شىمكەنت قالاسى دەنساۋلىق ساقتاۋ باسقارماسىنىڭ  بۇرىنعى باسشىسى مەن قالالىق №1 كلينيكالىق اۋرۋحانانىڭ باس دارىگەرىنىڭ ۇستىنەن بيۋدجەتتىڭ 52 ميلليون تەڭگەسىن جىمقىرۋ فاكتىسى بويىنشا قىلمىستىق ءىس قوزعالدى. بۇل تۋرالى سىبايلاس جەمقورلىققا قارسى كۇرەس اگەنتتىگى حابارلاعان.

«شىمكەنت قالالىق سىبايلاس جەمقورلىققا قارسى كۇرەس اگەنتتىگى شىمكەنت قالاسى دەنساۋلىق ساقتاۋ باسقارماسىنىڭ بۇرىنعى باسشىسى مەن قالالىق №1 كلينيكالىق اۋرۋحانانىڭ باس دارىگەرىنە قاتىستى سوتقا دەيىنگى تەرگەۋ امالدارىن جۇرگىزىپ جاتىر. ولار S-كلاسستى وتورينولارينگولوگ دارىگەردىڭ جۇمىس ورنىنا دەپ ساتىپ الىناتىن جابدىقتاردىڭ قۇنىن كوتەرۋ ارقىلى بيۋدجەتتىڭ 52 ميلليون تەڭگە قارجىسىن جىمقىردى دەگەن كۇدىككە ىلىنگەن.

وزگە اقپاراتتار قر قپك 201 بابىنا سايكەس، تەرگەۋ مۇددەسى ءۇشىن جاريا ەتىلمەيدى»، - دەلىنگەن رەسمي حابارلامادا.

ەستەرىڭىزگە سالا كەتەيىك، شىمكەنت قالاسى دەنساۋلىق ساقتاۋ باسقارماسىنىڭ بۇرىنعى باسشىسى رۋستام الباەۆ 14 شىلدە كۇنى ءوز ەركىمەن قىزمەتىنەن كەتكەنى بەلگىلى بولعان. ول بۇل قىزمەتتە تۇپ-تۋرا 3 اي ۋاقىت جۇمىس ىستەگەن (14 ساۋىردەن 14 شىلدەگە دەيىن...).

Abai.kz