سەيسەنبى, 9 ناۋرىز 2021
46 - ءسوز 2221 2 پىكىر 29 قاڭتار, 2020 ساعات 13:51

ءال-فارابي جىلىندا ءانۋار اعا ۇمىت قالماسىن

بۇگىن «الەمنىڭ ەكىنشى ۇستازى» اتانعان ءابۋ ناسىر ءال-فارابي بابامىزدىڭ 1150 جىلدىعىن اتاپ وتۋگە قاتىستى ءىس-شارالاردىڭ شىمىلدىعى ءتۇرىلدى. قازۇۋ قالاشىعىنداعى ستۋدەنتتەر سارايىندا ءوتىپ جاتقان جيىن جىل بويى اتقارىلار رۋحاني يگىلىكتى ىستەردىڭ باستاۋى دەپ بىلەمىز.

وسى رەتتە ويىڭا ءانۋار اعا ءالىمجانوۆ ورالادى: تۋعان جۇرتىنان شالعايعا كەتىپ، داڭقى شىققان باباسىن جۋسان ءيىسى بۇرقىراعان دالاسىنا «الىپ كەلگەن» اناعاڭ...

1973 جىلى الماتىدا وتكەن ازيا-افريكا جازۋشىلارىنىڭ كونفەرەنتسياسىندا ۇلى عۇلامانىڭ ەسىمىن ۇلىقتاپ، ۇلكەن جيىن جاساعان دا سول ءانۋار اعا بولىپتى.

بابا بەينەسىن قاعازعا تۇسىرتكەن دە انەكەڭ ەكەن. عابباس قابىشۇلى جازادى، بىلاي دەپ:

«1967 جىلى بولار، شەت ەلدەرگە كەزەكتى ءبىر ساپارىندا قاراشي قالاسىنا ات باسىن تىرەگەن ءانۋاردى پاكىستاننىڭ كورنەكتى سۋرەتشىسى سالىح ايىن ورتالىق بانك عيماراتىنداعى سۋرەتتەر گالەرەياسىنا الىپ بارىپتى. ىشكى قابىرعاعا مايلى بوياۋمەن سالىنعان كونە سۋرەتتەر اراسىندا قازاقى رەڭدى ءبىر كىسىنىڭ دومبىرا ۇستاپ تۇرعان سۋرەتىن كورە قالعان انەكەڭنىڭ: «بۇل كىم؟» دەگەنىنە سالىح: «بۇل - ءابۋ ناسىر مۇحاممەد ءال-فارابي. ءابۋ سينادان باستاپ بارلىق عۇلامالارىمىزدىڭ ەكىنشى ۇستازى. ءبىزدىڭ وسىندا ورنالاسقان كىتاپحانامىزدا اريستوتەلدىڭ، ەۆكليدتىڭ، پتولومەيدىڭ ەڭبەكتەرىنە جازعان تۇسىنىكتەرى، ءوزىنىڭ كوپتەگەن جازبالارى بار»، دەپ جاۋاپ قايىرىپتى. ءانۋاردىڭ سول ساتتە قانداي سەزىمگە بولەنگەنىن ويلاپ بايقاڭىزشى!.. ول سول سۋرەتتى ايىنعا كوشىرتىپ الىپ، ەلگە ورالىسىمەن قىلقالام شەبەرىمىز ىبىراەۆ بەككە تولىقتىرا ايتىپ وتىرىپ سالدىرىپ، بابامىزدىڭ بۇگىندە بىزگە قىمبات بەينەسىن العاش جاساتتى! فارابيتانۋدى نەگىزدەگەن عالىم ماشانوۆ اقجان اعامىزبەن قاناتتاسىپ، ءال-فارابي ەڭبەكتەرىنىڭ ناسيحاتتالۋىنا كوپ كۇش جۇمسادى».

وسىنداي ۇلان اسار مەرەكەدە «ۇستازدىڭ ورالۋى» اتتى رومان جازىپ، ۇلى باباسىن ۇلىقتاپ وتكەن ءانۋار ءالىمجانوۆ ۇمىت قالسا، ۇيات بولادى.

ءتيىستى ورىنداعى ازاماتتار ويلاناتىن شىعار دەگەن سەنىمدەمىن.

داۋرەن قۋاتتىڭ الەۋمەتتىك جەلىدەگى جازباسىنان

Abai.kz

2 پىكىر