى - قارا ولەڭ. قارا ولەڭمەن قايعى بەرىپ، قايعى العان. قازاقتىڭ قۋانىشى مەن ءسۇيىنىشىن دە، قوپ-قوڭىر بولمىسىندا قارا ولەڭ قارا نارداي كوتەرىپ كەلدى. كەنەت قارا ولەڭنىڭ قاناتى قيىلدى. قاسكويلىكپەن. ورنىن كوللەكتيۆتىڭ جىرى، «دوستىق» جىرى باستى. وسىناۋ «باۋىرلاستىق» جىردىڭ جەر جارعان دابىسى قارا ولەڭدى - قازاقتىڭ جان داۋسىن قۇمىقتىرىپ، ءوزىن تۇنشىقتىرىپ كەتتى.
كوللەكتيۆتىڭ جىرى دا كەلمەسكە كەتتى. كەتتى دەپ ويلاعانبىز. سويتسەك، ول ولمەپتى. ولگەنى بىلاي تۇرىپتى، ول ماداققا اينالىپ، ماراپاتقا بولەنىپ ءجۇر.
ال، قازاقتىڭ قارا ولەڭى - قازاقتىڭ ىشىنە ءتۇسىپ كەتىپتى. وتكەنىن اڭسايدى، وزىنە بالتا الا جۇگىرگەندەردىڭ سالعان جاراسىنىڭ ءالى دە سىزداپ جاتقانىن، «مەن» - ءولىپ، «مەنىكى» - سالتانات قۇرعان اقى يەسى قازاقتىڭ ءوزىن قايتا ىزدەپ تاپپاققا تالپىنباعانىنا تارىعادى.
سوندا قازاقتىڭ جانى - قارا ولەڭ قازىر قايدا جەردە دەيسىز عوي. ۇلت تامىرىنان تابان اۋدارىپ الىس كەتپەگەن، قوڭىر بولمىستى قۇدايدان كەيىنگى قۇدىرەت دەپ بىلەتىن، ادال اقىننىڭ پوەزياسىندا. سول پوەزيانىڭ الپىس ەكى تامىرىندا بۇلكىلدەپ جاتىر. وزگە تۇردە. وزگە كەيىپتە. تەك بولمىسى مەن تابيعاتى، ىشكى تولقىنى مەن اۋەنى، سارىنى تەكتى قالپىندا.
ول پوەزيا - توقتارالى تاڭجارىقتىڭ ولەڭى.
«اباي-اقپارات»
ورمەكشى
ەكى ءداۋىردىڭ اراسىن بولگەن اقجال تولقىندى وزەن،
كەشىپ ءوتۋدىڭ مۇمكىن ەمەستىگىن جون ارقاڭمەن سەزەسىڭ.
قازاقتىڭ جانى - قارا ولەڭ. قارا ولەڭمەن قايعى بەرىپ، قايعى العان. قازاقتىڭ قۋانىشى مەن ءسۇيىنىشىن دە، قوپ-قوڭىر بولمىسىندا قارا ولەڭ قارا نارداي كوتەرىپ كەلدى. كەنەت قارا ولەڭنىڭ قاناتى قيىلدى. قاسكويلىكپەن. ورنىن كوللەكتيۆتىڭ جىرى، «دوستىق» جىرى باستى. وسىناۋ «باۋىرلاستىق» جىردىڭ جەر جارعان دابىسى قارا ولەڭدى - قازاقتىڭ جان داۋسىن قۇمىقتىرىپ، ءوزىن تۇنشىقتىرىپ كەتتى.
كوللەكتيۆتىڭ جىرى دا كەلمەسكە كەتتى. كەتتى دەپ ويلاعانبىز. سويتسەك، ول ولمەپتى. ولگەنى بىلاي تۇرىپتى، ول ماداققا اينالىپ، ماراپاتقا بولەنىپ ءجۇر.
