جۇما, 25 قىركۇيەك 2020
COVID-19 قازاقستاندا. جۇقتىرعاندار — 107590. جازىلعاندار — 102360. قايتىس بولعاندار — 1699
ەستەلىك 1295 9 پىكىر 3 تامىز, 2020 ساعات 11:25

بار قۇرلىقتا ءىزى جاتىر...

ءانۋار ءالىمجانوۆتىڭ تۋعانىنا 90 جىل!

حالىقارالىق دەڭگەيدەگى جازۋشى-پۋبليتسيست، مەملەكەت جانە قوعام قايراتكەرى بولعان ءانۋار تۇرلىبەكۇلىنىڭ ومىرلىك، شىعارماشىلىق جولىن تۇگەلدەي بايان ەتۋ ارتىق بولار، ويتكەنى ول قازاقستانعا، سوۆەت وداعىنا بەلگىلى بولۋىمەن قاتار الەمنىڭ ءوزى بارىپ-كەلىپ جۇرگەن 60 شاقتى ەلىنە  قالامگەرلىگىمەن دە، ديپلوماتتىعىمەن دە ابدەن تانىلدى. روماندارى مەن حيكاياتتارى، ماقالالارى مەن سوزدەرى سونشاما تىلگە اۋدارىلىپ، وقىرمان قاۋىمدارىنان جوعار باعا الدى. حالىقارالىق: دجاۆاحارلار نەرۋ، نەتو اتىنداعى جانە كونگو رەسپۋبليكاسىنىڭ، «لوتوس» جۋرنالىنىڭ  سيلىقتارىمەن ماراپاتتالعانى سوندىقتان.

دەگەنمەن، قىزمەتىن قىسقاشا شولساق: انەكەڭ 1955-جىلى ناۋرىز ايىنان باستاپ «ليتەراتۋرنايا گازەتانىڭ» قازاقستان مەن ورتا ازيا بويىنشا مەنشىكتى ءتىلشىسى، كەيىنىرەك «لەنينسكايا سمەنا» گازەتى رەداكتورىنىڭ ورىنباسارى، قازاقستان جانە قىرعىزستان رەسپۋبليكالارى بويىنشا «پراۆدا» گازەتىنىڭ مەنشىكتى ءتىلشىسى، «قازاقفيلم» ستۋدياسىنىڭ باس رەداكتورى، «قازاق ادەبيەتى» گازەتىنىڭ باس رەداكتورى، قازاقستان جازۋشىلار وداعى باسقارماسىنىڭ ءبىرىنشى حاتشىسى، رەسپۋبليكالىق تاريحي ەسكەرتكىشتەر مەن مادەنيەتتى قورعاۋ جونىندەگى قازاق قوعامى ورتالىق كەڭەسى پرەزيديۋمىنىڭ توراعاسى، كسرو جوعارعى سوۆەتى رەسپۋبليكالار كەڭەسىنىڭ توراعاسى قىزمەتتەرىن اتقارىپ، 1991-جىلى جەلتوقسان ايىنىڭ 26-سى كۇنى سوۆەت وداعىنىڭ  ىدىراۋى تۋرالى «№142-ن دەكلاراتسياسىنا» قول قويدى.

«قازاقستان – جاپونيا» دوستىق قوعامىنىڭ پرەزيدەنتى ءانۋار ءالىمجانوۆ حالىقارالىق ادەبي بايلانىس اياسىندا شەتەلدىك  كوپتەگەن بىرلەستىكتەردىڭ، كوميسسيالار مەن كوميتەتتەردىڭ مۇشەسى بولدى.

قازاقستان كومسومولىنىڭ، قازاق كسر مەملەكەتتىك سيلىقتارىن الدى. «حالىقتار دوستىعى»، باسقا دا وردەن-مەدالدارمەن ماراپاتتالعان. قازاقستاننىڭ حالىق جازۋشىسى...

