كەشەگى كۇننىڭ جەلىدەگى «جۇلدىزدارى» قىزىلوردا وبلىسىنىڭ تۇرعىنى ساندۋعاش تۇرلىبەكوۆا مەن وبلىس اكىمى گۇلشارا ابدىقالىقوۆا بولدى.

قىزىلوردا وبلىسىنىڭ جاعاقورعان اۋدانىنا جۇمىس ساپارىمەن بارعان وبلىس اكىمىنە، دالىرەك ايتساق، «اكىم كەلەدى» دەپ الەك بولعان جەرگىلىكتى باسشىلاردىڭ الاشاپقىن ارەكەتىنە نارازى تۇرعىننىڭ بەينە جازباسى تارادى. ساندۋعاش تۇرلىبەكوۆا ەسىمدى ايەل: «ءسىز حاننىڭ قىزىسىز با؟ جولدى نەگە جاپتىراسىز»، دەپ نارازىلىق بىلدىرگەن ەدى. وبلىس اكىمى مەن اۋدان تۇرعىنىنىڭ اراسىنداعى از-كەم اڭگىمەنى كەشە جازدىق. ساندۋعاش تۇرلىبەكوۆانىڭ سول ۆيدەوسى قوعامدا قىزۋ تالقى بولدى. جۇزدەگەن، ءتىپتى مىڭداعان پىكىرلەر ايتىلىپ، جازىلىپ جاتتى.

وسىدان سوڭ، قوعامدىق پىكىرگە، تۇرعىن نارازىلىعىنگا وبلىس اكىمى لەزدە جاۋاپ بەرىپ، ۆيدەو مالىمدەمە جاسادى. ءوزى دە، اۋدان باسشىلىعى دا جولدى جابۋ تۋرالى تاپسىرما بەرمەگەنىن، كىنالى ۋچاسكەلىك پوليتسەي ەكەنىن ايتتى. الايدا، الەۋمەتتىك جەلى قولدانۋشىلارى وبلىس اكىمىن سىننىڭ استىنا الىپ جاتىر. اراشا ءتۇسىپ جاتقاندار دا جوق ەمەس. Facebوok جەلىسىندە باقىتجان ومار ەسىمدى ازامات وبلىس اكىمىنىڭ بەينە-مالىمدەمەسىن جاريالاپتى. ونىڭ استىنا 130-دان اسا پىكىر تۇسكەن ەكەن. سول كوپ پىكىرشىنىڭ ءبىرى – سۇلتان ماقاشوۆ.

ايتا كەتەيىك، ماقاشوۆ سۇلتان ىسقاقۇلى جاڭاقورعان اۋدانىنىڭ اكىمى. ول بۇل قىزمەتكە 2019 جىلدىڭ تامىز ايىندا تاعايىندالعان ەكەن. بۇعان دەيىن قىزىلوردا وبلىسىنىڭ قارماقشى اۋدانىندا اكىم، قازالى اۋدانىندا اكىمنىڭ ورىنباسارى قىزمەتتەرىن اتقارعان.

اۋدان اكىمىنىڭ الەۋمەتتىك جەلىدەگى پىكىرىن، ءۇتىر-نۇكتەسىنە دەيىن وزگەرتپەي، قاز-قالپىندا جاريالاعاندى ءجون كوردىك.

«ايماق باسشىسىن قاۋىپسىز جولعا شىعارىپ جىبەرە الماساق، ءبىز كىم بولعانىمىز؟»

سۇلتان ماقاشوۆ، جاڭاقورعان اۋدانىنىڭ اكىمى:

- سالاماتسىزدار ما. جوعارىداعى تۋىنداعان ماسەلەگە بايلانىستى تۇسىنىكتەمە

1.بىرىنشىدەن وبلىس اكىمى ءاردايىم اۋدانعا ساپارى كەزىندە، ماعان ارتىقشىلىق جاساپ، تۇرعىنداردىڭ ءجۇرىس تۇرىسىنا كەدەرگى كەلتىرمەيىك، جولدار جابىلماسىن دەپ ۇنەمى تاپسىرىپ ءجۇر. سول سەبەپتى رەسپۋبليكالىق ماڭىزداعى جولمەن ىلەسىپ جۇرگەن جول پاترۋلدىك اۆتوكولىكتى دە ەلدى مەكەن شەكاراسىنان تىسقا قالدىرىپ كەتەدى.

