كورشى ەلدىڭ جەرىمىزگە كوز الارتۋى رەسەيمەن ەكى اراداعى شەكارانى بەكەمدەۋگە ەل ۇكىمەتىن شۇعىل كىرىستىردى. 7 قاڭتاردا قر اسكەري عىلىمدار اكادەمياسىنىڭ پرەزيدەنتى مۇحتار سەرىكباەۆ Facebook پاراقشاسىندا ورىس تىلىندە قوستاناي وبلىسى بويىنشا جالاقاسى 200 مىڭ تەڭگە كولەمىندە ءۇي جايمەن تولىق قامتاماسىز ەتەتىن اسكەري قىزمەتكەرلەردى جۇمىسقا قابىلداۋدىڭ باستالعانىن مالىمدەدى.

پاراقشاداعى سوزگە سەنەر بولساق، مەملەكەتتىك شەكارانىڭ جەكە قۇرامالارىن قايىرا جاساقتاۋ قازاقستان رەسپۋبليكاسى پرەزيدەنتىنىڭ جارلىعىمەن جۇزەگە اسىپ جاتىر ەكەن. 

قىزمەتكە اسكەر قاتارىندا بولعان جانە اسكەري تەحنيكالىق مەكتەپتى بىتىرگەن 32 جاسقا دەيىنگى ازاماتتار قابىلدانادى. جانە شەكارا اسكەرىندە قىزمەت ەتكەندەردىڭ  47 جاستا زەينەتكەرلىككە شىعاتىندىعى دا ءسوز ەتىلەدى. قايدا قىزمەت ەتەتىنى جانە جاسالاتىن جەڭىلدىكتەر ەگجەي-تەگجەي ءسوز بولادى.

بىراق تولىق مالىمەت تەك ورىس تىلىندە عانا بەرىلىگەنى كوڭىلدى قىنجىلتتى. سوندا قازاق تىلدىلەر ەلىن قورعاي الماي ما؟! الدە تاعىدا تەك ورىس ءتىلدى وتانداستارىمىمىزدى عانا جۇمىسپەن قامتۋ ءۇشىن جاسالىپ جاتقان ايارلىق پا دەگەن قوس ساۋال كوڭىلدى كۇپتى ەتەدى.

ونىڭ ۇستىنە قر اسكەري عىلىمدار اكادەمياسىنىڭ Facebook الەۋمەتتىك جەلىسىندەگى رەسمي پاراقشاسى تەك ورىس تىلىندە عانا اقپارات تاراتاتىن سەكىلدى. اتالعان پاراقشادان مەملەكەتتىك تىلدە جازىلعان بىردە-ءبىر اقپارات تابا المادىق. 

سونىمەن قاتار، اكادەميا پرەزيدەنتى مۇحتار سەرىكباەۆتىڭ پاراقشاسىنان دا مەملەكەتتىك تىلدەگى اقپارات كەزىكتىرگەن جوقپىز. ءبىز ءسوز ەتىپ وتىرعان اسكەري قىزمەتكەر قابىلداۋ جايلى حابارلامانىنىڭ دا قازاقشاسى جوق. 

سونىمەن اسكەرلەر اراسىندا تەك وزگە ەلدىڭ مەملەكەتتىك تىلىندە عانا سويلەيتىندەردىڭ اسىعى الشىسىنان تۇسەتىن كۇننەن قاشان قۇتىلامىز؟ دەگەن وكسىكتى ساۋال كوكىرەكتى تىرمالايدى. ءۇمىت تەك جاڭا سايلانىپ جاتقان دەپۋتاتتىق كورپۋستا. وسى جولى ولار سايلانا سالا بىردەن «ەل قورعانى بولار» اسكەرلەردى ورىس ءتىلدى ءبىر تىلدىلىكتەن ءبىرجولا ارىلتاتىن، مەملەكەتتىك ءتىلدى بىلمەيتىندەردى قىزمەتتەن بوساتاتىن زاڭ قابىلداتار دەگەن ويدامىز. 

ءابىل-سەرىك الياكبار

Abai.kz