جەر بەتىندە نەشە قۇرىلىق بار بولسا، سونىڭ بارىندە ءىزى قالعان قادىرلى قالامگەر قازاق – ءانۋار تۇرلىبەكۇلى ايتپاعان ءادىل ءسوز، جازباعان ماڭىزدى ءجايت جوق دەي الامىن. كەشەگى كەڭەس وداعى ورنالاسقان بولىكتەن تىسقارى الپىس شاقتى ەلدىڭ بارىنە اتى جەتتى، جەلىپ ءجۇرىپ تانىدى. قازاقستانى، قازاعى حاقىندا اڭگىمە شەرتتى، تانىتتى. انەكەڭنىڭ ول يگى قىزمەتى  الەم ادەبيەتى تاريحىنا جازىلعانى امبەگە ءمالىم بولسا كەرەك. بۇگىنگى ءسوزىم ول تۋرالى ەمەس، ءوزىن ءوزى جارنامالاۋدى، وزگەلەرگە جارنامالاتۋدى سۋحانى سۇيمەگەن انەكەڭنىڭ شىعارماشىلىق قورىندا جاتقان قازىنا جايىندا. مۇمكىندىگىمە قاراي سىزدەرگە ونىڭ ۇشتەن ءبىرىن عانا ۇسىنار الدىندا كيەلى ات-اتاعى حالقىمەن  بىرگە جاسايتىنى اقيقات  ءىلياس اعا وماروۆتىڭ «جازۋشى-ازامات» ماقالاسىنان (1966 ج.) مىنا ءۇزىندىنى وقۋ ءجون بولار دەپ ءبىلدىم. مۇندا بۇگىنگى جاس ۇرپاعىمىزدىڭ كوبى كورمەگەن ءانۋاردىڭ بەينەسۋرەتى تۇر:

«...ءار تالانتتى ءوز مەزگىلىندە تانۋ قاجەت. بۇل - بارىنەن بۇرىن سول تالانتقا ۇلكەن جاۋاپكەرشىلىك جۇكتەۋ دەگەن ءسوز. بۇل - ونىڭ ءوزى ءۇشىن عانا ەمەس، ول ەڭبەك ەتىپ جۇرگەن ادەبيەتتىڭ جانرىنا دا جۇكتەلەتىن جۇمىس.

ءا.ءالىمجانوۆتىڭ پۋبليتسيستيكالىق تالانت كۇشى نەدە؟ ءبىزدىن ويىمىزشا، ءوز ءىسىنىڭ تابيعاتىن جەتىك بىلۋىمەن بىرگە، الىپ وتىرعان وبەكتىسىنىڭ تاريحىن مۇقيات زەرتتەيتىنىندە. بۇگىنگىسىن تانۋمەن بىرگە ونىڭ كەلەشەگىن، باعىتىن  ومىر كۇبىلىستارىنىڭ ءار قىرىنان قاتاڭ باقىلاۋ، قاي نارسەگە نەنىڭ ءتان ەكەنىن ۇعىنۋ، اقىرىندا ءوز ويىن لوگيكالىق جاعىنان شىنشىل دا قاراپايىم،   مۇقيات قورىتۋىندا. ونىڭ شىعارمالارى وقىعاندا ەشكىمدى ويلاۋعا زورلامايدى، بىراق  اركىم ءوزى ەرىكسىز ويلانادى.

ەگەر وسى ايتىلعاندارعا شىن مانىندەگى گۋمانيستىڭ پاراساتتى اقىلى مەن ىستىق جۇرەك سەزىمىن قوسساق، ءانۋار ءالىمجانوۆتىڭ ەشكىمگە ۇقسامايتىن قولتاڭباسىن تانۋعا بولادى».

ەندى انەكەڭنىڭ قازىناسىنا – حاتتارعا – ۇڭىلەلىك: 

***

ءانۋار! «وترار سيى» حيكاياتىڭدى وقىدىم. شىنايى ءسۇيىندىم. عاجاپ شەبەرلىكپەن شىمىر ءورىلىپتى. بارەكەلدى!

