دۇيسەنبى, 19 ءساۋىر 2021
46 - ءسوز 7038 6 پىكىر 1 ناۋرىز, 2021 ساعات 12:03

ءبىزدىڭ راحمەتىمىزگە كىم مۇقتاج؟

بۇگىن العىس ايتۋ كۇنى. وسىعان وراي، قۇدىرەتى شەكسىز جاراتۋشىدان باستاپ، جۇمىر باستى تانىس-ءبىلىستىڭ  بارىنە العىس ايتۋشىلار كوبەيەدى. «سۋدى  سىڭەر جەرىنە قۇي»-دەگەندەي، العىستى دا العىسقا مۇقتاج ادامىنا ايتۋ ازبال. العىس - ريزا كوڭىلمەن ايتىلاتىن راحمەت. ول سوزبەن، ىسپەن، سىيلىقپەن دە كورىنىس تابادى.

كىمگە راحمەت ايتا الامىز؟ بارىنە ايتا الامىز! جاراتقانعا، كۇنگە، سۋعا، اۋاعا، جەرگە، گۇلگە دە. اتا-انا، تۋىس-تۋعان، دوس-جاران، كورشى-كولەم، ۇستاز-ارىپتەس، اۋىلداس تاعى باسقا ىزگى نيەتتى، كومەك كورسەتۋگە بەيىم ادامداردىڭ ءبارى دە العىس ايتامىز. ولاردىڭ ءبارى دە العىسقا لايىقتى. بىراق، از-كەم ويلانىپ كورسەك، ءبىزدىڭ العىسىمىزعا  شىنايى مۇقتاج ادامدار بار. ولار كىمدەر؟ ول ءۇشىن الدىمەن ءبىز ومىردە ءجيى ايتاتىن راحمەت ءسوزى قايدان شىققانىنا نازار سالايىقشى. ءسوز توركىنىنە زەر سالساق، ول ءسوز وزىنە كومەك كورسەتكەن پەندەسىن «قۇداي جارىلقاسىن، راحمەتىنە بولەسىن» دەگەن كومەك الۋشىنىڭ ىقىلاسىنان شىققان ءسوز ەكەنى بەلگىلى. ولاي بولسا، قۇدايعا قالاي راحمەت ايتامىز؟ قۇداي سەنى كىم راحمەتىنە بولەسىن دەيمىز؟ ايتا المايمىز. تەك، شۇكىرشىلىك بىلدىرەمىز. ءبىزدىڭ جاراتۋشىعا راحمەتىمىز سول - يماندى عۇمىر كەشۋ. قۇداي جاراتقان تابيعاتتىڭ قايسى نىعمەتىنە قالاي راحمەت ايتامىز؟ سوزبەن ايتا المايمىز، تەك شىنايى ءىس-ارەكەتىمىز ارقىلى ايالاساق، قورعاساق - سول راحمەتىمىز بولماق. اللانىڭ شەكسىز مەيىرىمىنىڭ ءبىر ءتۇيىرىن جۇرەگىنە جاسىرعان اتا-انا ۇرپاعىنا نە بەرسە دە، ونىڭ قايتارىلىمىن كۇتپەيدى، تەك قايىرىن عانا كۇتەدى. سەنىڭ امان-ساۋ، ادال ءومىر سۇرگەنىڭ ولار ءۇشىن شەكسىز العىس ايتقانىڭمەن بىردەي. ولاردىڭ ولشەۋسىز ەڭبەگىن تىرشىلىگىڭدە وتەي المايسىڭ، بىراق وتەۋگە تىرىسساڭ ادامدىعىڭ دا، ادالدىعىڭ دا سول بولماق. ولار سەنىڭ العىسىڭا مۇقتاج ەمەس، مەيىرىمىڭە مۇقتاج، سونى ۇمىتپا. ال وزگە ادامدارعا «سىيعا - سىي، سىراعا – بال»، دەگەندەي ءوز كەزەگىندە، ءوز ورنىندا قارامتاسىن قايتارىپ راحمەتىمىزدى ايتىپ ءجۇرمىز، ايتا بەرەمىز.

وندا، كىم ءبىزدىڭ راحمەتىمىزگە مۇقتاج؟ ول مىنا 3 ادام: ومىرلىك جارىڭ، ۇستازىڭ، جانە ءوزىڭ. ومىرلىك جارىڭ - جارق ەتكەن جاسىن عۇمىرىن ساعان سەنىپ تاپسىرىپ، سەنىمەن تاعدىر قوسىپ، قۋانىشتا دا، قايعىدا دا سەنىمەن بىرگە بولعانى ءۇشىن; ۇستازىڭ - قاراڭعى كوڭىلىڭە جارىق ساۋلە توگىپ، ءبىلىم مەن ونەر ۇيرەتىپ، ومىردە ريزىعىڭدى تابۋعا جول كورسەتكەنى ءۇشىن; ال ءوزىڭ-ىستەگەن ءار قايىرلى جۇمىسىڭنان باقىت تاۋىپ، ءوزىڭدى ءسۇيىپ، باعالاپ، جىبەرگەن كەمشىلىڭنەن ساباق الىپ، ءوزىڭدى كەشىرە ءبىلىپ، العا ۇمتىلعان نيەتىڭ ءۇشىن. مىنە، وسى ءۇش كىسىگە العىسىڭدى ءبىلدىر. ولار دا، سەنەن العىس كۇتپەۋى مۇمكىن، بىراق سەنىڭ العىسىڭا شىنايى مۇقتاج ادامدار انە، سولار. ومىرلىك جارىڭا راحمەت ايتۋ - ونىڭ ەڭبەگىن، تالعامىن، تاعدىرىن باعالاعاندىق. ول - جانۇياعا جاراسىمدىلىق اكەلىپ، قازىرگى كەزىڭدى نۇرعا بولەيدى. ۇستازعا راحمەت ايتۋ - ونىڭ ءبىلىمىن، نيەتىن، كورەگەندىگىن باعالاعاندىق. ول - وتكەن ومىرىڭە ريزاشىلىق ءبىلدىرۋ بولىپ تابىلادى. وزىڭە راحمەت ايتۋ - سەنىمىڭدى، قايراتىڭدى، اقىلىڭدى شىڭداعاندىق. ول- بولاشاعىڭا باستار تابىس جولى. وسى ءۇش ادام العىسقا بولەنىپ ءومىر كەشسە جەكە باسىڭ دا، وتباسىڭ دا، مەملەكەتىڭ دە گۇلدەنىپ كوركەيەتىن بولادى.

قاستەر سارقىتقان

Abai.kz

6 پىكىر