حالىقارالىق جەڭءىل اتلەتيكا فەدەراتسياسى 2022 جىلى جءۇرۋ سپورت تءۇءرى بويىنشا ءالەم چەمپيوناتىن مينسك قالاسىندا ءوتكىزبەۋ جءونىندەگى شەشىم قابىلدادى.

ۇيىم مالىمدەمەسىندە قازىر جارىستى وتكىزۋ جونىندە باسقا ەلدەرمەن سويلەسىپ جاتقانى، ونىڭ قورىتىندىسى جونىندە كەيىنىرەك مالىمەت بەرىلەتىنى جازىلعان.

"جارىستى باسقا قالادا وتكىزۋ شەشىمى قاۋىپ-قاتەردى انىقتايتىن كوميتەت بايانداماسىنان كەيىن قابىلداندى. باياندامادا بەلارۋسپەن ديپلوماتيالىق قارىم-قاتىناستاردىڭ انىق بولماي جاتقانى جانە بۇل ولكەگە بارۋداعى شەكتەۋلەر قاۋىپ-قاتەردى كۇشەيتەدى",- دەپ جازىلعان مالىمدەمەدە.

وتكەن اپتادا مينسكتە ترياتلون بويىنشا جارىسقا قاتىسىپ جاتقان ءۇش ۆەلوسيپەدشى ۇستالىپ، سوت شەشىمى بويىنشا ەكەۋى 15 تاۋلىككە، بىرەۋى 14 تاۋلىككە قاماۋعا الىنعان. بۇعان ولاردىڭ جارىس كەزىندە "نارازىلىق رەتىندە ۇراندار ايتىپ ايقايلاعانى" سەبەپ بولعانى حابارلانعان.

وسىعان دەيىن مينسك حوككەي بويىنشا 2021 جىلى الەم چەمپيوناتىن وتكىزۋ قۇقىعىنان ايىرىلعان. ناۋرىزدا حالىقارالىق وليمپيادا كوميتەتى الەكساندر لۋكاشەنكونىڭ ۇلى ۆيكتور لۋكاشەنكونى بەلارۋستىڭ ۇلتتىق وليمپيادا كوميتەتىنىڭ جاڭا باسشىسى رەتىندە تانۋدان باس تارتقان.

مامىر ايىندا بياتلونشىلاردىڭ حالىقارالىق بىرلەستىگى 2022 جىلى ناۋرىزدا وتەتىن بياتلون بويىنشا الەم كۋبوگىن بەلارۋستان فينلياندياعا اۋىستىرۋ جونىندە شەشىم قابىلداعانىن جاريالاعان.

بۇدان بولەك بەلارۋس كلاسسيكالىق پاۋەرليفتينگ بويىنشا الەم چەمپيوناتىن وتكىزۋ قۇقىعىنان ايىرىلىپ، جارىستى شۆەتسيادا وتكىزۋ شەشىمى قابىلدانعان.

Abai.kz