مىرزا تۇرسىن-زادە.
دۋشانبە.1966 ج.

***

يسلامابادتان.
قازاقستان جازۋشىلار وداعىنا.

قىمباتتى دوسىم ءانۋار جانە بارشا قازاق دوستارىم! ۇلى مەرەكەمەن قۇتتىقتاۋىمدى قابىل الىڭىزدار! سوۆەت وداعى كوپۇلتتى ەلدە  مادەنيەتتى، ادەبيەتتى  الەۋمەتتىك تەڭدىك نەگىزىندە جان-جاقتى دامىتۋعا بولاتىنىن دالەلدەدى. پاكستانداعى دوستارىڭىز سىزدەردىڭ جەتىستىكتەرىڭىزدى ماقتان ەتۋدە، سىزدەردەن ۇلگى الماق باعىتتا.

گۇلدەنۋ  جولىندا جاڭا تابىستارعا جەتىپ، باقىتقا بولەنە تۇسىڭىزدەر! دوسىم، سەنىڭ تۋعان ادەبيەتىڭ قاناتىن كەڭ سەرمەي بەرسىن!

فايز احماد فايز.
07. ءحى. 1960.

***

قۇرمەتتى ءانۋار! قورقىت-اتا تۋرالى ماقالاڭىزدى وقىدىم، - عاجاپ!ماعان ءبىر كىتاپتى فوتو-سۋرەتىن قوسا سالىپ جىبەرۋىڭىزدى وتىنەمىن!

و. گوكياي.

انكارا، تۋركيا.
26. ح11.1969 ج.

                                                         ***

قىمباتتى ءانۋار! سەنىڭ تاماشا تالانتىڭا بۇكىل ءۇندىستان قول سوقتى!  بىز شەكسىز شاتتاندىق!

روبەرت روجدەستۆەنسكي،
اندرەي ۆوزنەسەنسكي.
1969  ج.

***

قىمباتتى ءانۋار!

ءۇندىستاندا بولعان كۇندەرىڭىزدە تۇرىكمەننىڭ كوركەم ادەبيەتى جانە كلاسسيگىمىز ماحتۇمقۇلىنىڭ شىعارماشىلىعى جايىندا ايتقان جىلى لەبىزدەرىڭىزدى  ەستىدىم، جازعاندارىڭىزدى وقىدىم. سىزگە العىسىمىز شەكسىز!

ءسىزدىڭ  وندا تۇرىكمەنستانعا، تۇرىكمەن ادەبيەتىنە جانە ماحتىمقۇلىعا قاتىستى كوپتەگەن ماتەريالداردى كورگەنىڭىزدى ەستىدىم. ولاردى قاي قالادا بولعانىڭىزدا قايدان كورگەندەرىڭىزدى، وقىپ بايقاعاندارىڭىزدى ەسىڭىزدە ساقتاعان بولساڭىز، ماعان ايتۋىڭىزدى وتىنەمىن! كەرەك دەسەڭىز، سىزگە ارنايى كىسى جىبەرەيىن. ول ماتەريالدار ءبىز ءۇشىن اسا قۇندى عوي. قاراشا ايىنىڭ ورتا شەنىندە ۇندىستانعا جولىم تۇسەر دەگەن ويىم دا بار. سىزگە قۇشاعىم اشىق!

بەردى كەرباباەۆ.
اشحاباد. 14. ح. 1970  ج.

***

ءانۋار!  دوسىم!

سەنى قادىرلەپ-قۇرمەتتەيتىن كوڭىلىم الماتىنىڭ داڭعىلدارىنداي كەڭ! ونى ءوزىڭ دە بىلەسىڭ عوي. سەنىڭ شىعارماشىلىق تابىستارىڭا ءتانتى بولا قۋانىپ جۇرەمىن! الاتاۋدىڭ اقيىعى، سامعاي ءتۇس، سامعاي بەر!

