31 قاڭتار كۇنى اقتوبە وبلىسى باشەنكول كەنىشىندەگى "امك مۇناي" جۇمىسشىلارى ەرەۋىلدى توقتاتىپ، تاراپتار كەلىسىمگە كەلگەن. بۇل تۋرالى اقتوبە وبلىسى اكىمدىگى حابارلادى.

اكىمدىكتىڭ مالىمەتىنشە، ەرەۋىل باستالعان 29 قاڭتار كۇنى "امك مۇناي" كومپانياسىنىڭ باسشىلارى مۇنايشىلار جالاقىسىن 7 پايىزعا كوبەيتۋدى ۇسىنعان. ەرەۋىلشىلەر وعان كەلىسپەگەن. ەرەۋىلدىڭ ەكىنشى كۇنى، ياعني 30 قاڭتاردا مۇنايشىلار ماسەلەسى وبلىس اكىمدىگىندە وتكەن ارنايى شتاب وتىرىسىندا تالقىلانعان.

– اكىمدىكتەگى جيىننان كەيىن "امك مۇناي" كومپانياسى ءار جۇمىسشىنىڭ جالاقىسىنا اقپان ايىنان باستاپ 40 000 تەڭگەدەن قوسۋعا كەلىستى. كومپانيا ناۋرىز مەرەكەسى كەزىندە جۇمىسشىلارىنا 50 پايىز سىياقى بەرەتىن بولدى. مامىر ايىنان باستاپ "امك مۇناي" كومپانياسىنىڭ قىزمەتكەرلەرىمەن جاڭا ەڭبەك كەلىسىمشارتى جاسالادى. جاڭا كەلىسىمشارت جاساعان كەزدە وبلىستىڭ مۇناي سالاسىنداعى ورتاشا جالاقىنى ەسكەرىلەدى، – دەلىنگەن اكىمدىك حابارلاماسىندا.

اكىمدىك حابارلاماسىندا وبلىستىڭ مۇناي سالاسىنداعى ورتاشا جالاقى كولەمىن كورسەتىلمەگەن. كەي مالىمەتتەرگە قاراعاندا، جۇمىسشىلارى ەرەۋىل وتكىزىپ جاتقان تەمىر اۋدانىنداعى مۇناي مەكەمەلەرىندە ورتاشا جالاقى 240-260 مىڭ تەڭگە ارالىعىندا.

باشەنكولدەگى كەنىش وڭتۇستىك كورەيانىڭ مەملەكەتتىك ۇلتتىق (Korea National Oil Corporation, KNOC) كورپوراتسياسىنا قاراستى ADA Oil قازاق-كارىس بىرلەسكەن كاسىپورنىنا تيەسىلى. ADA Oil باشەنكولدەگى مۇناي ءوندىرىسىن مەردىگەر كومپانيا"امك مۇنايعا" تاپسىرعان.

باشەنكول كەنىشىندە مۇنايشىلار ەرەۋىلىنىڭ توقتاعانىن ازاتتىققا "امك مۇناي" كومپانياسىنىڭ جۇمىسشىلارى دا راستادى. اتى-ءجونىن اتاماۋدى وتىنگەن مۇنايشىنىڭ سوزىنە قاراعاندا، "امك مۇناي" مەن ADA Oil اراسىنداعى التى جىلعا جاسالعان كونتراكت سوماسى ەلدەگى ينفلياتسيانى ەسكەرەتىندەي ەتىپ جاسالعان. كەلىسىمگە ساي، بىلتىر قازاقستانداعى ينفلياتسيا دەڭگەيى 7,5 پايىز بولسا، "امك مۇناي" قىزمەتكەرلەرىنىڭ جالاقىسى دا 7,5 پايىزعا وسكەن. مۇنايشىلار مۇنىڭ جەتكىلىكسىز ەكەنىن ايتادى.

باشەنكولدەگى كەنىش يەسى ADA Oil مەن مەردىگەر "امك مۇناي" كومپانياسى اراسىندا 2024 جىلعا دەيىن جاسالعان كونتراكت مامىر ايىنا دەيىن بۇزىلىپ، قايتا جاسالۋى كەرەك. "سول كەزدە جالاقىمىز تاعى دا وسەدى. قازىر كەنىش باسىندامىز. جۇمىسقا 31 قاڭتار كۇنى 16:00 شاماسىندا كىرىستىك" دەيدى مۇنايشى.

اكىمدىك كوكجيدە كەنىشىندەگى "كمك مۇناي" كومپانياسىنىڭ 25 قاڭتاردان بەرى ەرەۋىلدەتىپ تۇرعان جۇمىسشىلارىمەن ءالى دە كەلىسسوز جۇرگىزىلىپ جاتقانىن حابارلادى.

Abai.kz