ال، قازاقتىڭ قارا ولەڭى - قازاقتىڭ ىشىنە ءتۇسىپ كەتىپتى. وتكەنىن اڭسايدى، وزىنە بالتا الا جۇگىرگەندەردىڭ سالعان جاراسىنىڭ ءالى دە سىزداپ جاتقانىن، «مەن» - ءولىپ، «مەنىكى» - سالتانات قۇرعان اقى يەسى قازاقتىڭ ءوزىن قايتا ىزدەپ تاپپاققا تالپىنباعانىنا تارىعادى.
سوندا قازاقتىڭ جانى - قارا ولەڭ قازىر قايدا جەردە دەيسىز عوي. ۇلت تامىرىنان تابان اۋدارىپ الىس كەتپەگەن، قوڭىر بولمىستى قۇدايدان كەيىنگى قۇدىرەت دەپ بىلەتىن، ادال اقىننىڭ پوەزياسىندا. سول پوەزيانىڭ الپىس ەكى تامىرىندا بۇلكىلدەپ جاتىر. وزگە تۇردە. وزگە كەيىپتە. تەك بولمىسى مەن تابيعاتى، ىشكى تولقىنى مەن اۋەنى، سارىنى تەكتى قالپىندا.
ول پوەزيا - توقتارالى تاڭجارىقتىڭ ولەڭى.
«اباي-اقپارات»
ورمەكشى
ەكى ءداۋىردىڭ اراسىن بولگەن اقجال تولقىندى وزەن،
كەشىپ ءوتۋدىڭ مۇمكىن ەمەستىگىن جون ارقاڭمەن سەزەسىڭ.
جۇزىنە ۋاقىتتىڭ مۇڭلى تابى ۇيالاعان الدەبىر كەزەڭ -
بوزاڭ دا بوزعىلت تورعىنعا جاسىرعان ءوزىنىڭ ەلەسىن.
ەگىز قارا تاۋدىڭ
سىلەمىن باعزى ورمەكتەر قوسادى -
شىم-شىتىرىق جولداردىڭ وكسىگىمەن ورىلگەن.
بۋىرىل
و ءبىر دۇنيەدە بۇلكىلدەپ بۇلاقتار جوسادى،
جاسىل جامىلشىنمەن كومىلگەن.
كەشەگى كورگەنىڭنىڭ بارلىعى بۇگىن ءتۇس سەكىلدى ءىزىم-عايىپ.
قانداي راحات، راۋان شاپاعىن جۇتۋ قۇشىرلانا.
عۇمىر-داريا -
تاڭ مەن كەشتىڭ وتكەلەگىنە
تىرشىلىك تورىن جايىپ،
ءوز نەسىبىڭدى تاڭىردەن كۇتۋ عانا...
***
ءتۇن قوينىندا ءتۇپسىز قيال شىراعى،
ورمانىندا اداستىرعان وي مۇنار.
ەسسىز ءساتتىڭ ەستەلىگى جىلادى،
ۇسكىرىگى ءۇمىتىڭدى توڭدىرار.
سىركىرەيدى نوكەي مەزگىل نوسەرى،
ەشكىمگە دە ءتيىستى ەمەس وبالى.
جيىلماعان جاردىڭ سالقىن توسەگى،
قۇيىلماعان مۇڭنىڭ قىزىل شارابى.
قايىق مالتىر قالشىلىندا سەزىمنىڭ،
بايانى جوق باعزى سوقپاق.
مەڭىرەۋ.
تابىت جۇزەر تامشىسىندا كوزىڭنىڭ،
كىمگە كەرەك ەڭىرەۋ؟!
وكىنىشتىڭ ءورتى ەمەس مىنا ءتۇن -
قاسىرەتتىڭ قاراپايىم تۇنباسى.
ءوزىن-ءوزى ۇگىپ بىتكەن ءبىر اقىن،
ال، ءومىردى جىرلاشى!..
ارىلۋ
ۇلى تاۋدىڭ ۇشار باسىندا،
جاپ-جاسىل ارشالار استىندا،
كيەسى:
سۇيەگى قۋراعان عاسىرلاردان دا ۇستەم
پاتشانىڭ التىن تاجىندەي;
يەسى:
جان ۇزەر شاعىندا ءزامزام سۋىن ىشكەن
زاعيپ ۋازىردەي -
قۇلازىپ تۇر جالعىز قۇدىق.