راسۋل عامزاتوۆ.
داعىستان. 12. 05. 1970 ج.

***         

انۋارعا.

قىرىق كوكتەم

«قازاق ادەبيەتى» گازەتىنىڭ وقىرماندارىن قازاق سسر-نىڭ قىرىق جىلدىعىمەن قۇتتىقتايمىن!

الماتىدا بولعان، سىزدەردىڭ جاسىل قۇرىلىقتاي اسەم قالالارىڭىزدىڭ ءىشى-سىرتىمەن، جامبىل جۇرگەن جەرلەرمەن تانىسقان كۇندەرىمدى تەبىرەنە ەسكە الامىن. سول سەبەپپەن قازاق دوستارىما ايتارىم: كوركەمدەي تۇسۋگە ابدەن لايىق  قالانى جاسىل جەلەككە بولەي بەرۋگە قۇلشىنىس باردا يگى ءىستى ەسەلەۋ قاجەت.

تاماشا ارەكەتتىڭ العاشقى ءانشىسى دە، جىرشىسى دا نەبىر جارقىن دارىندى، كەڭ تىنىستى جاستارى بار قازاق ادەبيەتى، قازاقستان ادەبيەتى دەپ بىلەم. مەنىڭ جاس قالامداستارىم استانالارىن جاسىل تۇسكە بوياۋعا كەشىكپەي كىرىسىپ جۇرسە، سىزدەردىڭ كەلەسى مەرەيتويلارىڭىزدا ءبىز، ساقال-مۇرتى اعارعان اقساقالدار، قازاقتىڭ جاسىل جايلاۋلارىنىڭ ءبىرىنىڭ ءمولدىر بۇلاعى باسىندا سىزدەرمەن بىرگە شاتتانىپ وتىرارمىز دەپ ويلايمىن.

بارشاڭىزعا ءيىلىپ سالەم بەردىم!

لەونيد لەونوۆ.

24. V. 1961 گ.

***

 قىمباتتى ءانۋار!

ءسىزدى مامىر مەرەكەلەرىمەن، جەڭىس كۇنىمەن شىنايى قۇرمەتتەي قۇتتىقتاپ، باقىتتى  ۇزاق عۇمىر، شىعارماشىلىق  تىڭ تابىستار تىلەيمىن!

وتباسىڭىزعا، دوس-جولداستارىڭىزعا جاقسى نيەتتى سالەمىمدى ايتىڭىز!

سىزگە قۇشاعىم اشىق، كەزدەسۋدى كۇتۋدەمىنى

ءسىزدىڭ ميحايل لۋكونينىڭىز.

ماسكەۋ. 1976 ج.

***

قىمباتتى ءانۋار!

ءسىزدى كوكتەمنىڭ كوركەم-جارقىن مەرەكەسى – 1-مامىرمەن قۇتتىقتايتىن!         ءسىزدىڭ دارىنعا، ىزگىلىككە، اقىل-پاراساتقا تولى جۇرەگىڭىزدە ارقاشان كۇننۇرلى كوكتەم بولسىن! ءسىزدى – ناعىز ادامدى، دوسىمدى، جازۋشىنى قاتتى قۇشاقتادىم!

سىزبەن قاشاندا بىرگە  ەد. مەجەلايتيس.

ۆيلنيۋس، 1.V.77 ج.

***

باۋىرىم ءانۋار!  ءوزىنىڭ  شىعارماشىلىق  ىسىندە  جاۋاپكەرشىلىكتى سەرىك ەتە بىلگەن جازۋشى كەيىنگى ۇرپاقتاردىڭ قۇرمەتىنە بولەنەدى. سول سەزىم سەندە مول!

مۇستاي كارىم.

1975 ج.

***

نيۋ-يورك ۋنيۆەرسيتەتى قالاشىعىنداعى حوستوس كوللەدج بىرلەستىگى. 10.ءحى.1976 ج.

