ۋكراينالىق Boeing 737 ۇشاعى تەگەران اۋەجايى ماڭىندا اپاتقا ۇشىرادى، - دەپ حابارلايدى ريا نوۆوستي.

لاينەردىڭ "تەحنيكالىق اقاۋعا" بايلانىستى يمام حومەيني اتىنداعى حالىقارالىق اۋەجايى ماڭىندا اپاتقا ۇشىراعانى ايتىلعان. بۇل اقپاراتتى اۋەجاي باسشىسى دا راستادى. ول ۇشاقتىڭ اۋەجايدان ۇشىپ شىققان بويدا اپاتقا ۇشىراعانىن مالىمدەدى. لاينەردە 180 جولاۋشى بولعان.

سوڭعى اقپاراتتارعا سايكەس، اپاتقا ۇشىراعان ۋكراينالىق لاينەردىڭ بورتىندا بولعان بارلىق ادام قازا تاپتى. ۇشاق "ۋكراينا حالىقارالىق اۋە جولدارى" اۋەكومپانياسىنا تيەسىلى.

ال، يراننىڭ شۇعىل مەديتسينالىق كومەك كورسەتۋ قىزمەتىنىڭ باسشىسى پيرحوسسەين كۋليۆاند كۋليۆاند IRINN مەملەكەتتىك اقپارات اگەنتتىگىنە بەرگەن سۇحباتىندا اپات بولعان ايماققا جەدەل جاردەم بريگادالارى جىبەرىلگەنىن، الايدا ولار زارداپ شەككەندەرگە جاقىنداي الماعانىن، ويتكەنى وندا ۇشاق بولشەكتەرى جانىپ جاتقانىن حابارلاعان.

ۇشاق اپاتىنا بايلانىستى ۋكراينا پرەزيدەنتى ۆلاديمير زەلەنسكي الەۋمەتتىك جەلىدەگى پاراقشاسىندا پىكىر ءبىلدىردى.

"تاياۋ شىعىستان سۋىت حابار كەلدى. بۇگىن يمام حومەيني (تەگەران قالاسى) حالىقارالىق اۋەجايىنان ۇشقان "ۋكراينا حالىقارالىق اۋە جولى" اۋە كومپانياسىنىڭ جولاۋشىلار ۇشاعى اۋەجاي ماڭىندا اپاتقا ۇشىرادى. الدىن الا مالىمەت بويىنشا، بارلىق جولاۋشى مەن ەكيپاج مۇشەلەرى قازا تاپقان. ءبىزدىڭ ەلشىلىك بولعان وقيعا جايلى جانە قازا تاپقاندار تۋرالى مالىمەتتى انىقتاپ جاتىر. قازا تاپقانداردىڭ وتباسىنا قايعىرىپ كوڭىل ايتامىن", - دەپ جازدى زەلەنسكي Facebook جەلىسىندەگى پاراقشاسىندا. 

Abai.kz