سەنبى, 24 قازان 2020
COVID-19 قازاقستاندا. جۇقتىرعاندار — 110250. جازىلعاندار — 105566. قايتىس بولعاندار — 1796
46 - ءسوز 555 1 پىكىر 14 قىركۇيەك, 2020 ساعات 13:58

ۇكىمەت جىلۋىن سەزبەيتىن اۋىلدار...

2017 جىل بولاتىن. ءبىز اۋىل، قالا جاستارىنا دارىستەر وقىپ جۇردىك. تارباعاتاي اۋدانىنداعى اقسۋات، قىزىلكەسەك، كوكجىرا، قاراسۋ جانە باسقا اۋىلدارعا ەكى كۇن ءدارىس وقىدىق. كەلەسى باعىتىمىز قارقارالى ايماعى ەدى. تارباعاتاي اۋدانىنان ءتۇس اۋا شىققانبىز. اياگوزدىڭ جولىنا كۇن ۇياسىنا كىرەر ساتتە جەتتىك. قالاعا قونۋدى ويلاعانبىز، بىراق اقىلداسا كەلە ۋاقىت جوعالتپايىق دەپ جولعا شىقتىق. GPS-تەن قاراپ، ءبىر جول تاۋىپ الدىق. "نە بولسا دا نار تاۋەكەل" دەپ، سوعان قاراپ قارقارالىعا قاراي ءجۇرىپ كەتتىك.

ول بۇرىنعى شۇبارتاۋ اۋدانىنىڭ تەرريتورياسىمەن وتەتىن جول ەكەن. انا جول بايعۇس سالىنعالى ءبىر سمولا يىسكەپ، جوندەۋ كورمەگەنى كورىنىپ تۇر. تاس قاراڭعى بولدى. ءبىز ءبىر تۇنەككە كىرىپ بارا جاتقانداي اسەر الدىق. "الىستان ءبىر اۋىل كورىنسە عوي" دەپ تە ويلاپ قوياسىڭ. جوق. ءبىز، شۇرىق تەسىك جول، كولىكتىڭ جارىعى، قارا تۇنەك.

ءبىراز ۋاقىت وتكەن سوڭ، الدىمىزدان ءبىر كولىك شىقتى. سونى توقتاتىپ، "دۇرىس باعىتتامىز با" دەپ سۇراماق بولىپ ەدىك، اناۋ جىلدامدىعىن بارىنشا ارتتىرىپ، كەتىپ قالدى. "قارا تۇندە نە ىستەپ ءجۇر، قاراقشى ما" دەپ ويلاعان بولار.ونى دا تۇسىنۋگە بولادى.

شۇرىق تەسىك جولمەن كەلە جاتىرمىز. اداسىپ كەتەمىز-اۋ دەگەن كۇدىك باسىم. جولدىڭ كەي ويىلىپ قالعان جەرلەرىنە سۋ جينالىپ، قامىس سياقتى سۋدا وسەتىن شوپتەر ءوسىپ كەتىپتى. اقىرى ءبىر اۋىل كورىندى. ىشىنە كىرىپ ەدىك، سويتسەك ول بارشاتاس دەگەن اۋىل ەكەن. بۇرىنعى اۋدان ورتالىعى. ءوزىم شقو تۋماسى بولسام دا، بارشاتاستى ءبىرىنشى ەستىدىم. ۇيات ارينە. وكىنىشكە وراي بارشاتاستىڭ كەي جەرلەرى سوعىس ءجۇرىپ جاتقان ۋكراينا شىعىسىنداعى اۋىلدارعا ۇقسايدى ەكەن. بوس، تاستاندى ۇيلەر. حالىق از، جۇمىس جوق ەكەنى كورىنىپ تۇر. اۋدان ورتالىعى بولعان دەگەنگە سەنۋ قيىن. ءبىر ادام دۇرىس باعىتتا ەكەنىمىزدى سىلتەپ جىبەردى.

شۇرىق تەسىك جولعا قايتا تۇستىك. "بۇل جول 1969 جىلى قىتايمەن قاقتىعىستا سالىنعان. جالاڭاشكولدەن كەيىن، سوعىس بولسا تانك، اۋىر اسكەري تەحنيكا جەتكىزۋ ءۇشىن" دەدى سول اۋىلدىڭ تۇرعىنى. راس-وتىرىگىن بىلمەدىم.

شۇبارتاۋ كەزىندە مالى كوپ اۋدان بولعان دەيدى اكە-شەشەم. گەنوتسيد (اشارشىلىق) جىلدارى مۇنداعى قازاق تۇتاس قىرىلىپ قالىپتى. اۋدان حالقىنىڭ ازدىعى مەن اۋىلداردىڭ سيرەكتىگى دە سودان بولسا كەرەك. ءبىر قاراعاندا بارشاتاس ءوز كۇنىن ءوزى كورىپ جاتقان، ۇكىمەت جىلۋىن سەزبەيتىن اۋىلعا ۇقسادى. قازاقستاندا ونداي اۋىل قانشا ەكەن...

اسحات قاسەنعاليدىڭ جازباسى

Abai.kz

1 پىكىر