جەكسەنبى, 22 مامىر 2022
قوعام 5897 15 پىكىر 28 مامىر, 2020 ساعات 13:53

پرەزيدەنت ءدوپ باستى نەمەسە «جوعالعان بۋىننان» دات!

الدىمەن مەملەكەت باسشىسى كوتەرىپ وتىرعان «جوعالعان بۋىننىڭ» كىمدەر ەكەنىن انىقتاپ الايىق. الەم ادەبيەتىن ءتۇپ-تۇگەل ءسۇزىپ شىققان قاسىم-جومارت كەمەلۇلى العاش رەت ايگىلى ە.حەمينگۋەي، ە.م.رەمارك سىندى سۋرەتكەرلەردىڭ شىعارمالارىنا ارقاۋ بولعان وسىناۋ ۇعىمدى جايدان-جاي ايتپاعانى كامىل   

تاۋەلسىزدىككە قول جەتكەن ساتتە مەملەكەتتىك، اكىمشىلىك قىزمەتتە، سونداي-اق قوعامدىق سالالارداعى كادرلىق قۇرام بىرنەشە بۋىندى قاتار قامتىعان جاعداي تۋدى. ولار، ياعني بۇرىنعى كەڭەستىك كومسومول مەن پارتيا جەلىسىمەن ءجۇرىپ ءىرىلى-ۇساقتى مانساپ جاساپ ۇلگەرگەن ورتا جانە اعا بۋىن وكىلدەرى، ونان كەيىن ءدال سول جىلدارى جوو-لاردى ءبىتىرىپ، جاس مەملەكەتتى قۇرۋعا قاجەت بولعاندىقتان قىزمەتكە تارتىلعان جاس بۋىن ەدى. مىنەكي، سودان بەرى وتىز جىل وتكەندە ەلۋىڭىزدى ەرتتەپ ءمىنىپ قالعان «جوعالعان بۋىنىڭىز» وسىلار.

ەندى مۇنداي «كاتەگوريانىڭ» بۇگىنگى كۇن تارتىبىنە شىعۋىنىڭ سەبەبىنە كەلسەك، جۇمىستى جاڭا باستاعان كەزدە بۇلار «سەندەرگە ءالى ەرتە، جاسسىڭدار» دەيتىن ساناتقا جاتىپ، الدىڭعى شەپكە، جوعارىلاۋ لاۋازىمدارعا الگى ايتىلعان ورتا، اعا بۋىننىڭ وكىلدەرى شىققانى بەلگىلى، ول كەزدە مۇنداي ءتارتىپ تابيعي سانالىپ، ەشقانداي قايشىلىق تۋعىزبايتىن. قايتا، بىرنەشە بۋىن اراسىنداعى ۇيلەسىمدى ىسكەرلىك احۋال ورناپ، قىزمەتكە ەندى كىرىسكەن سول جاستار،  اعالارىنىڭ اقىل-كەڭەسىنە سۇيەنە وتىرىپ، تاۋەلسىزدىكتى نىعايتۋدىڭ اسا اۋقىمدى جۇگىن كوتەرە بىلگەن ناعىز قارا نارلارى بولا ءبىلدى. وسىنداي كوزجۇمبايلىق ەنتۋزيازممەن كەمەل كەلەشەككە انە-مىنە جەتەمىز دەپ جۇرگەندە وتىز جىلىڭىز سىرعىپ وتە شىعىپ، ەندىگى وزدەرى ورتادان دا اسىڭقىراپ، اعا بۋىنعا جەتىپ قالعانىن اڭعارماي دا قالعانداي. 

ءسويتىپ جۇرگەندە، وسى كەزەڭ ىشىندە ەلدىڭ ءىشىن بىلاي قويىپ، الىس-جاقىن شەت ەلدەردە، ءتىپتى مۇحيت اسىپ الەمدىك ءبىلىمدى ءسىڭىرىپ، التى تىلدە اعىپ تۇرعان جاڭا ءبىر جويقىن بۋىن پايدا بولىپتى. ەلدىڭ ەندىگى تاعدىرىن وسىلارعا تاپسىرۋ كەرەك دەگەن جاسامپاز وي-پىكىر تۋىپ، باستاپقىدا بەيرەسمي، ارتىنشا رەسمي ءتارتىپ ورناتىلا باستاعان. ال، الگى كومسومولدىڭ مىزعىماس مەكتەبىنەن ءوتىپ، ونىڭ قيتۇرقى كابينەتتىك ويىنىنىڭ قىر-سىرىن ابدەن قانىنا سىڭىرگەن باياعى اعا بۋىنىڭىز شالدىققا شەكتەۋ قويمايتىن پارلامەنتىڭىزدەن تارتا، ورتالىق ورگاندار مەن اكىمشىلىكتەرىڭىزدە جابىسقان كۇيىنەن جاقىن جىلدارى، انىعى، انا دۇنيەگە وتپەي ايرىلار ەمەس. 

وسىلايشا، ەكى ورتادا ەڭبەك جولىن تاۋەلسىزدىكپەن بىرگە باستاپ، تاڭنىڭ اتىسى، كۇننىڭ باتىسى قۇمىرسقاشا تىرلىك جاساپ، كوبىنەسە جالدامالى پاتەردە جابىرقاي جۇرسە دە جاسىماي ەلگە قىزمەت جاساپ، وتباسىن اسىراعان بۇتىندەي ءبىر «جوعالعان بۋىن» پايدا بولعانى – قازىرگى قوعامنىڭ شىندىعى. ال، بۇگىندە بارلىق سالانىڭ كادرلىق نەگىزىن قۇراپ تۇرعان وسىناۋ ۇلكەن ستراتەگيالىق توپتىڭ توقىراۋشىلىق كوڭىل-كۇيگە تۇسۋىمەن تىعىز بايلانىستى مۇنداي تەرىس، ياعني ەلدىككە، قوعامعا، بولاشاققا، جالپى دامۋعا اسا زيان احۋال ەلىمىزدىڭ ءارتۇرلى قۇرىلىمدارى قاتارىندا سىرتقى ساياسات، شەتەلدەگى  ديپلوماتيالىق كورپۋس سالاسىنا دا ءتان ەكەندىگى جاسىرىن ەمەس.     

سوندىقتان مەملەكەت باسشىسى تەرەڭ ماڭىز بەرىپ، جاڭا ساپالى دەڭگەيدەگى اپپارات قۇرۋ ءۇشىن پرەزيدەنت اكىمشىلىگىنەن باستاپ بارلىق ءتيىستى ورگاندارعا تاپسىرىپ وتىرعانىنداي، «ءار سالادا روتاتسيا بولۋىن، كارلەردى جاڭالاۋ، كاسىبي دايىندىعى بار، پاتريوتتىق سەزىمى باسىم، جۇيكەسى توزباعان»، بۇعان ءبىزدىڭ قوسارىمىز، حالىقپەن ادامشا قازاق تىلىندە اۋدارماشىسىز سويلەسە بىلەتىن ادامداردى، اسىرەسە ورتا بۋىن وكىلدەرىن تارتىپ، مەملەكەتتىك بيلىك جۇيەسىندە تۇپكىلىكتى روتاتسيا جاساۋ - ەلىمىزدى وركەنيەت جولىمەن دامىتۋدىڭ، حالىقارالىق مارتەبەسىنىڭ ارتۋىنىڭ بىردەن-ءبىر بالاماسىز اقيقات جولى. 

مۇحتار كارىباي

Abai.kz

15 پىكىر