بيىلعى وقۋ جىلى اياقتالدى. ال، تۇلەكتەر ءۇشىن ەندى الدا كوپتەن كۇتكەن كەزەڭ اتتەستات الۋ سالتاناتى قالدى. ەلدەگى پاندەميا جاعدايىنا بايلانىستى ءداستۇرلى شارا بيىل وزگەشە وتكىزىلمەك. بۇل تۋرالى الماتى وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى ساۋلە قابيمولداەۆا «Jetisý Media» اقپاراتتىق الاڭىندا وتكەن ءباسپاسوز ءماسليحاتىندا بايانداپ بەردى.

«ماۋسىمنىڭ 3 مەن 4 ارالىعىندا اتتەستات سالتاناتتى تۇردە تابىستالادى. اتالمىش شارا اياسىندا سوڭعى قوڭىراۋ سوعىلادى. بۇل ءار مەكتەپ اۋماعىندا، اشىق الاڭدا سانيتارلىق نورمالار ساقتالا وتىرىپ جۇزەگە اساتىن بولادى. تۇلەكتەر مەكتەپ فورماسىندا، بەتپەردە كيىپ، اراقاشىقتىقتى ساقتاي وتىرىپ وسى سالتاناتتى وتكەرەدى. شارا ۇزاقتىعى 20 مينۋتتان اسپايدى. اتا-انالاردان باسقا بوگدە ادامدارعا قاتىسۋعا رۇقسات ەتىلمەيد»ى، – دەيدى ساۋلە نۇرحانقىزى.

الداعى تەستىلەۋ سىناعىنا دا قاۋىپسىزدىك شارالارى ءجىتى باقىلاۋدا. الماتى وبلىسىندا  ۇبت تاپسىراتىن 16 ورتالىق بار. بارلىق تەست وتكىزۋ ورىندارى تەپلوۆيزور، دەزينفەكتسيالىق توننەل جانە اياق كيىمدى زارارسىزداندىرۋعا ارنالعان كىلەمشەلەر، مەديتسينالىق پۋنكتەر، سانيتايزەرلەر، ماسكالارمەن قامتاماسىز ەتىلەدى. تۇلەكتەرگە سىناق ەمتيحانى 20 ماۋسىم – 5 شىلدە ارالىعىندا وتەدى.

بيىل جەتىسۋلىق 11 مىڭنان استام وقۋشى ۇبت تاپسىرۋعا ءوتىنىم بەرگەن. تەست تاپسىرۋ ءتارتىبى دە كۇشەيتىلىپ وتىر. تەستىلەۋگە كىرگىزۋ بارىسىندا تىيىم سالىنعان زاتپەن انىقتالعان تۇلەك سىناققا جىبەرىلمەسە، سىناق تاپسىرۋ ۇستىندە ۇستالعان تالاپكەردىڭ ناتيجەسى جويىلىپ، اعىمداعى جىلى سىناق تاپسىرۋ قۇقىعىنان ايىرىلاتىن بولادى. جالپى بيىل، كوروناۆيرۋس پاندەمياسى سالدارىنان ۇبت تاپسىرۋ قۇجاتتارى، ءداستۇرلى جولمەن قاتار ونلاين تارتىبىمەن دە قابىلدانعان.

بيىل الماتى وبلىسى بويىنشا 1177 وقۋشى «التىن بەلگى» يەگەرى، 851 «ۇزدىك اتتەستات» يەسى اتانىپ وتىر.  اعىمداعى جىلى 15256 وقۋشى التىن ۇياسىمەن قوشتاستى.

ال، ەلىمىزدە ۇبت-نى 131 مىڭنان استام تۇلەك تاپسىرادى. 150 وتكىزۋ ورنى بەلگىلەنگەن.

ايمان اسىل

Abai.kz