اجەنىڭ ءجۇزىن تورلاعان يماني اجىمدەي
بۇلىڭعىر بۋ كوشكەن تۇبىنە
شايىرلىق سەزىممەن ۇڭىلە
قارادىم،
جايىپ ساپ جانىمنىڭ اق-جاسىل پاراعىن.
العاشقى ءھام سوڭعى سەزىمدەي
كوگىلجىم نۇرلارى كوگىندە... كۇلىپ...
جانارىم
جۇتىلىپ ەسكى ءبىر ولەڭگە...
شىمىرلاپ جاتىر ءتۇۋ تەرەڭدە -
تەرەڭدە... تىنىق.
...سان تاڭدى قۇدىقتا اتىرعان كوز ىلمەي،
باياعى ءجۇسىپتىڭ سوزىندەي،
رۋح
كوبەلەگى قالىقتاپ ايعا
كەتكەندەي كۇي كەشتىم سوندا...
اينالام تىپ-تىنىش. تىمىق.
...ۇلى تاۋدىڭ ۇشار باسىندا،
باعزى ءبىر پاتشانىڭ التىن تاجىندەي
قۇلازىپ تۇر ەسكى قۇدىق.
ۋاقىت داۋىلى ءمۇجىپ...
ءموپ-ءمولدىر سۋ كوردىم:
قۇرالايدىڭ كوزىندەي،
ياكي، ءسابيدىڭ قاراشىعىنداي تۇنىق.
ول - ەسسىز اڭسار مەن
ساعىنىش سازىنان جارالعان
تاپ-تازا ىڭكارلىك ەكەن عوي.
جۇتار ما ەم ءشولىم قانعانشا قۇيىپ؟!..
كوكجيەككە كوزىمدى تىگىپ
جاتسام كوكوراي شالعىندا سۇلىق،
كوگىلدىر تولقىندار كوكىرەگىمدى جۋىپ!
جورتسام ءبىر سوسىن جالعىز بورتە بوكەندەي،
قىرقالار قيىرلارىنا جۇلدىزدى جولاعىم ءسىڭىپ.
ءىزىمدى سيپالاپ ىمىرت...
.........................................................
مەن وسى قيالدار الەمىن مەكەندەپ
تۇرعاندا وي كەشىپ ۇلىق،
توبەمدە ءجۇردى تەك شۇيكەدەي اقشا بۇلت...
تەڭىز. اي. ەلەس
كوگىلدىر اي ساۋلەسى استىندا بۋىرقانىپ جاتقان تەڭىز...
تولقىندار ساپىرىلىسا شايقاعان ايدىڭ «ءولى» دەنەسىن.
بالكىم، سول اي - ءبىزدىڭ عۇمىرمەن ەگىز،
ءبارىمىز شارق ۇرا اڭسايمىز وتكەننىڭ ەلەسىن.
كوكىرەگىمىزدى قان-جوسا عىپ قادالعان
ءتىپتى دە ۇمىتا المايمىز ۋاقىتتىڭ ۋلى جەبەسىن.
اي مەن سول ەلەس.
جىلىمعا شوككەن كەمە.
سۋ بەتىنە شىقپايدى ەندى ولار قالقىپ.
سۇڭقىلداپ جالعىز ۇشقان اققۋدى كورسەڭ سەن، ەگەر،
قاناتىن كوگىلدىر ساۋلەلەرگە شارپىپ;
ول دا بىزدەي كۇڭىرەنىپ ەلەس دۇنيەسىن كەزەر،
الاسۇرعان سەزىمنىڭ قۇشاعىندا مالتىپ.
...بۇگىن تەڭىزدىڭ دەمى سالقىن.
ءۇن-ءتۇنسىز بارامىز قايتىپ...
جالعىزدىق كارتيناسى
ءتۇن وكسىپ ۇزاق جىلايدى...
پارىز بەن سۇندەت
ورىندالماعان.
(ول داعى ەسكى ءبىر ىندەت).
مەنىكى مەڭىرەۋ ۇنسىزدىك.
(جولى بولماعان).
