بولات اتاباەۆتىڭ قازاقتاعى وزىندىك قولتاڭباسى بار رەفورماتور-رەجيسسەر ەكەنىن تەاتر سالاسىنداعى ونەرگە قاتىسى بار ادامدار وتە جاقسى بىلەدى. ونەردىڭ ناعىز جاناشىرى ەكەندىگى ءوز الدىنا، بولات اعانىڭ ۇستانىمىنان اينىمايتىن، كوزقاراسىن اشىق ءبىلدىرىپ، پىكىرىن قايمىقپاي ايتاتىن ءبىرسوزدى ادام ەكەندىگى كۇنى كەشەگى جاڭاوزەندەگى وقيعادا ەڭ ءبىرىنشى ءۇن قاتقانىنان كورىنگەن. ول حالىققا قارسى وق اتىلعاندارعا اراشا ءتۇسىپ، بولاشاعىمىز ءۇشىن الاڭداي ءبىلدى. تەاترمەن «اۋىرعان»، ونەر ءۇشىن جانىن بەرەءتىن شىعارماشىلىق ادامىنىڭ ساياساتتا نەسى بار ەدى دەرسىز، بالكىم!؟

قوعامداعى تەڭسىزدىك اششى ءتىلىن، ازاماتتىق ءۇنىن شىعاردى. ادىلەتسىزدىگى باسىمداۋ قوعامدا ءومىر ءسۇرىپ جاتقان ادام رەتىندە بولات اعا دا ءوزىنىڭ وي-پىكىرىن بىلدىرۋگە قاقىسى بار، ايىبى – سول عانا. ەرەگەسسە ەل ءۇشىن، ايتىسسا، اقيقات ءۇشىن ارپالىستى. ول كىسى بىزدەگى تالاي اكتەرلەردىڭ ونەردە باعىن اشقان، مەنىڭ دە ناعىز اكتەر بولىپ قالىپتاسۋىما ۇلكەن ەڭبەگىن سىڭىرگەن. ال اقيقاتى – دارىندى رەجيسسەردىڭ ءوز كوزقاراسىن بىلدىرگەنى ءۇشىن عانا قۋدالاۋعا ۇشىراعانىنان تەاتر ونەرى اقسادى، تەاتر سالاسىنا قيانات جاسالدى!

بولات اعانىڭ ءبىر عانا ەل استاناسىنىڭ ارقا توسىنە قونىس اۋدارىپ، ەلوردامىز استانا اتانعان تۇستا قويعان «ابىلاي حان» سپەكتاكلى كوپتىڭ كوڭىلىندە قالعانىن، بار قازاقتى تاڭعالدىرعانىن ونەرگە جەڭىل-جەلپى قارايتىندار وپ-وڭاي ەستەن شىعارعانىمەن، رەجيسسەر ەڭبەگىن شىنايى باعالاعاندار ءالى ۇمىتقان جوق. ابىز ءابىش تە (كەكىلباەۆ), ەلباسىمىز نۇرسۇلتان نازارباەۆ تا اتاباەۆتىڭ وسى ەڭبەگىن باعالاپ، ريزاشىلىعىن بىلدىرگەن سول كەزدە. كەشەگى وتكەن ابىلاي حانمەن بايلانىستىرىپ سونداي تىڭ دۇنيە ءارى ۇمىتىلمايتىن عاجاپ قويىلىم جاساعان بولات اعانىڭ ويىنداعىسىن اشىق ايتقانى ءۇشىن عانا شەتكە كەتكەنى، نەمىس تەاترىندا جۇمىس ىستەۋگە ءماجبۇر بولعانى – (ۇعاتىندارعا) ۇلتتىعىمىزعا سىن.

بولات اعا جايلى دا «ءومىر ەستەلىگىمەن قىمبات» اتتى تۇراقتى تۇردە وقىرمانعا ۇسىنىلىپ جۇرگەن جيناعىما جازىلعانىمەن ءالى جاريالانباعان ەدى. ءدال بۇگىنگى كۇنى اعانىڭ دەنساۋلىعى سىر بەرىپ، اۋىر حالدە اۋرۋحانادا جاتقانىن ەستي سالا شامامىز جەتكەنىنشە قارجى جيناۋدى باستادىق. ءوزىن باتىل ءھام ءور مىنەزىمەن عانا تانىتقان ابزال جاننىڭ ەشكىمنەن وسى ۋاقىتقا دەيىن كومەك سۇراماعانى دا نامىستى ازامات ەكەنىن كورسەتتى. سول سەبەپتى قازاقتىڭ جاناشىر قالتالى ازاماتتارى دا ءبىزدىڭ ءبىر جاعىمىزعا شىقسا ەكەن، كومەكتەسسە ەكەن دەگەن ءوتىنىشىم بار. ويتكەنى تەاتر سالاسىنا بەرگەنىنەن بەرەرى تاۋسىلماعان بولات اعانى ەندىگى جەردە ءوزى از قازاققا كەرەكسىز دەۋگە بولمايدى. جۇدىرىقتاي جۇمىلىپ بار ەكەنىمىزدى، ەل ەكەنىمىزدى، مەيىرىمنەن ادا قالماعان قازاق ەكەنىمىزدى كورسەتەيىكشى، اعايىن!

P.S.بولات اتاباەۆقا قارجىلاي كومەكتەسۋ جولدارى اۆتوردىڭ الەۋمەتتىك جەلىدەگى پاراقشاسىندا كورسەتىلگەن

بەكجان تۇرىس 

Abai.kz