بيىل ەلىمىز جىل سايىن ۇلكەن ۇمىتپەن كۇتەتىن ەل پرەزيدەنتىنىڭ جولداۋى ءاربىر قازاقستان ازاماتىنىڭ ەرەكشە نازارىن اۋداردى. ويتكەنى، بۇكىل الەمدى الاڭداتىپ وتىرعان پاندەميا قازاق ەلى ءۇشىن دە وڭايعا سوقپاعانى انىق.
پرەزيدەنت قاسىم-جومارت كەمەلۇلى توقاەۆ جولداۋىندا بۇكىل الەمدى الاڭداتىپ وتىرعان پاندەميامەن كۇرەس جولدارىن، ونىڭ ەلىمىزگە الىپ كەلگەن زاردابى مەن وزگەرىستەرىن ايتا كەلىپ، ەلىمىزدىڭ الەۋمەتتىك دامۋىنا، ەل تۇرعىندارىنىڭ تابىسى مەن جۇمىس ورىندارىنىڭ ساقتالۋىن، حالقىمىزدىڭ دەنساۋلىعى مەن ءومىرىن ساقتاۋ جولىنداعى جۇمىستارعا باستى نازار اۋدارىپ، ناقتى تاپسىرمالار بەردى.

سونىڭ ىشىندە، الدىمەن پرەزيدەنت ەلدەگى مەملەكەتتىك باعدارلامالار مەن شەنەۋنىكتەر سانىنا توقتالدى. ول ەلدىڭ كولەمدى ەمەس، حالىق تۇسىنەتىن ىقشام مەملەكەتتىك باعدارلامالارعا كوشۋ كەرەگىن ەسكەرتتى. شەنەۋنىكتەر سانىن 25 پايىزعا قىسقارتۋدى تاپسىرىپ: «مەملەكەتتىك قىزمەتتىڭ جۇيەسىن قايتا قاراۋ كەرەك. پاندەميا مەن مەملەكەتتىك ورگانداعى كوپتەگەن قىزمەتكەردى قاشىقتان جۇمىس ىستەۋ رەجيمىنە اۋىستىرۋ مەماپپاراتتى قىسقارتۋ كەرەك ەكەنىن كورسەتتى. مەملەكەتتىك اپپارات پەن كۆازيمەملەكەتتىك سەكتورىن قىسقارتۋ مەرزىمىن جىلدامداتۋدى تاپسىرامىن. بيىل ولاردىڭ سانىن 10 پايىزعا قىسقارتۋ قاجەت. كەلەسى جىلى تاعى 15 پايىزعا قىسقارتۋ كەرەك. وسىلايشا، شەنەۋنىكتەردى 25 پايىزعا قىسقارتۋ تاپسىرماسىن 2021 جىلى شەشىپ بولامىز. ناتيجە مەن تسيفرلاندىرۋعا بايلانىستى تاعى دا قىسقارتۋ ماسەلەسىن قارايمىز»، - دەدى. ال ۇنەمدەلگەن قاراجات ارقىلى قالعان قىزمەتكەرلەردىڭ جالاقىسى ارتتىرىلاتىنىن ايتتى.

سونىمەن قاتار، ستراتەگيالىق جوسپارلاۋ جانە رەفورمالاۋ اگەنتتىگى قۇرىلادى دەدى. مەملەكەت باسشىسىنىڭ سوزىنشە، مۇنداي ورگان قازاقستاندا بۇرىن دا بولعان جانە ءوز مىندەتىن تولىققاندى اتقارىپ وتىرعان. ەندى اتالعان اگەنتتىك قايتادان مەملەكەتتىك جوسپارلاۋ جۇيەسىنىڭ ورتالىعىنا اينالماق. اگەنتتىك تىكەلەي پرەزيدەنتكە باعىنادى. سونداي-اق، قاسىم-جومارت توقاەۆ مينيسترلىكتەردەگى جاۋاپتى حاتشىلار ينستيتۋتىن تاراتۋدى تاپسىردى. مەملەكەت باسشىسى بۇل قۇرىلىم ءوزىن اقتامادى دەپ سانايدى.
سونىمەن بىرگە، قازاقستاندا توتەنشە جاعدايلار مينيسترلىگىن قايتا قۇرۋ قاجەت دەپ مالىمدەدى. پرەزيدەنتتىڭ ايتۋىنشا، ىشكى ىستەر مينيسترلىگى قۇرىلىمىن وزگەرتۋ ۆەدومستۆونىڭ تيىمدىلىگىن ارتتىرادى. تاعى ءبىر ماڭىزدى ماسەلە، كەلەسى جىلى اۋىل اكىمدەرىنىڭ تىكەلەي سايلاۋى وتكىزىلۋى مۇمكىن ەكەنىن مالىمدەدى.

«قوعامدىق پىكىر ساۋالنامالارى حالىقتىڭ اۋىل اكىمدەرىن سايلاۋعا تىكەلەي قىزىعۋشىلىعىنىڭ ارتقانىن كورسەتتى. بۇل ماڭىزدى قادامدى جان-جاقتى جانە دايەكتى تۇردە قاراستىرعان ءجون. ءبىز بۇل جۇيەنىڭ قالاي جۇمىس ىستەۋ كەرەكتىگىن ناقتى ءبىلۋىمىز كەرەك. الايدا، بۇل ماسەلەنىڭ شەشىمىن كەيىنگە قالدىرۋعا بولمايدى. كەلەسى جىلى وكرۋگ اكىمدەرىنىڭ وكىلەتتىك مەرزىمى اياقتالادى. اۋىل اكىمدەرىنىڭ تىكەلەي سايلاۋىن وتكىزۋگە بولادى دەپ ويلايمىن»، – دەدى قاسىم-جومارت توقاەۆ.

قاراپ وتىرساق، شىندىعىندا، ءبىز، «حالىق ۇنىنە قۇلاق اساتىن مەملەكەت» قۇرۋدى قولعا الدىق. بۇگىنگى ەل پرەزيدەنتىنىڭ جولداۋى ەلىمىزدىڭ بولاشاق دامۋى مەن ەرتەڭگى كۇنگە بەتبۇرىسىن ايقىنداپ بەردى. قازاق حالقىنىڭ ءاربىر ازاماتىنىڭ كوكەيىندە جۇرگەن ماسەلەنى شەشۋ جولىنا ارنالعان جاڭا جولداۋ، ەل دامۋى مەن حالقىمىزدىڭ ومىرىندە ءبىرشاما جاڭاشىلدىقتىڭ بولاتىنىن كورسەتىپ بەرگەندەي.

رۋستام ساعاديەۆ، ساياساتتانۋشى.

Abai.kz