كرەملدىڭ توتىقۇسى ە.فەدوروۆ كەشە تاعى دا قازاقستاننىڭ اۋماقتىق تۇتاستىعىن ءھام ەلىمىزدىڭ ەگەمەندىگىن جوققا شىعاراتىنىن مالىمدەپتى.

كوكمىلجىڭ ەسەرنەمەنىڭ ايتقان ءۋاجى تاريحي شىندىق بىلاي تۇرسىن ەشبىر قيسىنعا ساي كەلمەيدى. تۇيسىك بىتەۋ، ءوزىنىڭ قاي داۋىردە ءومىر ءسۇرىپ جاتقانىن مۇلدە سەزىنبەيدى. اڭگىمەسىنەن باياعى رەسەيدىڭ اۋزىن ارانداي اشقان يمپەرياليستىك پيعىلىنان باسقا ەشتەڭە اڭعارىلمايدى. قالا بەردى، كەڭەس ۇكىمەتىنىڭ 1991 جىلى ودان ارىقاراي تىنىس الۋعا شاماسى جەتپەي جانى ءۇزىلىپ، جانازاسى شىققانىن مويىنداعىسى كەلەر ەمەس.

ەڭ كۇلكىلىسى - قازىرگى قازاقتار 1941 جىلى ماسكەۋدى قورعاپ قالعان اتا-بابالارىنىڭ جولىنان تايقىپ كەتىپتى-ءمىس. اقىرى ە.فەدوروۆ مىرزا بۇگىنگى كۇنگە ەسكى كۇننىڭ ولشەمىمەن قارايدى ەكەن، وندا ءبىز دە ورىز كنيازدىكتەرىنىڭ التىن ورداعا بودان بولعانىن ەسىنە سالايىق. ءتىپتى، بۇگىنگى رەسەيدىڭ نەگىزىن سالعان ماسكەۋ كنيازدارى التىن وردا بيلەۋشىسىنىڭ اياعىن ءسۇيۋ ءراسىمىن اتقارعاندىعى تالاسسىز شىندىق. وسىنى نەگىزگە الساق، وندا قازىرگى كەۋدەمسوق رەسەي دە بۇرىنعى اتا-بابالارىنىڭ مۇددەسىنە وپاسىزدىق تانىتىپ وتىر دەگەن ءسوز.

شەكاراعا قاتىستى تەكەتىرەس باستالعالى بەرى اقوردا مەن كرەمل ديپلوماتيا شەڭبەرىندە عانا ارەكەت ەتۋدە. ءپۋتيننىڭ جارشىسى پەسكوۆ رەسەيدىڭ سىرتقى ساياساتىن فەدەراتسيا باسشىسى عانا ايقىندايتىنىن قاداپ ايتتى. ياعني، نيكونوۆ، فەدەوروۆ، ليمونوۆ، جيرينوۆسكيدىكى ەسەك دامە عانا. قانشا جەردەن وڭەشىن جىرتىپ اڭىراسا دا قازاقستان ءۇشىن تۇك ءمانى جوق مالىمدەمەلەر بولىپ قالا بەرەدى.

مۇحان يساحاننىڭ جازباسى

Abai.kz