«بەك ەير» كومپانياسىنىڭ باسشىسى نۇرلان جۇماسۇلتانوۆ الماتى ماڭىندا بولعان ۇشاق اپاتىنا قاتىستى بارلىق جاۋاپكەرشىلىكتى موينىنا الۋعا دايىن ەكەنىن ايتتى. بۇل تۋرالى كومپانيا باسشىسى بلوگەر دميتري دۋبوۆيتسكيگە بەرگەن سۇحباتىندا مالىمدەگەن.

- ۇشقىش اپاتتى جاعدايدى تۇزەي الدى. ەگەر اپاتقا كومپانيا كىنالى دەپ تانىلسا، مەن جىگىتتەرىمدى قولداۋسىز قالدىرمايمىن. ولار ءۇشىن ءوزىم وتىرىپ شىعۋعا دايىنمىن. مەنىڭ قول استىمداعى ادامداردىڭ ەشبىرى بۇل ءۇشىن تۇرمەگە وتىرمايدى.

ءبىز مارقۇم ۇشقىشتى كىنالامايمىز. ويتكەنى مەن ونىڭ ساۋاتتى باسقارعانىن كورىپ وتىرمىن. سوندىقتان ونىڭ باسشىلارىنا، ۇشقىشقا، ينجەنەرلىك قىزمەتكە دە كىنا ارتپايمىن. ەگەر بۇل اپاتقا بەك ەيردەن بىرەۋدى جازالاۋ كەرەك دەسە، مەن جازانى قابىلداۋعا دايىنمىن. سوندىقتان تۇرمەگە باسقانى ەمەس، مەنى وتىرعىزىڭىزدار! مەن وعان دايىنمىن، - دەدى نۇرلان جۇماسۇلتانوۆ.

ايتا كەتەيىك، 27-جەلتوقسان كۇنى الماتى ماڭىنداعى گۇلدالا اۋىلىنىڭ ىرگەسىندە «بەك ەير» كومپانياسىنا تيەسىلى ۇشاق اپاتقا ۇشىراعان بولاتىن. رەسمي مالىمەت بويىنشا، 12 ادام قازا تاپتى. 40-قا جۋىعى جاراقات الىپ، اۋرۋحانالارعا جەتكىزىلگەن. قازاقستان پرەزيدەنتىنىڭ شەشىمىمەن 28 جەلتوقسان جالپىۇلتتىق ازا تۇرۋ كۇنى دەپ جاريالاندى.

Abai.kz