پارا الدى دەپ ۇستالعان قورعانىس مينيسترلىگىنىڭ بىلدەي گەنەرالىنا قاتىستى سوت پروتسەسى قىزۋ ءجۇرىپ جاتىر. بۇل تۋرالى 31 ارنا حابارلادى. 

كەزەكتى سوت وتىرىسى بۇرىنعىداي زال تولى قاتىسۋشىمەن ەمەس، ونلاين رەجيمدە. جالپى توتەنشە جاعداي ەنگىزىلگەلى بەرى قانشاما ادامنىڭ تاعدىرى قاشىقتان قارالىپ، شەشىلىپ جاتقانى بەلگىلى. بىرەۋلەر سوت وتىرىسىنا بالىق اۋلاپ ءجۇرىپ قاتىسسا، گەنەرال كوپباەۆتىڭ قورعاۋشىلارى ايىپتاۋلاردىڭ جالا ەكەنىن دالەلدەي الماي الەك.

ادۆوكاتتار اتى شۋلى ءىس قاجەت بولعاندىقتان عانا گەنەرال قاماۋعا الىنۋى مۇمكىن دەگەن پىكىردە. ايتپەسە، ارىزدانعان ءبىر عانا كۋاگەردىڭ ءسوزى ايىپتاۋعا نەگىز بولىپ وتىر ەكەن. ول ارىزدانۋشى تۋىسىن جۇمىسقا ورنالاستىرۋ ءۇشىن كوپباەۆقا پارا بەرگەنىن ايتىپتى. الايدا، كۋاگەرلەردىڭ ءبارى دەرلىك بۇل سوزدەردى جوققا شىعارعان. ءتىپتى، ارىزدانۋشىنىڭ جۇمىسقا ورنالاستىرامىن دەگەن تۋىسى دا ونداي كومەك سۇراماعانىن جانە مۇلدەم باسقا سالادا ەڭبەك ەتىپ جاتقانىن جايىپ سالدى. گەنەرالدىڭ قورعاۋشىلارى بۇل ءىستىڭ ءوز پايدالارىنا شەشىلەتىنىنە ۇمىتتەنەدى. تەك، ايىپتاۋشى كۋاگەرمەن بەتپە-بەت وتىرىپ، سۇراق قويۋعا مۇمكىندىك بولسا عوي دەپ قىنجىلىپ وتىر.

قانات سارسەمباەۆ، ق.كوپباەۆتىڭ قورعاۋشىسى:

وكىنىشكە وراي ونلاين رەجيمدە ءوتىپ جاتىر. ادامنىڭ ءوزى تىكەلەي قاتىسپاعان سوڭ، ەموتسينالدىق، پسيحولوگيالىق تۇرعىدان كوپ نارسە ەسكەرىلمەي قالادى. مىسالى، وسى ىستەگى باستى كۋاگەر سوت زالىندا بولسا، وندا ول ءوزى جالا جاپقان ادامنىڭ الدىندا وتىرعانىن كورىپ، ىڭعايسىز جاعدايعا تۇسەر مە ەدى. ال، قازىر ول مۇلدەم باسقا قالادا بولۋى مۇمكىن.

Abai.kz