26-ساۋىردەن باستاپ قازاقستاندىق QazVac ۆاكتسيناسىن ەگۋ باستالدى. حالىققا رەسەيلىك، قازاقستاندىق جانە قىتايلىق ۆاكتسينانى تاڭداۋ مۇمكىندىگى بەرىلۋدە. وتاندىق ۆاكتسينانى العان جاندار جەلىدە پىكىرلەرىن ءبىلدىرىپ جاتىر.  بۇل تۋرالى  ءىnform.kzكە سىلتەمە جاساپ Abai.kz حابارلايدى. 

العاش بولىپ ۆاكتسينانى دەنساۋلىق ساقتاۋ ءمينيسترى الەكسەي تسوي العان ەدى. ول ۆاكتسيناعا قاتىستى: "ۆاكتسينانىڭ العاشقى پارتياسى بيولوگيالىق قاۋىپسىزدىك ماسەلەلەر جونىندەگى ينستيتۋتتا 50 مىڭ دوزامەن ءوندىرىلدى. ينستيتۋتىمىز ۆاكتسينانى دەربەس وندىرۋگە مۇمكىندىگى بار. قازاقستاندا وندىرىلگەن دوزالار بارلىق وڭىرلەرگە جىبەرىلدى. مۇنان ارى ءوندىرىستى ۇلعايتا ءتۇسۋ ءۇشىن ءتۇرلى الاڭداردى قاراستىرىپ جاتىرمىز. بۇل - تۇرىك سەرىكتەستەرىمىزدىڭ الاڭى. سونىمەن گۆاردەيسكيدە ءوزىمىزدىڭ زاۋىتتى سالۋ ۇستىندەمىز. قازىر ول مۇنان ارى ىسكە قوسۋ ءۇشىن قۇرال-جابدىقتارىن ورناتۋدىڭ بارلىق كەزەڭىنەن ءوتىپ جاتىر»، - دەدى.

قوعام بەلسەندىسى مۇحتار تايجان دا ۆاكتسينانى الىپ، جەلىدە بىلاي دەپ جازدى. "مەن ءوزىمىزدىڭ قازاقستاندىق عالىمداردى قولدايمىن جانە سەنەمىن! QazVac-تى سالعىزدىم. استانادا ءابۋ-دابي عيماراتىندا سالىپ جاتىر، 2-ءشى قاباتىندا. كەزەك جوق، 10 مين ىشىندە سالىپ جىبەردى. تاعى 30 مين وتىراسىڭ، كەتەسىڭ", دەدى.

قىزىلوردا وبلىستىق ىشكى ساياسات باسقارماسىنىڭ باسشىسى ميرا قازبەكوۆا وتاندىق ۆاكتسينانىڭ تاڭداعانىن الەۋمەتتىك جەلىدە جازدى. "وتباسىمدى ويلاعاندىقتان "QazVac" ۆاكتسيناسىن سالدىردىم. قازىر جاعدايىم جاقسى، ەشبىر اۋىرسىنۋ بەلگىلەرى بولعان جوق. دارىگەرلەر ءۇش كۇنگە دەيىن دەنساۋلىعىمدى باقىلاۋدى ۇستايتىندىعىن ەسكەرتتى. ەندى 21 كۇننەن كەيىن ۆاكتسينانىڭ ەكىنشى دوزاسىن سالدىرامىن. ءبىزدىڭ جۇمىسىمىز حالىقپەن تىعىز بايلانىستى. قىزمەت بابىنا بايلانىستى ءتۇرلى جەرلەرگە بارىپ، ادامدارمەن جولىعۋعا تۋرا كەلەدى. سوندىقتان ىندەت جۇقتىرماۋ ءۇشىن وسىنداي قادامعا باردىم. ۇيدەگى ۇلكەندەرىمىز دە ەكپە سالدىردى. ءبىز كاسىبي ماماندارعا سەنەمىز. ەكپەدەن قورقۋدىڭ قاجەتى جوق دەپ سانايمىن. ءوز دەنساۋلىعىمىز ءۇشىن شەشىم قابىلداۋىمىز قاجەت", - دەدى م. قازبەكوۆا.

جامبىل وبلىسى اكىمىنىڭ ورىنباسارى داۋلەت كارىبەك تە وتاندىق عالىمداردىڭ ءونىمىن ەكتىرگەنىن ءمالىم ەتتى. "بۇگىن وتاندىق QazCovid-in (QazVac) ۆاكتسيناسىن سالدىردىم. ءبىزدىڭ ەلىمىز كوروناۆيرۋسقا قارسى ءوز ۆاكتسيناسىن شىعارعان الەمنىڭ 5 ەلىنىڭ ءبىرى بولدى. جامبىل وبلىسى قورداي اۋدانىندا جاسالعان ۆاكتسينا قازىرگى تاڭدا ەلىمىزدىڭ بارلىق وڭىرلەرىنە جەتكىزىلدى. ءبىز بۇل اۋرۋدى تەك جاپپاي ۆاكتسيناتسيا جۇرگىزۋ ارقىلى قانا جەڭەمىز! بۇگىنگىنىڭ باتىرى دارىگەرلەرىمىزگە شىن جۇرەكتەن تاعى دا العىس ايتقىم كەلەدى! ەل امان، جۇرت تىنىش بولسىن!", - دەپ جازدى اكىم ورىنباسارى.

Abai.kz