دۇيسەنبى, 23 قاراشا 2020
COVID-19 قازاقستاندا. جۇقتىرعاندار — 126182. جازىلعاندار — 112806. قايتىس بولعاندار — 1945
بيلىك 793 0 پىكىر 29 قازان, 2020 ساعات 17:08

قاراجانباس كەن ورنىندا سۋ تۇشىتۋ زاۋىتى ىسكە قوسىلماق

ماڭعىستاۋ وبلىسىندا ورنالاسقان قاراجانباس كەن ورنىنداعى سۋ تۇششىتۋ زاۋىتىن 2021 جىلدىڭ 1 توقسانىندا ىسكە قوسۋ جوسپارلانىپ وتىر، - دەپ حابارلايدى Abai.kz.

ايتا كەتەيىك، 2019 جىلى باستالعان زاۋىتتى ىسكە قوسۋ مەرزىمى قۇرىلىس ءۇشىن قاجەتتى قوندىرعىلاردى جەتكىزۋگە كەدەرگى كەلتىرگەن كوروناۆيرۋس پاندەمياسى اسەرىنەن شەگەرىلگەن ەدى.

زاۋىت سۋدى تۇششىتۋ كەزىندە كوپ ساتىلى تازالاۋ جانە كەرى وسموس نەگىزىندە مينەرالسىزداندىرۋ تەحنولوگيالارىن قولداناتىن بولادى. ال تۇششىتىلعان سۋدىڭ كولەمى تاۋلىگىنە 17 مىڭ م3 دەيىن جەتەدى دەپ جوسپارلانۋدا.

اۋىز سۋ جەتىسپەۋشىلىگىن ازايتۋ ماقساتىندا بوي كوتەرىپ جاتقان زاۋىت قۇرىلىسىنىڭ 35 پايىزى جۇزەگە اسقان. زاۋىت ىسكە قوسىلسا، قاراجانباس كەن ورنى مەن ماڭعىستاۋ وبلىسى تۇرعىندارىنىڭ تۇششى سۋعا دەگەن قاجەتتىلىگىن وتەۋگە ايتارلىقتاي سەپتىگىن تيگىزبەك. سونداي-اق، قۇرىلىس اياقتالعاننان كەيىن زاۋىت 50 شاقتى ادامدى جۇمىسپەن قامتاماسىز ەتە الادى.

زاۋىت تەك قانا اۋىز سۋ تاپشىلىعىن ازايتۋ ءۇشىن ەمەس، «قاراجانباسمۇناي» اق-نىڭ بىرقاتار تەحنولوگيالىق ماسەلەسىن شەشۋگە دە اسەر ەتەدى. 2021-2035 جىلدار ارالىعىندا «قاراجانباس» كومپانيسيا مۇناي ءوندىرىسىن 700 مىڭ تونناعا ارتتىرۋ، ۇڭعىمالاردىڭ كۇردەلى جانە جەراستى جوندەۋلەرىن ازايتۋ، گريفونداردىڭ پايدا بولۋىن شەكتەۋ جوسپارلانىپ وتىر.

بۇدان وزگە، كومپانيانىڭ قورشاعان ورتانى قورعاۋ سالاسىنداعى قىزمەتىندە دە تىڭ جوسپارلار قولعا الىنىپ جاتىر. ماسەلەن، مۇنايمەن تاريحي لاستانعان 350 گەكتار جەردى تازارتۋ بويىنشا ىستەلگەن جۇمىس وڭ ناتيجەسىن كورسەتىپ وتىر. كومپانيا بۇگىندە لاستانعان ايماقتىڭ 143 گەكتارىن تازالاپ ۇلگەرگەن. سونداي-اق، «قاراجانباسمۇناي» اق كاسپي تەڭىزىنىڭ جاعالاۋى ايماعىندا 1970 جىلدىڭ اياعىندا بۇرعىلانعان 11 ۇڭعىمانى جاۋىپ، ۋاقىتشا ساقتاۋ پوليگونىنداعى 180 مىڭ توننا قالدىقتى كادەگە جاراتىپ وتىر.

- ميكروبيولوگيالىق رەمەدياتسيا كارتاسى بويىنشا مۇناي قالدىقتارىن وڭدەۋ پروتسەسى ءجۇرىپ جاتىر. وڭدەلگەن توپىراق تازا توپىراقپەن ارالاستىرىپ ىشكى جول جانە الاڭ قۇرىلىستارىنا پايدالانىلادى. بۇل شارالار وڭدەۋ پروتسەسىن باستى نازاردا ۇستاۋ ءۇشىن كەن ورىن اۋماعىندا جاسالادى، - دەدى «قاراجانباسمۇناي» اق قورشاعان ورتانى قورعاۋ ءبولىمىنىڭ باسشىسى ەركەبۇلان وسپانوۆ.

«قاراجانباسمۇناي» ەكولوگيالىق قىزمەتىن اسىرۋ ءۇشىن ۇستىمىزدەگى جىلى 479 ميلليون تەڭگەدەن استام قارجى جۇمساۋدى جوسپارلاپ وتىر. قارا التىندى يگەرۋ نارىعىندا 2002 جىلدان بەرى تاباندى قىزمەت ەتىپ كەلە جاتقان كومپانيا ەكولوگيالىق ماسەلەلەرگە دە بەي-جاي قارامايدى. كومپانياداعى باس ەكولوگتىڭ ايتۋىنشا، پلاستيك قالدىقتاردى ۇتىمدى پايدالانۋ جونىندە تىڭ جوبالاردى جۇزەگە اسىرماق.

- بۇگىندە پلاستيك قالدىقتاردى قايتا وڭدەۋدىڭ وزەكتىلىگى ارتۋدا. ءبىز پلاستيكتى قايتا وڭدەپ، كادەگە جاراتۋ ءۇشىن ماردىمدى جوبالاردى قولعا الىپ جاتىرمىز. قازىرگى ۋاقىتتا مەردىگەر كومپانيا پلاستيك بوتەلكەلەردەن كارىز قۇبىرى مەن تروتۋار پليتالارىن جاساپ شىعاراتىن جوبا ۇسىنىپ وتىر. ءبىز دە بۇل يدەيانى قۇپتادىق، كەلىسىمشارت جۇرگىزىپ جاتىرمىز، - دەيدى «قاراجانباسمۇناي» اق قورشاعان ورتانى قورعاۋ ءبولىمىنىڭ باسشىسى ەركەبۇلان وسپانوۆ.

ەستەرىڭىزگە سالا كەتەيىك، 2019 جىلى قمگ جانە قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگى قورشاعان ورتانى قورعاۋ سالاسىنداعى ىنتىماقتاستىق تۋرالى مەموراندۋمعا قول قويعان بولاتىن. قۇجاتقا سايكەس قمگ ەنشىلەس كومپانيالارى – قبم، «ماڭعىستاۋمۇنايگاز» اق جانە «وزەنمۇنايگاز» اق – كەلىسىمشارت اۋماقتارى شەگىندە مۇنايمەن لاستانعان جەرلەردى تازالاۋ، سونداي-اق جابدىقتالماعان شلام جيناعىشتارىندا ورنالاستىرىلعان قالدىقتاردى كادەگە جاراتۋ جانە قايتا وڭدەۋ جونىندەگى مىندەتتەردى قابىلدادى.

ماحاببات نۇرجانقىزى 

Abai.kz

0 پىكىر