جۇما, 23 ءساۋىر 2021
بيلىك 3193 3 پىكىر 4 ناۋرىز, 2021 ساعات 14:04

ءماجىلىس جانىنان پارتياارالىق كەڭەس قۇرىلادى

بۇگىن قر ماجىلىسىندە ەلىمىزدە تىركەلگەن پارتيا وكىلدەرىنىڭ كەزدەسۋى ءوتتى. جيىن بارىسىندا ءماجىلىس توراعاسى نۇرلان نىعماتۋللين ءماجىلىس جانىنان پارتياارالىق كەڭەس قۇرۋ تۋرالى ۇسىنىس ايتتى.

پارتيا وكىلدەرىنىڭ ماجىلىستە وتكەن جيىنىنا «اق جول»، «Adal»،  جسدپ، «اۋىل» جانە قازاقستان حالىق پارتياسىنىڭ وكىلدەرى قاتىستى.

وتىرىستا ءسوز العان ءماجىلىس توراعاسى نۇرلان نىعماتۋللين، بارلىق پارتيانىڭ العا قويعان ماقساتى ەلباسى مەن مەملەكەت باسشىسىنىڭ باستامالارىن قولداۋ ەكەنىن باسا ايتتى.

-ارقايسىمىزدىڭ العا قويعان مىندەتتەرىمىز، جۇمىس ىستەۋ تاسىلدەرىمىز، جوسپارلارىمىز ءارتۇرلى بولعانىمەن، تۇپكى ماقساتىمىز ءبىر. ول – ەلباسى نۇرسۇلتان ءابىشۇلى نازارباەۆ پەن قازاقستان پرەزيدەنتى قاسىم-جومارت كەمەلۇلى توقاەۆتىڭ حالقىمىزدىڭ ءومىر ءسۇرۋ ساپاسىن جاقسارتۋعا ىقپال ەتىپ، ۇلەس قوسۋ جونىندەگى باستامالارىن قولداۋ، ەلىمىزدى دامىتۋ,- دەدى ءماجىلىس توراعاسى.

پالاتا سپيكەرىنىڭ ايتۋىنشا، بۇل تۇرعىدا ءماجىلىس ۇنەمى تاۋەلسىز ساراپشىلارمەن، جۋرناليستەرمەن، قوعامدىق ۇيىم وكىلدەرىمەن جاريا جانە قولجەتىمدى تۇردە جۇمىس ىستەپ كەلە جاتىر.

-ءبىز پارلامەنتتىك جانە پارلامەنتتىك ەمەس پارتيالاردىڭ ديالوگىن كەڭەيتۋ ءۇشىن جاڭا مۇمكىندىكتەر اشۋعا تالپىنامىز. ول ءۇشىن ءماجىلىس جانىنان پارتياارالىق كەڭەس جۇمىسىن ۇيىمداستىرۋدى ۇسىنامىن. بۇل جاڭا پىكىرتالاس الاڭىندا تالقىلاناتىن ۇسىنىستار مەن ۇسىنىمدار زاڭ شىعارۋ جۇيەسىن ودان ءارى ءتيىمدى ەتۋگە مۇمكىندىك بەرەدى دەگەن ءۇمىتىمىز بار. جالپى العاندا، ءبىز ۇسىنىپ وتىرعان پارتياارالىق كەڭەس اياسىنداعى ىنتىماقتاستىق وزەكتى ماسەلەلەردى شەشۋدىڭ ءتيىمدى قۇرالى بولادى دەپ سەنەمىن,-دەدى نىعماتۋللين.

ءماجىلىس توراعاسىنىڭ ايتۋىنشا، اتالعان پارتياارالىق كەڭەس كونسۋلتاتيۆتىك – كەڭەسشى ورگان قىزمەتىن اتقارۋى كەرەك. سونداي-اق، نۇرلان زايروللاۇلى دەپۋتاتتىق كورپۋستىڭ پارتيا وكىلدەرىنىڭ قانداي دا ءبىر زاڭ جوبالارى نەگىزىندە جۇمىس توپتارىنىڭ قۇرامىنا كىرۋگە مۇددەلى بولاتىنىن بىلدىرەدى. ياعني، پارتيا مۇشەلەرىنىڭ ۇسىنىسى تەك قانا ءسوز جۇزىندە قالماۋىن قاداعالاۋ قاجەت.

-ءسىزدىڭ ۇسىنىستارىڭىز، يدەيالارىڭىز ءىس جۇزىندە جۇزەگە اسۋى ءتيىس. ءبىز بىرلەسىپ جۇمىس ىستەۋگە دايىنبىز.مۇنداي كەلىسىم مەن ىنتىماقتاستىق پارلامەنتتىك پارتيالار ءۇشىن دە پايدالى بولادى دەپ سەنەمىن،- دەدى نۇرلان نىعماتۋللين كەزدەسۋگە قاتىسىپ وتىرعان ازاماتتارعا.

ال، كەزدەسۋگە كەلگەن پارتيا وكىلدەرى اتالعان ۇسىنىستىڭ ءماجىلىس جۇمىسىنداعى جاڭا بەتبۇرىس ەكەنىنە توقتالدى. وتىرىس بارىسىندا ءسوز العان  جالپىۇلتتىق سوتسيال-دەموكراتيالىق پارتيانىڭ توراعاسى ا. راحىمجانوۆ، «Adal» پارتياسىنىڭ حاتشىسى ە. جۇماعازيەۆ جانە  «اۋىل» پاتريوتتىق پارتياسى توراعاسىنىڭ ءبىرىنشى ورىنباسارى ت. راحىمبەكوۆ ءماجىلىس توراعاسى ۇسىنعان باستامانى بىردەن قولدايتىندارىن ايتتى.

سونداي-اق، ءماجىلىس توراعاسى نۇرلان نىعماتۋللين مەملەكەت باسشىسى قاسىم-جومارت توقاەۆتىڭ ۇلتتىق قوعامدىق سەنىم كەڭەسىنىڭ V وتىرىسىندا بەرگەن تاپسىرمالارىنا، ونىڭ ىشىندە جاڭا زاڭ جوبالارىن ازىرلەۋ تۋرالى ماسەلەگە نازار اۋداردى.

ءماجىلىس جيىنىن قورىتىندىلاعان پالاتا سپيكەرى پارياارالىق كەڭەستىڭ تۇراقتى جۇمىس الاڭىنا اينالۋى كەرەكتىگىن ايتتى.

-ءبىر پارتياارالىق كەڭەستى تۇراقتى جۇمىس ىستەيتىن جۇمىس الاڭىنا اينالدىرۋعا ءتيىسپىز. ول جەردە پارلامەنتتەگى زاڭنامالىق پروتسەستىۋھڭ بارلىق ساتىلارىندا پايدالانىلاتىن ۇسىنىستار ازىرلەنەدى. بۇل كەيىن زاڭ شىعارۋ تارماقتارىندا قولدانىلاتىن بولادى، -دەدى ءماجىلىس توراعاسى نۇرلان نىعماتۋللين.

Abai.kz

3 پىكىر