قالانىڭ و ءبىر شەتىندە ايعاي-شۋ، دۇرمەك.
كوكجيەكتىڭ دە كورىنبەس كوركەم بوياۋى -
جەلگە ۇشقان جالعىز قاۋىرسىن،
توزعان ءبىر سۋرەت.
سانادا ابدەن سارعايعان ەستەلىكتەردىڭ
وشكەن وتتارىن ءۇن-ءتۇنسىز وتىرام ۇرلەپ.
ەسكى قيالدىڭ الەمىن ەلەس تورلاعان.
جولداردى جۇتقان جوندارداي قيمىلسىز، سۇلىق.
كوگەرشىن تۇستەس كوڭىل-كۇي قۇلپىرا الماعان:
تۇزگە قاراعان تەرەزە - اينەگى سىنىق.
اينالام تولى ەسىكتەر. ەسكى سارايلار.
كىلىتسىز قۇلپى.
(ەشقايدا جەتە المان ءجۇرىپ).
...بوزامىق ايدىڭ ساۋلەسىن كوزىمەن جۇتىپ،
يەسىز قالعان كۇشىكتەر جاتادى ۇلىپ...
كۇز ەلەگياسى
كۇز.
سولعىن جاپىراقتاردىڭ سارعىش بوياۋى
ەسكى عاشىقتىڭ ەسىل جۇزىندەي
ساعىنىش لەبىن ساپىرعان.
دالا ءبىر كەزگەن دارۋىشتەردىڭ
قۇم جۇتقان قۇبىلا ىزىندەي
ەستەلىكتەردى وتكەن كۇن ورنەگى جاسىرعان.
وتكەن كۇن جاسىرعان ەستەلىكتەردى وياتا الماي،
قاراشا جەلى بوزدايدى دەمىمەن «اپتاپ»،
(ايتپاق بولامىز ەكەۋمىز قوسىلا ىڭىلداپ الدەبىر ءاندى).
يەسىز يەن قيىرعا قىدىرعان جولداي،
جاپىراقتارمەن كومىلگەن
سۇرلەۋسىز سوقپاق
اداستىم سەنەن،
سول ءۇشىن كەشىرشى ماڭگى.
اداستىم تاعى وزىڭنەن،
ەسىل عاشىعىم،
كوڭىلسىز دۇنيە توسىندە كوز جاسىم اقتى،
كوكىرەگىمدە كيىك كۇن ورتەنىپ باتتى...
...جانىما ءسىڭىپ
جابىقتىم سارعىش بوياۋىڭ -
ەسىل عاشىقتىڭ ەسكىرگەن كۇڭگىرت جۇزىندەي،
سەن ءتىلسىز ءدىرىل قاعاسىڭ، سولعىن جاپىراق،
مەن ءۇنسىز مۇڭعا باتامىن ايسىز تۇنىڭدەي...
قۇلازىر جولدار بەيۋاققى -
كەشسەڭ وي اۋىر:
كۇبىر قاعادى كولەڭكە ىمىرت گۇلىندەي،
كوزىندە كۇزگى سۋرەتتەر - جىم-جىرت اتىراپ...
......................................................................
...قوم سۋدان ۇشقان قازداردىڭ سوڭعى كۇيىندەي
قايعىمدى كىممەن بولىسەم، قارا توپىراق؟..
ورتەلگەن مەشىت
بەيۋاقتا سوككەن كىم سەنىمىمنىڭ كوبەسىن؟
ءۇيى ورتەلدى اللانىڭ.
ء(تۇسىم ەمەس، ءوڭىم بۇل).
جانارىمدا بوتالاپ جازۋلاردىڭ ەلەسى،
كىرپىگىمنەن ۇشادى قۇسقا اينالىپ كوگىلدىر.
...تۇنشىقتىرىپ جانىمدى جانايقايىم ءوزىمنىڭ،
قۇمدا قالعان قۇلازىپ جولاۋشىداي سەزىندىم.
مەندىك تاعدىر جازىلعان «ءتاڭىرحاتتىڭ» پاراعى،
كوز الدىمدا تۇر انە، وتقا ورانىپ كۇپ-كۇرەڭ.
