رەسەي سوتى قازاقستاندىق ەكس-بانكير مۇحتار ءابليازوۆ پەن «بتا بانكتىڭ» بۇرىنعى قىزمەتكەرلەرىنە قاتىستى سىرتتاي ۇكىم شىعاردى. ولار بۇعان دەيىن 58 ميلليارد رۋبلدەن اسا اقشا جىمقىردى دەپ ايىپتالعان.

ولارعا 173 ميلليارد رۋبلدەن اسا سوماعا ازاماتتىق تالاپ قاناعاتتاندىرىلدى.

«ماسكەۋ قالاسىنىڭ تاگان اۋداندىق سوتى "بتا بانك" اق بۇرىنعى ديرەكتورلار كەڭەسىنىڭ توراعاسى مۇحتار ءابليازوۆ، سول بانكتىڭ باسقارما توراعاسى رومان سولودچەنكو، سونداي-اق ولاردىڭ قاراماعاندا جۇمىس ىستەگەن ارتۋر تروفيموۆ، يگور كونونكو، تاتيانا پاراسكەۆيچ، اناتولي ەرەششەنكو جانە الەكساندر ۋدوۆەنكوعا قاتىستى قىلمىستىق ءىس بويىنشا سىرتتاي ۇكىم شىعاردى.

ولارعا رف قك 159-بابى 4-بولىگى (الاياقتىق), 174-بابى 3-بولىگى (قىلمىس جاساۋ ارقىلى يەلەنگەن مۇلىكتى زاڭداستىرۋ), سونداي-اق 165-بابى 3-بولىگىنىڭ «ا»، «ب» تارماعىندا (ۇيىمداسقان توپ ارقىلى اسا ءىرى كولەمدە شىعىن كەلتىرۋ) قاراستىرىلعان قىلمىستاردى جاسادى دەگەن ايىپ تاعىلدى»، - دەلىنگەن حابارلامادا.

سوت 2006-2009 جىلدارى بانكتىڭ اتالعان قىزمەتكەرلەرى "بتا بانك" اق-دان 58 ميلليارد رۋبلدەن اسا جىمقىردى دەپ انىقتادى. مۇنداي ماقساتپەن اقشالاي زاەم ارقىلى الىنعان جەر ۋچاسكەلەرىن كەپىلگە قويىپ نەسيە بەرگەن. ءارى قاراي ءابليازوۆ اتالعان تۇلعالارمەن بىرلەسىپ، يپوتەكا شارتىنىڭ قىزمەتىن زاڭسىز توقتاتۋدى ۇيىمداستىرعان. ناتيجەسىندە بانك كەپىل بويىنشا وتەپ الۋ مۇمكىندىگىنەن ايىرىلىپ قالدى، ال ولار مۇلىكتى ءوز قالاۋىنشا راسىمدەگەن، ونىڭ ىشىندە ءۇشىنشى تۇلعالاردىڭ اتىنا راسىمدەپ، يەمدەنگەن.

«مەملەكەتتىك ايىپتاۋشىنىڭ پوزيتسياسىن ەسكەرە وتىرىپ، سوت ءابليازوۆتى 15 جىلعا، كونونكونى 10 جىلعا، پاراسكەۆيچتى 12 جىلعا باس بوستاندىعىنان ايىردى. ەرەششەنكو جانە ۋدوۆەنكو 13 جىلعا سوتتالدى. زارداپ شەگۋشىنىڭ ("بتا بانكتىڭ") 173 ميلليارد رۋبلدەن اسا سوماعا مۇلىك زالالىنىڭ ورنىن تولتىرۋ تۋرالى ازاماتتىق تالابى تولىق قاناعاتتاندىرىلدى»,- دەلىنگەن پروكۋراتۋرانىڭ حابارلاماسىندا.

ۇكىم ازىرگە زاڭدى كۇشىنە ەنگەن جوق.

Abai.kz