الداعى جەكسەنبىدە وپپوزيتسيا پرەزيدەنت سايلاۋىنىڭ رەسمي ناتيجەسىمەن كەلىسپەيتىندەردى "جاڭا بەلارۋس مارشىنا" شاقىرىپ جاتىر. Nexta.Live Telegram-كانالىندا جاريالانعان اقپاراتقا سايكەس، اكتسيا مينسكىدەن بولەك وزگە قالالاردا دا وتپەك. پرەزيدەنتتىكتەن ۇمىتكەر بولعان سۆەتلانا تيحانوۆسكايانىڭ باستاماسىمەن قۇرىلعان وپپوزيتسيانىڭ ۇيلەستىرۋ كەڭەسى ماڭىزدى باعدارلاماسىن جاريالاماق.

16 تامىزدا وتكەن جالپىحالىقتىڭ قارسىلىق اكتسياسىندا ءۇش باستى تالاپ قويىلدى: ساياسي تۇتقىنداردى تەز ارادا بوساتۋ، الەكساندر لۋكاشەنكونىڭ وتستاۆكاسىن تالاپ ەتۋ جانە نارازىلىققا شىققان ادامداردى ۇرىپ-سوققان كۇش قۇرىلىم وكىلدەرىن سوت الدىندا جاۋاپقا تارتۋ.

19 تامىزدا جۇمىسىن باستاعان وپپوزيتسيانىڭ ۇيلەستىرۋ كەڭەسى بيلىك وكىلدەرىن كەلىسسوزگە كەلۋگە شاقىردى. "ەلدەگى ساياسي جانە ەكونوميكالىق داعدارىستىڭ تەرەڭدەۋىنە جاۋاپكەرشىلىكتى قازىرگى بيلىك الادى" دەلىنگەن رەزوليۋتسيا ماتىنىندە.

ولار ەلدە كونستيتۋتسيا قۇرىلىمىن وزگەرتۋدى ماقسات ەتىپ وتىرماعانىن مالىمدەدى.

تامىز ايىنىڭ باسىندا بەلارۋستە بولعان پرەزيدەنت سايلاۋىنىڭ رەسمي ناتيجەسى بويىنشا، قازىرگى پرەزيدەنت الەكساندر لۋكاشەنكو 80 پروتسەنت داۋىس الىپ، جەڭىسكە جەتكەن. وپپوزيتسيا سايلاۋ ناتيجەسى بۇرمالانعانىن مالىمدەپ، قايتا سايلاۋ وتكىزۋدى تالاپ ەتتى. بەلسەندىلەردىڭ ەسەبى بويىنشا، سايلاۋدا سۆەتلانا تيحانوۆسكايا باسىم داۋىسقا يە بولعان.

9 تامىزدىڭ كەشىندە باستالعان نارازىلىق اكتسياسىنا قاتىسۋشىلاردى قۇقىق قورعاۋ ورگاندارى قىزمەتكەرلەرى كۇشپەن تارقاتتى. جۇزدەگەن ادام جارالانىپ، مىڭداعان ادام ۇستالدى.

19 تامىزدا الەكساندر لۋكاشەنكو مەملەكەتتىك قاۋىپسىزدىك قىزمەتىنە اكتسيانى ۇيىمداستىرۋشىلاردى تابۋعا تاپسىرما بەردى. "مينسكىدە بۇدان بىلاي ەشقانداي تارتىپسىزدىك بولماۋى ءتيىس. حالىق بەيبىتشىلىك پەن تىنىشتىقتى تالاپ ەتەدى", - دەدى ول قاۋىپسىزدىك كەڭەسىنىڭ وتىرىسىندا.

Abai.kz