قازاقستان پرەزيدەنتى قاسىم-جومارت توقاەۆ دەنساۋلىق ساقتاۋ ءمينيسترى الەكسەي تسويدى قابىلدادى. مەملەكەت باسشىسىنا كوروناۆيرۋس ىندەتىنە قارسى كۇرەس بويىنشا قازاقستاندا قابىلدانىپ جاتقان شارالار جونىندە ەسەپ بەرىلدى.

پرەزيدەنتكە پاندەميانىڭ جەر شارىنداعى نەگىزگى تارالۋ تەندەنتسيالارى جانە ۆيرۋسقا قارسى كۇرەستەگى ەلىمىزدىڭ رەيتينگىسى تۋرالى دا باياندالدى. دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنە سايكەس، 1 ميلليون ادامعا شاققانداعى ىندەتكە شالدىققانداردىڭ سانى بويىنشا قازاقستان 221 مەملەكەتتىڭ ىشىندە 109-ورىندا، وتكىزىلگەن تەست سىنامالارىنىڭ سانى بويىنشا 67-ورىندا، ءولىم-ءجىتىم بويىنشا 94-ورىندا، COVID-19 ىندەتىنەن جازىلىپ شىققانداردىڭ سانى بويىنشا 48-ورىندا، دەرتتىڭ اۋىر ءتيۋى تۇرعىسىنان 50-ورىندا.

سونىمەن قاتار مەملەكەت باسشىسىنا وڭىرلەردەگى ەپيدەميالىق جاعداي تۋرالى، سونىڭ ىشىندە، كارانتين شارالارىنىڭ كۇشەيتىلۋى جانە ۇلتتىق  دەنساۋلىق ساقتاۋ جۇيەسىنىڭ قولدا بار رەسۋرستارى جايىندا مالىمەت بەرىلدى. دەنساۋلىق ساقتاۋ ءمينيسترى جۇقپالى اۋرۋلار ستاتسيونارلارىنداعى دەرتكە شالدىققان ادامدار جاتاتىن ورىنداردىڭ 33 پايىزعا تولعانىن، جان ساقتاۋ بولىمدەرىندە بۇل كورسەتكىش 21 پايىزعا جەتكەنىن ايتتى.

الەكسەي تسوي COVID-19 ۆيرۋسىن جۇقتىرعاندار سانىنىڭ كوبەيۋىنە قاراماستان، ەلىمىزدەگى احۋالدىڭ باقىلاۋدا تۇرعانىن جانە مەديتسينالىق قىزمەتتىڭ ازاماتتارعا قاجەتتى كومەك كورسەتۋگە دايىن ەكەنىن اتاپ ءوتتى.

مينيستر ەلىمىزدە ادامداردىڭ كوروناۆيرۋستان قايتىس بولۋ دەڭگەيى بىلتىرعى شىلدە ايىمەن سالىستىرعاندا 4 ەسە تومەندەگەنىن جەتكىزدى. بۇل دەرتكە شالدىققاندارعا كومەك كورسەتۋ ءۇشىن قابىلدانعان شارالاردىڭ، سونىڭ ىشىندە العاشقى مەديتسينالىق-سانيتارلىق جاردەم بەرۋ دەڭگەيىنىڭ تيىمدىلىگىن كورسەتەدى. بەيىندى ۆەدومستۆونىڭ مالىمەتى بويىنشا، بارلىق وڭىردەگى سالىنعان جۇقپالى اۋرۋلار اۋرۋحانالارى حالىقارالىق ستاندارتقا ساي كەلەدى جانە ناۋقاستارعا قاجەتتى كومەك كورسەتۋدە.

قاسىم-جومارت توقاەۆ الەكسەي تسويعا ەپيدەميالىق احۋالدى قاتاڭ باقىلاۋدا ۇستاۋدى، حالىقتى ۋاقىتىلى ءارى تولىق قۇلاقتاندىرۋ جۇمىستارىن ساپالى ۇيىمداستىرا وتىرىپ، جاپپاي ۆاكتسينا ەگۋگە دايىندىقتى ءتيىستى دارەجەدە قامتاماسىز ەتۋدى تاپسىردى.

Abai.kz