قانات قاعىپ قيسسالار قيالىمنىڭ ۇستىنەن،
ءالسىن ءالى قاعادى قىلقوبىزدىڭ شاناعىن.
جالقىن وتتىڭ ىشىندە كۇرسىنەدى كولەڭكەم،
شىم-شىتىرىق، قىم-قيعاش ەلەس تورلاپ جانارىن.
ورتكە سۇڭگىپ بارامىن...
...باتىپ بارا جاتتىم ءبىر قاپ-قاراڭعى تۇنەككە،
قالدى ارتىمدا شۇبالىپ ءيىر-قيىر جالعىز ءىز.
تاڭعى ازاننىڭ داۋىسى قالقىپ شىعىپ جۇرەكتەن،
ماڭدايىما قادالدى ورتەنگەن اي القىزىل...
ىرىم
«بارماشى، جاقىنداماشى وتقا،
قاراڭعى تۇكپىردە جاعىلعان.
بيلەيدى ول انا ءبىر جاقتا،
ءۇي تىگىپ ساعىمنان...
بارماشى، جاقىنداماشى سۋعا،
ىشپەشى دۇعاسىز.
باتىرار باعزى ءبىر مۇڭعا
قاراشىعىڭدى كۇناسىز.
بارماشى، جاقىنداماشى جارعا،
الاكەۋىمدە... كەشكى.
جاقپارعا ۇيا ساپ قارعا،
تۇنەيدى ەشكى...»
وت جاعىپ وتىرىپ پەشكە،
ايتقان بۇل اجەمنىڭ ءسوزى.
ەشتەڭە تۇيمەپپىن ەسكە،
جادىمدا جابىرقاۋ كوزى.
مەن قانشا وينادىم وتپەن،
ءوزىم تامىزىپ.
جىبەردىم جىلداردى وتكەن،
سۋعا اعىزىپ.
تۇنەدىم باسىندا جاردىڭ!..
جەڭىلدىم!
جەڭدى!
مىنەكي، تەك جالعىز قالدىم.
ءبارى كەش ەندى...
***
سەنىڭ قارا مەڭىڭدە -
دۇنيەنىڭ جىلۋى.
تامار ءشاربات سەزىمگە
تامشى-نۇرداي ءۇزىلىپ.
قارا تاسقا باسىلعان
دۇعاسىنداي ءپىرىمنىڭ!
تۋمىسى ءۇر اسىلدان،
پەرىشتەسى بۇگىننىڭ.
سول قارا مەڭ كەۋدەمە
تۇسىرگەندەي ءبىر جارىق.
وزىمنەن ءھام وزگەدەن
ءجۇر ەم ەسسىز قىزعانىپ.
قالدىم مەڭسىز، قايتەيىن،
ءبارى وتكىنشى مەن ءۇشىن.
قيالدانام جاي تەگىن،
وزگە قيىر ءورىسىم.
...سەنىڭ قارا مەڭىڭ بە؟ -
قابىرىمنەن ىركىلىپ،
ديدارىڭا كومىلگەن
توپىراقتاي ءبىر ءتۇيىر
ەكەندىگىن ۇمىتپا!
ەگىز مەندىك جۇرەكپەن.
بۇيىرمايدى ول ۇلىققا،
تۇسىرمەيدى ول تۇنەككە!..
***
...مىنە، تاعى ءىڭىر كەلدى،
قالا كەشى - دۋماندى.
ەپتەپ... سىرا سىمىرگەندى...
بال عوي ۋى بۇل ماڭنىڭ.
«بۇل نەعىلعان بىتپەيتىن توي،
سالار ما ەدىك مۇنشاما ءان؟!»
مي ىشىندە مىڭعىرعان وي،
مىڭعىرعان وي - جۋساعان...
اق بوكالدا سان مىڭ قيال
تۇرعان سىندى شىمىرلاپ.
جانىڭدا ءبىر تاعدىر جىلار...
بۇلدىر ساعىم بۋىندى اپ.
الدەكىمدى ساعىناسىز،
ەسكە سالىپ تۇنگى وتتار.
كافە. اۋەن. ماعىناسىز.