2.وبلىس اكىمى مارشرۋتتارى بويىندا مەنىڭ نەمەسە اۋدان اكىمىنىڭ اپپاراتىنان كوشەلەردى جابۋ تۋرالى پوليتسياعا تاپسىرما بەرىلگەن جوق. كوشەلەردە كولىكتەرمەن قاتارلاسىپ جول ەرەجەلەرىنە سايكەس ءجۇردى. مەن وبلىس باسشىسىمەن بىرگە اۋداندىق اۋرۋحانا الدىنداعى جالپى تۇراققا توقتادىق. اۋرۋحانا ىشىندە جۇرگەن ساتتە، سول اۋماقتىڭ ۋچاسكە ينسپەكتورى، اۋرۋحاناعا جاقىن كوشە قيىلىسىندا قوعامدىق گازەل اۆتوكولىگىن توقتاتقان، كوشە جابىق ەمەس، باسقا كولىكتەر ءجۇرىپ جاتىر. سول ساتتە پوليتسيا ءبولىمى باسشىسىنىڭ ورىنباسارى، ۋچاسكە ينسپەكتورىنا كولىكتى نەگە توقتاتاسىڭ، قوزعالىستى توقتاتپاڭدار دەپ راتسيا ارقىلى تاپسىرما بەرگەن، بىراق ول تاپسىرما ورىندالماعان.

ءبىر جاعىنان، ينسپەكتوردىڭ ايتۋى بويىنشا، مەن وبلىس اكىمىنىڭ كولىگى اۋرۋحانا الدىنان قوزعالايىن دەپ تۇرعان سياقتى بولعاسىن، وتكىزىپ جىبەرگەنشە توقتاتا تۇرايىن، كەپتەلىس بولىپ قالار دەپ شەشتىم دەپ وتىر.

كوشە قوزعالىسىنىڭ قاۋىپسىزدىگى ولاردىڭ دا مىندەتى. ەشكىمگە جاسىرىن ەمەس، تال تۇستە ەرەجە بۇزىپ ۇيتقىپ جۇرگەن، جۇگەنسىز جۇرگىزۋشىلەر دە از ەمەس. وبلىس باسشىسىنىڭ قاۋىپسىز شىعىپ كەتۋىن ويلاعان شىعار. قالاي بولعاندا دا كوشەلەردىڭ جابىلماعانى انىق.

3.ۇشىنشىدەن ەكى ءۇش ايدا ءبىر كەلەتىن ايماق باسشىسىن، كوشەنى جاپپاساق تا، توقتاعان جەرىنەن قاۋىپسىز جولعا شىعارىپ جىبەرە الماساق ءبىزدىڭ كىم بولعانىمىز. ونسىز دا پوليتسيانىڭ كۇندەلىكتى سول قاۋىپسىزدىكتى قامتاماسىز ەتۋى كەرەك ەمەس پا.

بۇگىنگى قالىپتاسقان ەپيداقۋالعا بايلانىستى، اكىم پروۆيزورداعى ءار ناۋقاسپەن سويلەسىپ، جاعدايلارىن ءبىلىپ، اۋدانعا الىنىپ جاتقان قۇرىلعىلار مەن ءدارى دارمەكتەر تۋرالى حاباردار ەتىپ، ناۋقاستارعا قولداۋ بىلدىرۋگە كەلگەن ساپارىنا ساتتىلىك تىلەۋىمىز كەرەك، ەل قولداماسا، مۇمكىندىك بەرمەسە، تەك قالاي اياعىنان شالامىز دەسەك، ونىڭ بولاشاعىنا بالتا شابۋ، كەرىسىنشە كىشكەنە قولداۋ ءبىلدىرىپ، ءوزىنىڭ ويلارىن ىسكە اسىرۋ ءۋشىن، ەل بولىپ قولدايىق.

مەن ەلگە ادال قىزمەت ەتىپ ءجۇرمىن دەپ ويلايمىن, باسشىمىز دا بارلىعىنان وسى ادالدىقتى تالاپ ەتىپ وتىر. ەلدىڭ، باسشىنىڭ، پرەزيدەنتىمىزدىڭ تالابىنا سايكەس بولماسام، مەن وسى لاۋازىمداعى كرەسلوما جابىسىپ وتىرعانىم جوق.

پرەزيدەنت ايتقانداي، ءوز باسىڭنىڭ ەمەس، ەلدىڭ پايداسىنا شەشىم قابىلداۋعا ءار كەز دايىنمىن.

سوندىقتان، اعايىن بولعان نارسەگە تۇسىنىستىكپەن قاراۋلارىڭىزدى، ارتىق ايتقان بولسام، الدىن الا كەشىرىم سۇرايمىن.

(جەلىدەگى پىكىردىڭ سكرين نۇسقاسى)

Abai.kz