قىمباتتى ءا.ءالىمجانوۆ  مىرزا!

بۇل حاتىم - ءسىزدىڭ كوللەدجىمىزە كەلگەن ساپارىڭىزدى جوعارى باعالاعان نيەتىمىزدى ءبىلدىرۋدىڭ نىشانى. ءوزىمنىڭ قۇرمەتىمدى جانە ستۋدەنتتەرىمىزدىڭ ريزاشىلىعىن ايشىقتاپ ايتۋعا ءتىل جەتەر ەمەس. ستۋدەنتتەرىمىز ءسىزدىڭ بىزدە بولعانىڭىزدى وزدەرىنىڭ كوللەدجدە وتكىزگەن ومىرلەرىندە كورىپ-بىلگەندەرىنە تەڭ  دەستى.

ءسىزدىڭ قازاق حالقىنىڭ مادەنيەتى، ادەبيەتى مەن تاريحى جايىندا جالىن اتا ايتقانىڭىز ولارعا وزدەرىنىڭ كوز الدىندا عاجاپ سۋرەت سالىنعانداي اسەر ەتتى. ستۋدەنتتەر ءسىزدىڭ قاراپايىمدىلىعىڭىزعا ءتانتى بولعاندارىن دا ايتتى.

ءسىزدىڭ ءتىلماشىڭىز اۋرە حانىممەن تانىسقانىمىزعا دا ريزا بولدىق.  ول ءسىزدىڭ  ءسوزىڭىزدى عانا اۋدارمادى، ارناسى كەڭ وي-تولعامدارىڭىزدى ءوزى دە ەرەكشە اسەرلەنىپ، تولقىپ تۇرىپ  جەتكىزە ايتتى.

دوسىم مەنىڭ، ءبىزدىڭ قالتقىسىز العىسىمىزدى قابىل الىڭىز. قازاق حالقى ءبىزدىڭ جۇرەگىمىزدە. قازاق ەلى بىزگە بۇدان بىلاي كارتاداعى الىس ءبىر ەل ەمەس، جاقىنىمىز بولادى. ءبىز ونى تانىدىق، جاقسى بىلەمىز!

وتباسىڭىزعا امان-ەسەن ورالۋىڭىزعا، جۇمىسىڭىزدا جاڭا جەتىستىگىڭىز  كوپ بولۋىنا تىلەكتەسپىز!

ىستىق ىقىلاستى ەدۆارد س. مەيحاردىڭىز، امەريكانىڭ نەگر پروفەسسورلارى اسسوتسياسىنىڭ پرەزيدەنتى، پروفەسسور.

***

نيۋ-يوركتىڭ مەملەكەتتىك عىلىم جانە ونەر ۋنيۆەرسيتەتى

21. 04. 1978 ج.

كسرو، قازاق سسر-ى. الماتى.

                                                                 قازاقستان جازۋشىلار وداعى

                                                                 باسقارماسىنىڭ 1-حاتشىسى

                                                                 ءانۋار ءالىمجانوۆ  مىرزاعا

قىمباتتى  ا.ءالمجانوۆ  مىرزا!

