قاراساي اۋداندىق سوتىندا الماتىداعى بلوكبەكەتتە بولعان جول اپاتىنا كىنالى پوليتسەيگە قاتىستى ۇكىم شىقتى.

"ازات ازاماتوۆ كىنالى دەپ تانىلىپ، 10 جىلعا باس بوستاندىعىنان ايىرۋ جازاسى تاعايىندالسىن", - دەپ ۇكىم شىعاردى سۋديا ءمادي كوشىكباەۆ.

سونداي-اق، سوت ازات ازاماتوۆقا الماتى پوليتسيا دەپارتامەنتىنە كەلتىرىلگەن ماتەريالدىق شىعىن (بۇلىنگەن پوليتسيا اۆتوكولىگى) ءۇشىن 5,4 ميلليون تەڭگە تولەۋدى مىندەتتەدى.

ال جابىرلەنۋشى دينارا اماننىڭ پايداسىنا ازات ازاماتوۆ بالاسى 18 جاسقا تولعانعا دەيىن بىر ميلليون تەڭگە مورالدىق شىعىن جانە 36 ميلليون تەڭگە تولەۋى كەرەك بولادى.

قازا تاپقان پوليتسەيدىڭ اكەسىنىڭ پايداسىنا ازاماتوۆ بىر ميلليون تەڭگە مورالدىق شىعىن جانە 2,8 ميلليون تەڭگە ماتەريالدىق شىعىن تولەۋى كەرەك.

قازا تاپقان ەكىنشى پوليتسەيدىڭ ايەلىنىڭ پايداسىنا سوتتالعان ادامنان ونىڭ ءۇش بالاسى 18 جاسقا تولعانعا دەيىن 15 ميلليون تەڭگە وندىرىپ الىناتىنى ايتىلادى.

ايتا كەتەيىك، وسى جىلدىڭ 25 مامىرىندا جانتۇرشىگەرلىك جول اپاتى بولىپ، ەكى پوليتسەي قازا تاپقان ەدى. سول ساتتە كولىك ىشىندە بولعان 42 جاستاعى پوليتسەي جاراس جانعازيەۆ وقيعا ورنىندا ال، ونىڭ ارىپتەسى داستان ابدىقانوۆ اۋرۋحانا توسەگىندە كوز جۇمدى.

سوت وتىرىسىنىڭ العاشقى كۇنىندە ازات ازاماتوۆ كىناسىن تولىق مويىنداعان بولاتىن. ول جول اپاتى بولاردان بۇرىن سىرا ىشكەنىن، سوندىقتان وقيعا بولعان كەز مۇلدە ەسىندە جوعىن ايتتى. جۇرگىزۋشىنىڭ ايتۋىنشا، ول اۋرۋحاناعا كەلگەندە بىراق ەسىن جيعان.

Abai.kz