قازاقستاندا يمۋننوبيولوگيالىق ءدارى-دارمەك جانە باسقا دا مەديتسينالىق ونىمدەر شىعاراتىن بيوفارماتسەۆتيكالىق زاۋىتتىڭ قۇرىلىسى باستالدى. بۇل تۋرالى LS سايتى جازدى. دالىرەك ايتساق، ۇكىمەت باسشىسى اسقار ءماميننىڭ ءباسپاسوز قىزمەتى حابارلاپتى.

ۇكىمەتتىڭ اقپاراتىنا سەنسەك، ۇكىمەت باسشىسى اسقار مامين ۆاكتسينا شىعاراتىن زاۋىتتىڭ قۇرىلىسىن ءوزى باستاپ بەرگەن. زاۋىت جامبىل وبلىسى، قورداي اۋدانىنا قاراستى گۆاردەيسكي اۋىلىندا سالىنىپ جاتىر ەكەن.

«زاۋىت حالىقارالىق ستاندارتتارعا جانە تاجىربيەلەرگە ساي (GMP), يممۋنوبيولوگيالىق ءدارى-دارمەك ونىمدەرىن شىعاراتىن بولادى. سونىڭ ىشىندە كوروناۆيرۋس ينفەكتسياسىنا قارسى ۆاكتسينا دا بار. قازىرگى تاڭدا قر ۇعزي دايىنداعان Covid-19-عا قارسى سىناق تۇرىندەگى ۆاكتسينا ددسۇ تىزىمىنە ەنگىزىلگەن جانە سىناقتان وتكىزىلىپ جاتىر»، - دەلىنگەن حابارلامادا.

رەسمي اقپاراتقا سەنسەك، بۇل زاۋىتتا كوروناۆيرۋسقا قارسى ۆاكتسينادان بولەك، پاندەميالىق تۇماۋعا، تۋبەركۋلەزگە، برۋتسەلەزگە، تۇيىندىك دەرماتيتكە، ۇساق جاندىكتەردەگى وباعا، قوي مەن ەشكىنىڭ جۇقپالى ەكتيماسىنا، قۇتىرۋعا جانە باسقا دا جۇقپالى اۋرۋلارعا قارسى ۆاكتسينالار ازىرلەنەدى.

قۇرىلىس 2020 جىلدىڭ جەلتوقسانىنا دەيىن اياقتالادى دەپ جوسپارلانعان ەكەن. زاۋىتتىڭ اۋقىمى جىلىنا بيوفارماتسەۆتيكالىق ونىمدەردىڭ 60 ملن دوزاسىن وندىرەدى دەپ كورسەتىلگەن.

ەستەرىڭىزگە سالا كەتەيىك، 11 شىلدە كۇنى مەملەكەت باسشىسى ۇكىمەتتىڭ كەڭەيتىلگەن وتىرىسىنا قاتىسىپ، ەلدەگى ۋشىعىپ كەتكەن ەپيدەميولوگيالىق جاعدايدى رەتتەۋ ءۇشىن ۇكىمەتكە 2 اپتا ۋاقىت بەرگەن ەدى.

سول جيىندا پرەزيدەنت توقاەۆ: «قازاقستاندا ءدارى-دارمەكتەر مەن مەديتسينالىق بۇيىمداردى ءوزىمىز شىعاراتىن ۋاقىت كەلدى. ءبىز قاشانعى شەتەلدەن يمپورتتالاتىن دارىلەرگە تاۋەلدى بولامىز؟ نامىس قايدا؟»، - دەپ سىناعان ەدى.

ال مامىر ايىندا وسى جامبىل وبلىسىنداعى زاۋىتتىڭ قۇرىلىسىنا جانە جوبالىق قۇجاتتاردى ازىرلەۋگە دەپ ۇكىمەتتىڭ رەزەرۆىنەن 685,8 ميلليون تەڭگە بولىنەتىنى تۋرالى اقپارات شىققان.

بۇل تۋرالى «ەgov» پورتالىندا ۇكىمەتتىڭ ارنايى قاۋلىسى دا شىققان. وندا جاڭاعى زاۋىت قۇرىلىسى مەن قۇجاتتارىنا دەگەن 685,8 ميلليون تەڭگە جامبىل وبلىسىنىڭ اكىمدىگىنە بەرىلەتىنى جازىلعان.

Abai.kz