كەشە استانادا ازەربايجاننىڭ قازاقستانداعى ەلشىلىگى ءباسپاسوز جيىنىن وتكىزىپ، قارباقتاعى قاقتىعىستارعا قاتىستى مالىمدەمە جاساعان ەدى.

ءباسپاسوز يۋريفينگى بارىسىندا ەلشى ءراشاد ءمامادوۆ  ۇقكۇ-عا (ودكب) مۇشە ەلدەر ۇيىم شەڭبەرىندە ارمەنياعا قولداۋ بىلدىرە مە دەپ قاۋىپتەنەتىنىن، ازەربايجان حالىقارالىق قۇقىق تالاپتارىنا ساي، تاۋلى قاراباقتاعى قاقتىعىستى شەشۋدە قازاقستاننىڭ ساياسي ءھام مورالدىق قولداۋىن كۇتەتىنىن ايتقان.

«ءسوزسىز تاۋلى قاراباقتاعى جانجال بەيبىت جولمەن، بۇۇ قاۋىپسىزدىك كەڭەسىنىڭ رەزوليۋتسيالارى مەن وزگە دە حالىقارالىق قۇجاتتار شەڭبەرىندە شەشىلۋى كەرەك. ءبىز ەشكىمنىڭ، ەشقانداي جاعدايدا قازاقستاننىڭ تىنىشتىعىن بۇزعانىن قالامايمىز. ءبىز: «قازاقستان ءبىزدىڭ باۋىرلاس ەل. مۇنداعى بەيبىتشىلىكتى كوزدىڭ قاراشىعىنداي قورعاۋىمىز كەرەك»، دەيمىز»، - دەپتى ەلشى ءراشاد ءمامادوۆ.

ءوز سوزىندە ەلشى ازەربايجان قاراباقتاعى ارميان حالقىنا سول ەلدە بەيبىت ءارى تىنىش ءومىر ءسۇرۋى ءۇشىن بارلىق جاعدايدى جاساۋعا حالىقارالىق دەڭگەيدە كەپىلدىك بەرەتىنىن ايتقان.

«ءبىز ارميان حالقىنا قارسى ەمەسپىز. ءبىزدىڭ پرەزيدەنتىمىز 4 ءتورلى تالاپ قويدى. ول – ازەربايجان جەرلەرىن دەوكۋپاتسيالاۋ! بەلگىلەنگەن ۋاقىت پەن كەستەگشە ساي بارلىق قارۋلى كۇشتەر قۇرىلىمدارىن ازەربايجان تەرريتورياسىنان شىعارۋ! ازەربايجان مەن ارمەنيانىڭ ەگەمەندىگى مەن تەرريتوريالىق تۇتاستىعىن مويىنداۋ. وعان قول سۇقپاۋ. ول – ازەربايجان حالقىنان كەشىرىم سۇراۋ ءھام قاراباقتى ازەربايجان تەرريتورياسى دەپ تانۋ!»، - دەدى ازەربايجاننىڭ قازاقستانداعى توتەنشە جانە وكىلەتتى ەلشىسى.

ءارى قاراي، ەلشى ءراشاد ءمامادوۆ ارمەنيا بيلىگى ۇجىمدىق قاۋىپسىزدىك كەلىسىمى ۇيىمى شەڭبەرىندە وداقتاس ەلدەردەن كومەك سۇراۋى مۇمكىن ەكەنى ايتىپتى. ال ۇقكۇ-عا (ودكب) قازاقستان مەن ارمەنيادان بولەك رەسەي، بەلارۋس، قىرعىزستان مەن تاجىكستان مۇشە.

«اسكەري قاقتىعىستار ازەربايجان تەرريتورياسىندا، ءتىپتى ىشكى ايماقتارىندا ءجۇرىپ جاتىر. ءبىز ءوز جەرلەرىمىزدى ازات ەتىپ جاتىرمىز. ءبىز سوعىستى قالامادىق. مۇنا بارلىق حالىقارالىق مىنبەرلەردەن ايتىپ كەلەمىز. بىراق، قازىر ءبىزدىڭ ارميامىز كەرى شەگىنبەيدى. ارمەنيا قازاقستان سەكىلدى ۇقكۇ-نا مۇشە مەملەكەت. مىنە، سوندىقتان دا ءبىز قازاقستان بيلىگىنەن ارمەنيانىڭ اگرەسسياسىن ەاەو پەن ۇقكۇ شەڭبەرىندە توقتاتۋدى سۇرادىق. ءبىز 130 ۇلت تاتۋ-ءتاتتى ءومىر ءسۇرىپ جاتقان قازاقستاننىڭ، ءبىزدىڭ باۋىرلاردىڭ كومەگىنە مۇقتاجبىز»، - دەيدى ەلشى.