بىراق ءسال-ءپال ىرعاق بار.
قارىنداستىڭ قايعىسى دا
سول ىرعاققا جۇتىلعان.
...ارمان ەتىپ ايدى ءسىرا،
كەتكەن دەيدى... قۇتىرعان...
كەيدە وسىلاي كۇتەدى ەكەن،
ورالماعان سەرىگىن.
يا، ازداپ ىشەدى ەكەن...
سوسىن... ءبىراز جەلىگىپ...
مەن تۇسىنەم ونى ءۇنسىز،
ول تۇسىنەر مەنى دە.
بەرىلەمىز ءبىر ءسات ءتىلسىز،
ەلەستەردىڭ ەلىنە.
كوشە مۇڭىن اعىزادى،
قاراشانىڭ جاڭبىرى.
جاناردان جاس تامىزادى،
قارىنداستىڭ تاعدىرى.
مىنا حالىق نە بىلەدى؟!
بيلەيدى ولار... شۋ قىلىپ...
وتكەن ءومىر كەرۋەنى
وكسىگىڭدە شىڭعىرىپ
تۇرعاندايىن كۇي كەشەسىڭ.
(ەسسىز وي مەن تىلسىزدىك).
بيلەسە ەكەن بيلەسە شىن،
جان قالاۋىن مۇڭسىز عىپ...
قارامايمىز ىزدەرگە ءبىز،
سانامايمىز ءتۇن شامىن.
كوزبەن ءسۇرتىپ ۇيرەنگەنبىز،
كوكىرەكتىڭ بۇرشاعىن!
سول بۇرشاقتى كەشە ءجۇرىپ،
بيلەيدى جۇرت باسىلماي.
سۋعا بوككەن كوشە تىمىق،
قارىنداستىڭ جاسىنداي...
بۇگىن سولاي - كەشە قالاي،
قالا ءتۇنى - كوڭىلدى.
كوڭىلدىرەك ەتە الماي،
ءبىز كەلەمىز ءومىردى...
«...بۇل نەعىلعان بىتپەيتىن توي؟
بىتپەيتىن توي؟! شارشادىم!»:
كولكىپ ۇشقان كوگىلدىر وي،
كوز جاسىنداي ارشانىڭ.
***
جەتىم شام. جەسىر كوبەلەك.
ءمانىسى قانداي جارىقتىڭ؟
ءبىر-ءبىرىن ءجىپسىز ورەلەپ...
كولكىگەن ەلەس - تابىت - نۇر.
بولمەنىڭ ءىشى كۇڭگىرت تىم،
كۇڭگىرت تىم كوڭىل-كۇيىم دە.
قارايدى ماعان مۇلگىپ كىم،
شىڭىراۋ ويدىڭ تۇبىندە؟
قوڭىراۋ ءۇنىن ەستىدىم،
ەستىدىم، الدە ازان با؟
وزگەشە ەدى كەشقۇرىم،
وزگەشە ەدى ساز وندا.
بۇتارلاپ بۇلتتى اي تۋعان،
قايتادان ءجۇزىن جاسىردى.
وقيدى، قارعام، قاي تۋعان،
قاناتىڭداعى حاتىڭدى؟
جەتىم شام نەگە بولەمەك؟
داۋاسى بولسا ايت ەمىن.
قاڭعىعان بەيباق كوبەلەك،
قاناتىڭ كۇيسە، قايتەمىن؟!
گۇل-ءى
ءتۇن.
بالاۋىز شامنىڭ ءالسىز جارىعى
جالاۋىن جەل جىققان كەمەدەي
قيالىمىزدى يەنگە سۇيرەگەن.
ۇمىتا المايتىندىعىمىز بەن
ۇمىتۋعا بولمايتىندىعىن دا ەلەمەي،
سانامىزدى ماعىناسىز اۋەندەر بيلەگەن...
ايتسە دە ءبىر بۋدا قىزىل گۇل
ۇسىنار ەدىم مەن ساعان،
بىراق، سەن تاڭىرقامايسىڭ
دالا گۇلىنىڭ يىسىنە.
