جەكسەنبى, 25 قازان 2020
COVID-19 قازاقستاندا. جۇقتىرعاندار — 110402. جازىلعاندار — 105618. قايتىس بولعاندار — 1796
46 - ءسوز 1246 7 پىكىر 21 قىركۇيەك, 2020 ساعات 12:12

قوي تەرىسىن جامىلعان قاسقىرلار

ولاردى قالاي انىقتاۋعا بولادى؟

جارتى جىلدان سوڭ – پارلامەنت سايلاۋى. بىزدە ءبىر مانداتتىق وكرۋگتەر جوق، سوندىقتان ول ناۋقانعا تەك قانا پارتيالار قاتىسا الادى.

قاراڭىز، سوڭعى كۇندەرى بۇعان دەيىن قالعىپ-مۇلگىپ كەلگەن پارتياسىماقتار (سونىڭ ىشىندە پارلامەنتتە وتىرعاندار، ونىڭ قۇرامىندا جوقتار) «تىرىلە» باستاعان سىقىلدى.

مالىمدەمەلەرى مەن سوزدەرىنە قاراساڭىز، قۇددى ءبىر وپپوزيتسيا! كوپشىلىكتىڭ كوكەيىندە جۇرگەن كوپتەگەن ماسەلەلەردى كوتەرەدى-اق.

مۇنىڭ ءبارى - ناۋقاندىق تىرلىك، سايلاۋالدى تىراشتانۋ عانا ەكەنىن ءبارىمىز دە تۇسىنەمىز عوي.

بىراق، «اڭقاۋ ەلگە ارامزا مولدا» دەگەن اتەيستىك سيپاتتاعى ءبىر ماتەل بار ەمەس پە؟ كەي اعايىن وسى پارتيالاردىڭ وسىنداي سوزدەرىنە سەنىپ تە قالىپ، قوي تەرىسىن جامىلعان قاسقىرلاردى ايىرا الماي قالادى. ونىڭ ۇستىنە ەلەكتوراتتىق كەزەڭدە بيلىك تە ول پارتيالارعا باق قولداۋىن كورسەتىپ، وسى كەزدەرى تەلەەكران تورىنە شىعارىپ قويادى.

مەنىڭشە، كىمنىڭ كىم ەكەنىن، ول پارتيالاردىڭ بيلىك ەمەس، حالىق جاعىندا ەكەنىن ءدوپ باسىپ، اينا-قاتەسىز انىقتاپ بەرەتىن قاراپايىم ءۇش تەست بار.

ءبىرىنشىسى، سول پارتيالار قازاقستاننىڭ جاڭاشا تاريحىنداعى ەڭ رەزونانستى وقيعالار تۇسىندا قايدا بولدى؟ ماسەلەن، «شاڭىراق» وقيعاسى، جاڭاوزەن قاندى قىرعىنى، جەر ميتينگىلەرى كەزىندە نە ايتتى، قانداي باعا بەردى؟ ەلدەگى ساياسي ولىمدەر، ساياسي استارى بار سوتتار كەزىندە داۋىس شىعاردى ما، ناقاقتان-ناقاق ايىپ تاعىلعان دەموكراتيالىق قوزعالىس وكىلدەرىن قورعادى ما؟ سوعان جاۋاپ بەرسىن!

ەكىنشىسى، بيلىككە سىن ايتقان كەزدە ولار ەلدە قالىپتاسقان قۇبىجىق ساياسي جۇيەنى، سونىڭ ىشىندە، ەلباسى مەن پرەزيدەنتتىڭ اتىن اتاي ما الدە وزدەرىنە جاقپاعان ءبىردى-ەكىلى شەندىنى سىناپ-مىنەپ، كوزگە تۇسكىسى كەلە مە؟

ءۇشىنشىسى، حالىقتىڭ جاعدايىن ودان سايىن قيىنداتقان، ەلدەگى اۆتوريتارلىق رەجيمدى مەيلىنشە كۇشەيتە تۇسكەن زاڭدار قابىلدانعاندا ول پارتيالار (سونىڭ ىشىندە، پارلامەنتتە وتىرعاندارى!) سول جوبالارعا قارسى شىقتى ما؟

مىنە، وسى مورالدىق-ساياسي تەستتەن سۇرىنبەي وتە العان پارتيالار نە تۇلعالار عانا دەموكراتيالىق كۇشتەر اتىنان سويلەي الادى دەپ سانايمىن.

ءامىرجان قوساننىڭ جازباسى

Abai.kz

7 پىكىر