ەلشى ءراشاد ءمامادوۆ ءوز سوزىندە قازاقستاندا بەيبىتشىلىك پەن كەلىسىمنىڭ بۇزىلعانىن ازەربايجاننىڭ قالامايتىنىن ايتقان.

«ءبىز قازاقستانداعى ازەربايجان جانە ارميان وكىلدەرىنىڭ اراسىندا قانداي دا ءبىر كيكىلجىڭنىڭ بولۋىنا جول بەرمەيمىز. مۇددەمىز بۇل ەمەس. ءبىز ەلشىلىكتىڭ تاپسىرماسىنا سايكەس، ازەربايجان دياسپوراسىن مۇنداي جاعدايدىڭ ورىن الماۋىنا شاقىردىق»، - دەدى ول.

ءراشاد ءمامادوۆ قازاقستان بيلىگى تاۋلى قاراباقتىڭ ازەربايجاننان ءبولىنۋىن رەسمي مويىنداماعانىن جانە رەسپۋبليكانىڭ تۇتاستىعىن جاقتايتىنىن اتاپ وتكەن.

ايتا كەتەيىك، قاراباقتاعى قاقتىعىستار 27 قىركۇيەكتە باستالعان.  ازەربايجان مەن ارمەنيا قارۋلى كۇشتەرىنىڭ اراسىنداعى تاۋلى قاراباقتاعى اسكەري شابۋىلدار ءالى توقتاعان جوق. ەكى ەلدە دە اسكەري رەجيم جاريالاندى. ارمەنيا بيلىگى قاقتىعىستى ازەربايجان باستادى دەپ ايىپتاپ وتىر. ال ازەربايجان بيلىگى مۇنى «كونتر شابۋىل» دەپ مالىمدەگەن. ولاردىڭ وزىنشە، سوعىستى الدىمەن ارمەنيا باستاعان.

قازىر تاۋلى قاراباقتاعى قارۋلى قاقتىعىسقا قاتىستى بۇۇ، ەو، ەىقۇ سەكىلدى حالىقارالىق ۇيىمدار مەن شەت ەلدىك ليدەرلەر ءوز پوزيتسيالارىن ءبىلدىرىپ ازەربايجان مەن ارمەنياعا اراعايىندىق ايتىپ جاتىر. سونىڭ ىشىندە قازاقستان دا بار.

قازاقستاننىڭ سىرتقى ىستەر مينيسترلىگى 27 قىركۇيەك كۇنى رەسمي مالىمدەمە جاساپ، تاۋلى قاراباقتاعى جاعدايعا قاتىستى الاڭداۋشىلىق ءبىلدىردى. تاراپتاردى تاتۋلاستىرۋ ءۇشىن الاڭ ۇسىندى.

ال قازاقستان توراعالىق ەتەتىن تۇركى كەڭەسى رەسمي مالىمدەمە جاساپ، تاۋلى قاراباقتى «ازەربايجاننىڭ وككۋپاتسيالانعان تەرريتورياسى»، دەپ مالىمدەگەن.

تاقىرىپقا تۇزدىق:

قاراباقتاعى قاقتىعىس. قازاقستاننىڭ پوزيتسياسى قانداي؟

تاۋلى قاراباقتاعى قاقتىعىسقا بايلانىستى قر ءسىم مالىمدەمە جاسادى

تۇركى كەڭەسى ازەربايجاننىڭ تەرريتوريالىق تۇتاستىعىن قولدايدى!

قاراباق داۋى. «كەڭەستەگىلەر» نە دەيدى؟

قاراباقتاعى سوعىس. اليەۆ پەن پاشينيان كەلىسىمگە كەلە مە؟

Abai.kz