بەيسەنبى, 6 تامىز 2020
COVID-19 قازاقستاندا. جۇقتىرعاندار — 94882. جازىلعاندار — 67031. قايتىس بولعاندار — 1058
718 1 پىكىر 15 شىلدە, 2020 ساعات 14:27

«42 500 تەڭگەگە ءوتىنىشتى بۇل جولى ازاماتتاردىڭ ءوزى ەمەس، جۇمىس ورنى بەرۋى ءتيىس»

كوروناۆيرۋس ىندەتىنىڭ ورشۋىنە بايلانىستى ەكىنشى رەت ەنگىزىلگەن كارانتين كەزىندە تابىسسىز قالعاندار 17 شىلدەدەن باستاپ ءبىر رەت تولەنەتىن 42 500 تەڭگەگە ءوتىنىش بەرە الادى.

بىراق بۇل جولى ءوتىنىشتى ازاماتتاردىڭ ءوزى ەمەس، جۇمىس بەرۋشىلەر بەرەدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ حابارلادى.

ءمينيستردىڭ ايتۋىنشا، الداعى ەكى كۇندە الەۋمەتتىك جاردەماقىنى تولەۋدىڭ مەحانيزمدەرى پىسىقتالادى. نۇرىمبەتوۆ ءبارى ويداعىداي بولسا، بەيسەنبى، 16 شىلدە كۇنى جاردەماقىنى تاعايىنداۋ ەرەجەسى جاريالاناتىنىن، ازاماتتار جۇمادان باستاپ ءوتىنىش بەرە الاتىنىن ايتتى. قۇجاتتار دۇيسەنبى، 20 شىلدەدەن باستاپ قارالادى.

بۇل جولى جاردەماقى الۋ ءۇشىن الەۋمەتتىك تولەم (بىرىڭعاي جيناق تولەم، جەكە كاسىپكەر رەتىندە سالىق) تولەۋ مىندەتتى ەمەس.

“42 500 تەڭگە توتەنشە جاعداي كەزىندەگى ەرەجە بويىنشا تابىسىنان ايىرىلعان ازاماتتارعا، ونىڭ ىشىندە، جالدامالى قىزمەتكەرلەر مەن ءوزىن-ءوزى جۇمىسپەن قامتىعان ازاماتتارعا بەرىلەدى” دەدى مينيستر.

نۇرىمبەتوۆ ەڭ تومەنگى جالاقى سانالاتىن 42 500 تەڭگەنىڭ از قاراجات ەكەنىن مويىندادى.

2 شىلدە كۇنى قازاقستاندا ەكىنشى رەت كارانتين شەكتەۋلەرى ەنگىزىلەتىنى بەلگىلى بولعاندا، ۆيتسە-پرەمەر ەرالى توعجانوۆ “[42500 تەڭگە] توتەنشە جاعداي رەجيمىمەن بايلانىستى بولدى. توتەنشە جاعداي رەجيمى توقتاتىلدى، ەندى ونى تولەۋگە ەشقانداي نەگىز جوق” دەگەن بولاتىن.

باستاپقىدا 5 شىلدەدەن باستاپ ەكى اپتاعا سوزىلاتىن كارانتين بۇگىن، 14 شىلدە كۇنى 2 تامىزعا دەيىن ۇزارتىلىپ، تولىق ءبىر ايدى قامتيتىن بولدى.

كارانتيننىڭ ۇزارتىلاتىنىن جاريا ەتكەن پرەمەر-مينيستر اسقار مامين توتەنشە جاعداي جاريالانباسا دا، شەكتەۋگە بايلانىستى قىزمەتى شەكتەلگەن ازاماتتارعا 42 500 تەڭگە كولەمىندەگى ءبىر رەتتىك كومەك بەرىلەتىنىن ايتتى.

Abai.kz

1 پىكىر