ءيا، ءبىزدىڭ سەزىم
ءوزىمىز ويلاعاننان دا «ساراڭ»،
ءتىپتى ونى قۋات تا قالماعان تۇيسىنەر.
ءبىزدىڭ بۇل اۋىر دا ازاپتى ءحالىمىزدى ۇعار كىم؟
سەن نەنى اڭسايسىڭ، جانىم،
كوزىڭدى ءۇن-ءتۇنسىز اينەككە قاداپ.
بالكىم، ءبىز ءبىر كۇنى ۇمىتا المايتىندىعىمىز بەن
ۇمىتۋعا بولمايتىندىعى ءۇشىن ەگىلىپ جىلارمىز...
بىراق، ول كەزدە تىم كەش بولار!
جاسىمىز كوكىرەگىمىزدە ءبۇر جارعان
قاۋاشاق گۇلدىڭ جاپىراعىنا
اپپاق قىراۋ بوپ قونار...
سوسىن، ول دا سولار!
گۇل-ءىى
...سولادى سىيلاۋعا جارالعان گۇلدەر.
ءدال وسى گۇلدەردەي
قاراشىعىمىزدا قۋارىپ، سولار كۇز.
ارينە، تىم قيىن وتكەندى ۇمىتۋ مۇلدەم...
بىزدە
اعىستار شايقاعان
مۇزتاۋداي مۇجىلگەن بولارمىز...
...قيالدى توعىتىپ تۇنگە،
ەلەسىن ىزدەيمىز سولاردىڭ.
ال قازىر ءىڭىر عوي قارس تۇيگەن قاباعىن،
ىنتىق پەن وكسىكتىڭ قاۋىشقان ءساتى
نەمەسە قۋراعان گۇلدەردىڭ ساباعى،
بوياۋى قالماعان جاسىل...
اپپاق سۇڭگىدەن تامعان ءمولدىر تامشىداي
سەنىڭ جاسىڭ...
كوكىرەگىمە شىم-شىمداپ سىڭگەن.
سەن ەندى قايتەسىڭ بۇل تۇنگە جىلاپ.
...قايتادان قاۋاشاق جايادى گۇلدەر...
بىراق،...
بىراق،...
بىراق،...
جىلقىلار
ولار شۇرقىراپ سۇپ-سۇرى تۇماننان شىعاتىن،
قايتادان كىرەتىن سۇپ-سۇرى تۇمانعا.
دۇبىردەن دۇنيەنىڭ جۇرەگى دۇرسىلدەپ تۇراتىن،
جاڭعىرىپ بەيۋاق كىل اڭعار...
قولىمىزعا قۇرىق اپ قۇلا دۇزدەن ىزدەيمىز،
ىزدەيمىز ولاردى -
كوشپەندى جىلقىسىن.
قۇلا ما، قوڭىر ما، قىلاڭ با... بىلمەيمىز،
ءبىز ءۇشىن بەيمالىم ءتۇر-ءتۇسى.
ءبىزدى دە سولارداي بارادى جەمىرىپ،
ۋاقىت پەن قارا جول -
يرەلەڭدەگەن قوس جىلان!
جالى مەن قۇيرىعى سۋسىلداپ، توگىلىپ،
بۇل كۇندە ولار تەك تۇسىمدە وسقىرار.
...ىڭىردە جاتقان ءبىر جاندايىن ەسىنەپ،
تاريحىم ۇمىتقان ولاردىڭ تۇياعىن.
مەن ونى مىنەمىن دا-لا-لار توسىندە،
ءيا، بۇل كادىمگى اقىننىڭ قيالى.
...ەندى ءۇنسىز وتىرمىن
ساعىنىش سارعالداقتارىن بۇرلەتىپ سانادا،
جۋسانى بۇرقىراپ
كوكتەم عوي بۇل مەزگىل قۇلپىرار.
قۇلازۋ كەيپىندەگى
مەندىك بۇل قاسىرەتتى بىلمەيدى تاعى ولار،
كىسىنەگىم كەلەدى بەيۋاق...
شۇرقىراپ...
...قايدا سول ءۇيىرلى جىلقىلار؟!
"اباي-اقپارات"