مەنى ورتا ازيانىڭ مادەنيەتى مەن تىلدەرىن زەرتتەۋشى وتە تالاپتى ستۋدەنت دەپ بىلگەيسىز. پروفەسسور رەتىندە ستۋدەنتتەرىمە قازاق ومىرىنەن جان-جاقتى مول ءبىلىم بەرۋگە تىرىسىپ ءجۇرمىن. ءبىز قازاق ادەبيەتىن زەرتتەۋدەمىز. ءبىزدىڭ جۋرنالدان ءسىز تۋرالى جازىلعاندى وقىدىم. ەگەر سىزگە ءبىر ءوتىنىشىمدى ايتسام، بىلگىشسىنىپ جۇرگەن بۇل كىم، دەپ قالماعايسىز. ستۋدەنتتەرىمە قازاق ادەبيەتى جايىنان كەڭ شولۋ جاساپ بەرۋدى جانە جۋرنالىمىزعا ماقالا جازۋدى ماقسات ەتتىم. ماعان كومەكتەسۋ نيەتىڭىز بولسا، وزدەرىڭىزدە وسى باعىتتا قازاق تىلىندە جازىلعان ەڭبەكتەردىڭ كوشىرمەلەرىن جىبەرسەڭىز، اسا ۇلكەن ۇلەس قوسقان بولار ەدىڭىز. ءوزىڭىز ايتقان: س.مۇقانوۆتىڭ «بوتاگوز»، م.اۋەزوۆتىڭ «اباي جولى» شىعارمالارىن جولداساڭىز، كوڭىلىمىز كونشىر-اق ەدى. جالپى قاي شىعارمانى جىبەرسەڭىز دە، قۇمارتا وقىر ەدىك. سىزگە الدىن الا راحمەت ايتامىن!

گەرولد ر.ۆاتتەرسبي، لينگۆيستيكا جانە انتروپولوگيا عىلىمدارىنىڭ دوكتورى، پروفەسسور.   

***

قىمباتتى ءانۋار!

«ۇستاز» ءۇشىن راحمەت، وسىنداي كىتابىڭ شىققانىمەن قۇتتىقتايمىن! ۋكراينا دا سيلىق ازىرلەپ قويدى – «سۋۆەنىر ءىز وترارا» باسىلىپ شىقتى! شىنايى قۇرمەتىمىز بەن دوستىق سەزىمىمىزدى قابىل الىڭىز.

ولەس گونچار.

كيەۆ، 10.09.79 گ.

***

قىمباتتى  انۋار!

«ۇستازدىڭ ورالۋى» حيكاياتىڭدى ريما ەكەۋىمىز دە وقىپ شىقتىق، ساعان شىنايى ريزاشىلىقپەن  راحمەت! حيكايات ماعان بەيمالىم دەرلىك سوناۋ زاماننىڭ سيپاتىن تانىتىپ، عالىم تۇلعانىڭ تىرلىگىن بۇكىل بولمىسىمەن، تاريحي مانىمەن بەينەلەپ اشىپ بەردى. وتە قىزىقتى، پايدالى دا جاقسى كىتاپ! قۋانا قۇتتىقتايمىن! بىزگە نازار اۋدارعانىڭا راحمەت!

ىزگى تىلەكتى سالەممەن، - دانيل گرانين.

لەنينگراد، 18/ح.79 ج.

***

دۋشانبە، 3-ءنشى شىلدە، 1980 ج.

قۇرمەتتى انۋاربەك  تۇرلىبەكۇلى!

تاجىكستاننىڭ حالىق اقىنى، سوتسياليستىك ەڭبەك ەرى، لەنيندىك جانە مەملەكەتتىك سيلىقتاردىڭ يەگەرى  مىرزا تۇرسىن-زادەنىڭ تۋعانىنا 1981-جىلى 70 جىل تولادى. «يرفون» باسپاسى سول مەرەكە الدىندا داڭقتى اقىن جايىندا ەستەلىكتەر جيناعىن شىعارۋدى ۇيعاردى.

مىرزا تۇرسىنۇلى ەكەۋىڭىزدىڭ قوعامدىق ورتاق قىزمەتتەستەر بولۋمەن قاتار  ۇلكەن دوستار بولعاندارىڭىز بىزگە جاقسى ءمالىم. ياعني ءسىزدىڭ ەستەلىگىڭىزدى ەرەكشە ىلتيپاتپەن كۇتەمىز. ەكەۋىڭىزدىڭ بىرگە تۇسكەن سۋرەتتەرىڭىز بولسا، ونى قوسا جولداساڭىز، شەكسىز ريزا بولىپ، جيناققا ۇسىنار ەدىك.

