اقش مەملەكەتتىك حاتشىسى مايك پومپەونىڭ مالىمدەۋىنشە، قىتاي بيلىگى COVID-19 ۆيرۋسىنىڭ قاۋىپتى ەكەنىن الەمنەن جاسىرۋ ءۇشىن بار كۇشىن سالدى. مەملەكەت حاتشى مالىمدەمەسىن ABC News تەلەارناسى جەكسەنبى كۇنى كورسەتتى.

قىتاي كوروناۆيرۋس ىندەتىنىڭ تارالۋىن ادەيى جاسىرعانىن 3 مامىردا "دەيلي تەلەگراف" باسىلىمى حابارلاعان. لوندوندىق باسىلىم باتىس ەلدەرىنىڭ ارنايى قىزمەتتەرىنىڭ 15 بەتتىك بايانداماسىنا سۇيەندى. باياندامانى دايىنداۋعا اقش، ۇلىبريتانيا، كانادا، اۆستراليا جانە جاڭا زەلانديا ماماندارى قاتىسقان.

قىتاي ۇكىمەتى دارىگەرلەردى كوروناۆيرۋس تۋرالى ەشكىمگە ايتپاۋعا ماجبۇرلەگەن، شەتەل ماماندارىنا بيوماتەريال بەرۋدەن باس تارتقان، وسى ارەكەتتەرى ارقىلى كوروناۆيرۋستىڭ قاۋىپتى ەكەنىن الەم ەلدەرىنەن جاسىرعان. مالىمەت قۇپيا ساقتالماسا، الەم ماماندارى ۆاكتسينا دايىنداۋعا ەرتەرەك كىرىسەر ەدى، دەلىنگەن باياندامادا.

زەرتتەۋ اۆتورلارىنىڭ پىكىرىنشە، 2019 جىلى جەلتوقساننىڭ باسىندا قىتاي بيلىگى ۆيرۋستىڭ ادامنان ادامعا جۇعاتىنىن بىلگەن. دەگەنمەن بۇل مالىمەتتى ولار 20 قاڭتارعا دەيىن جوققا شىعارىپ كەلدى، دەيدى ارنايى قىزمەت وكىلدەرى. بايانداما اۆتورلارىنىڭ مالىمدەۋىنشە، 3 قاڭتاردا قىتاي ۇلتتىق دەنساۋلىق ساقتاۋ كوميتەتى كوروناۆيرۋس ۇلگىلەرىن جويۋدى تاپسىرىپ، جاڭا جۇقپالى اۋرۋ تۋرالى مالىمەت جاريالاۋعا تىيىم سالعان.

باتىس بارلاۋشىلارى اليانسىنا كىرەتىن ارنايى قىزمەتتەر ۆيرۋستىڭ قايدان شىققانىنا قاتىستى ماسەلە بويىنشا كەلىسە الماي وتىر. اۆستراليالىق بارلاۋشىلار ۆيرۋس ۋحان قالاسىنىڭ بازارىنان تارالعان دەپ ەسەپتەيدى. قىتايدىڭ رەسمي ۇستانىمى دا وسىنداي. دەگەنمەن قۇرامىنا 17 ارنايى قىزمەت كىرەتىن امەريكالىق بارلاۋ قاۋىمداستىعى تۇپكىلىكتى بولجامىن ءالى جاريالامادى، دەپ جازدى "دەيلي تەلەگراف".

Abai.kz