2020 جىلدىڭ 16 تامىزىندا ايسۇلتان نازارباەۆ لوندونداعى  ساياباقتاردىڭ بىرىندە ەسسىز جاتقان كۇيندە تابىلىپ، كەيىننەن ونىڭ قايتىس بولعانى بەلگىلى بولدى.

ايسۇلتاننىڭ ولىمىنە قاتىستى ەل اراسىندا ءتۇرلى الىپ-قاشپا اڭگىمە تاراپ، ءبىرى رەسمي دەرەككە سەنسە، ەندى ءبىرى وعان كۇمان كەلتىردى. الايدا 24 ناۋرىزدا ۇلىبريتانيانىڭ قۇپيا ءولىمدى زەرتتەيتىن رەسمي وكىلى ايسۇلتاننىڭ ەسىرتكىدەن ولگەنى تۋرالى زەرتتەۋ ناتيجەسىن جاريا ەتتى.

ايسۇلتان نازارباەۆ جىلدار بويى ەسىرتكىگە تاۋەلدىلىكپەن كۇرەسكەنى بەلگىلى. ول ءومىرىنىڭ سوڭعى جىلدارىندا Facebook الەۋمەتتىك پاراقشاسىندا ءتۇرلى اقپاراتتار جاريالاپ، قازاقستانداعى جەمقورلىق فاكتىلەرى تۋرالى «ناقتىلانباعان» دەرەكتەردى جازىپ، ەل اراسىندا ۇلكەن داۋ دا تۋىنداتقان بولاتىن. بىرنەشە سايتقا تىكەلەي ەفير ارقىلى سۇحبات بەرىپ، ءتىپتى ءوزىنىڭ اكەسىنىڭ ولىمىنە قاتىستى دا ويىن ءبىلدىردى.

ساراپتامانى جۇرگىزۋشى اعا كورونەر فيونا ۋيلكوكس بولعان. ول تەك ساراپتاما جۇرگىزىپ قويماي، كۋاگەرلەر، پوليتسيا قىزمەتكەرلەرى جانە پسيحياتردان پىكىر دە العان.

«ساراپتاما ناتيجەسى ايسۇلتاننىڭ ەسىرتكىگە تاۋەلدىلىكتەن ولگەنىن كورسەتەدى. مەن ونى ءوز اجالىمەن ءولدى دەپ سانايمىن. ول كوكاينعا تاۋەلدىلىكتەن قايتىس بولدى»، - دەپتى ۋيلكوكس.

ايسۇلتان نازارباەۆ - قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ جيەنى. 1990 جىلى 26 تامىزدا نۇرسۇلتان نازارباەۆتىڭ ۇلكەن قىزى داريعا نازارباەۆا مەن راحات اليەۆتىڭ وتباسىندا دۇنيەگە كەلگەن.

ول استاناداعى «حالىقارالىق ۇزدىكسىز ءبىلىم بەرۋ كوللەدجىندە»، سونداي-اق اۆستريانىڭ «American International School» مەكتەپ-ينتەرناتىندا وقىعان. ۇلىبريتانيانىڭ «Royal Military Academy Sandhurst» وقۋ ورنىن بىتىرگەن. كيمەپ ۋنيۆەرسيتەتىنىڭ ماگيستراتۋراسىن «بيزنەس-اكىمشىلەندىرۋ» ماماندىعى بويىنشا تامامداعان.

2012 جىلى ول قازاقستان قورعانىس مينيسترلىگىنىڭ باس بارلاۋ باسقارماسىندا جۇمىس ىستەي باستادى، وندا ءبىر جىل قىزمەت ەتتى.

فۋتبولمەن اينالىسقان. 2016 جىلى استانالىق «راحات» كلۋبىنىڭ ساپىندا ەكى ماتچ وتكىزگەن، سونداي-اق قازاقستان جاسوسپىرىمدەر قۇراماسى قۇرامىندا ەۋروپا-2006 چەمپيوناتىنىڭ ىرىكتەۋ تۋرنيرىنە قاتىسقان. ستۋدەنت شاعىندا انگليانىڭ «چەلسي» جانە «پورتسمۋت» جاستار كوماندالارىندا ويناعان.

2017 جىلى قازاقستان فۋتبول فەدەراتسياسىنىڭ فيفا، ۋەفا حالىقارالىق ۇيىمدارى جانە ۇلتتىق قاۋىمداستىقتارمەن بايلانىس بويىنشا ۆيتسە-پرەزيدەنت قىزمەتىن اتقاردى.

Abai.kz