ەستەلىگىڭىزدى تاجىكستان جازۋشىلار وداعىنا، مەنىڭ اتىما بيىلعى قازان ايىنىڭ 1-ىنە دەيىن جىبەرەرسىز. قولجازبانى سول ايدا باسپاعا بەرۋىمىز كەرەك.

سىزگە الدىن الا العىس ايتامىن!

ءسىزدىڭ مۋمين كانواتىڭىز،

تاجىكستان جازۋشىلار وداعىنىڭ 1-ءنشى حاتشىسى.                                                                   ***

اسا قادىرلى ءانۋار تۇرلىبەكۇلى!

الماتى كونفەرەنتسياسىنا شاقىرعانىڭىزعا بەك ريزامىن، بىراق، وكىنىشكە قاراي، بارا الاتىن ەمەسپىن، - دەنساۋلىق جاراڭقىراماي تۇر. شۇكىرشىلىك ەتىپ وتىرعانىم: باياندامامدى دايىنداپ، بەك ىبىراەۆقا جولداپ ۇلگىردىم. ونى كونفەرەنتسيا ماتەريالدارىن قوستىرۋىڭىزدى، سەكتسيالىق ماجىلىستە وقىتتىرۋىڭىزدى وتىنەمىن!

دەنساۋلىعىمنىڭ قۇبىلعانىن ءوزىم كىنالىمىن. بۇكىل قىس پەن كوكتەم بويى «كونە رۋس جانە ۇلى دالا» ( ءVىى-ءحىى عاسىرلار) كىتابىمدى جازدىم. ءسويتىپ تيتىقتاپ قالدىم. ال ءسىزدىڭ قالاڭىز بارعىم كەلىپ-اق ەدى، قايتەيىن!

ءسىزدى شىنايى قۇرمەتتەۋشى  ل.ن.گۋميلەۆ.

24.VIII.1980.

ايتپاقشى، بۇل جاۋابىمدى ءسال كەشىكتىرىپ الدىم، ءبىر دوسىمنىڭ ساياجايىندا جاتىپ، ماسكەۋدە ۋاقتىلى بولمادىم.

***

كسرو جازۋشىلار وداعى

ماسكەۋ، ۆوروۆسكي كوشەسى، 52.

انۋاربەك تۇرلىبەكۇلى!

بۇگىندە بۇكىل الەمدە يدەولوگيالىق قاتتى كۇرەس ءجۇرىپ جاتقانىن بىلەسىز. ءبىزدىڭ قارسىلاستارىمىز قيتۇرقىلىق ارانداتۋدىڭ بارلىق ءتۇرىن قولدانىپ، ونىڭ ىشىندە يادرولىق قارۋسىزدانۋ، يادرولىق سىناۋلارعا تيىم سالۋ مەرزىمىن ۇزارتۋ جونىندەگى سوۆەتتىك ۇسىنىس-شەشىمدەردى بۇرمالاپ تۇسىندىرۋدە.

ءسىزدىڭ كوپتەگەن شەتەلدىك ادەبي قاۋىمدا اسا بەدەلدى ەكەنىڭىز بىزگە ءمالىم. ءسىز سول قاۋىمداردىڭ ءوزىڭىز بىلەتىن كورنەكتى جازۋشىلارىنا، مادەنيەت قايراتكەرلەرىنە حات جازىپ، سوۆەتتىك بەيبىت نيەتتى جاڭا ۇسىنىستاردى قولداتساڭىز، قۇپتاپ ماقالا جازدىرساڭىز، سىزگە ريزا بولار ەدىك!

قۇرمەتپەن، - كسرو جازۋشىلار وداعى باسقارماسىنىڭ حاتشىلار القاسى.

1986 ج.

***

باكۋ، 30.ح.1991 ج.

باكۋ. 30

كسرو جوعارعى سوۆەتى

رەسپۋبليكالار كەڭەسىنىڭ توراعاسى

ا.ت. ءالىمجانوۆ جولداسقا

قۇرمەتتى ءانۋار تۇرلىبەكۇلى!

ءبىزدىڭ ۇلى جەرلەسىمىز، الەم ادەبيەتىنىڭ الىبى نيزاي گياندجەۆيدىڭ تۋعانىنا 850 جىل تولۋى ماسكەۋدە رۋحاني-ەستەتيكالىق جوعارى دەڭگەيدە اتاپ وتىلگەنىە ايتۋ – مەن ءۇشىن ۇلكەن مارتەبە. وداعىمىزدىڭ استاناسىندا ەسكەرتكىش ورناتىلعانى، اكادەميالىق ۇلكەن تەاتردا سالتاناتتى جيىن بولعانى ازەربايجان حالقىنىڭ جۇرەگىندە ماڭگىلىككە ساقتالادى.

ۇلكەن جەتىستىگىمىز بولعان بۇل ىسكە ءسىزدىڭ جەكە ۇلەس قوسقانىڭىزدى جاقسى ءبىلىپ، جوعارى باعالاۋدامىز. سىزگە كوپ-كور راحمەت ايتۋدامىز!

اياز مۋتاليبوۆ،

ازەربايجان رەسپۋبليكاسىنىڭ پرەزيدەنتى.

***

ماسكەۋ. كرەمل. ءا.ت.الىمجانوۆقا

قۇرمەتتى انۋاربەك!

جاڭا جىلمەن تولعانا قۇتتىقتاۋىمدى قابىل الىڭىز! سىزگە، بارشا تۋعان-تۋىسقاندارىڭىزعا مىقتى دەنساۋلىق، باقىت، مول جاقسىلىق تىلەيمىن!

سالەممەن، - وبلكەڭەس توراعاسى  امان تولەەۆ.

كەمەروۆ. 1992 ج.

***

18. 02. 1993 ج.

«قازاقستان – جاپون»

                                                                             اسسوتسياسىنىڭ پرەزيدەنتى

                                                                             ءانۋار ءالىمجانوۆ مىرزاعا

اسا قۇرمەتتى ءا.ءالىمجانوۆ مىرزا!

ءسىزدىڭ بيىلعى قاڭتاردا جاپونياعا كەلىپ قايتقانىڭىز ءبىزدىڭ ەلدەردىڭ ءوزارا قارىم-قاتناسىن نىعايتۋعا مول ۇلەس قوسقان يگىلىكتى شارا بولدى دەپ  اتاپ ايتا الامىن. «اۆتويندۋستريا-93» كورمەسىن اشۋىمىزعا كوڭىل بولگەنىڭىز، كومەكتەسكەنىڭىز ءۇشىن سىزگە شەكسىز العىسىمدى جولداپ وتىرمىن... ءسىزدىڭ بىزگە جان-جاقتى كومەكتەسە بەرەتىنىڭىزگەى ۇلكەن ۇمىتپەن وتىنەمىن!

قۇرمەتپەن، - م.يمانيسي، «روتوبو-نىڭ»، رەسەي جانە شىعىس ەۋروپامەن ساۋدانىڭ جاپون اسسوتسياسىنىڭ تۇراقتى ديرەكتورى.                             

***

بۇل حاتتار – ءانۋاردىڭ مۇراعاتىندا جاتقانداردىڭ جارتىسى عانا. ءبارىن شولىپ شىقتىم. ۇجىمداردان، جەكە ادامداردان كەلگەن. سوۆەت وداعىندا تانىمال قالامگەر بولعان انەكەڭ شەت ەلدەردە، اسىرەسە جاپونيادا، ازيا-افريكادا ديپلومات رەتىندە دە قۇرمەتتەلىپتى. ءوزى تۋرالى نە اۋىزشا، نە جازباشا: «مەن ءسويتتىم!» دەمەگەن قاراپايىم انەكەڭنىڭ ءىرى قيمىلدارى حاتتاردا سايراپ جاتىر.

عابباس قابىشۇلى 

Abai.kz

9 پىكىر