2020 جىلى ەل كونستيتۋتسياسىنىڭ قابىلدانعانىنا جانە قازاقستان حالقى اسسامبلەياسىنىڭ قۇرىلعانىنا 25 جىل تولادى. سوعان وراي ۇكىمەت بىرقاتار مادەني ءىس-شارالار وتكىزۋدى جوسپارلاپ وتىر ەكەن. 

ۇكىمەت كونستيتۋتسيانىڭ جانە قازاقستان حالقى اسسامبلەياسىنىڭ 25 جىلدىعىن ۇيىمداستىرۋ جانە وتكىزۋ جونىندەگى ۇلتتىق جوسپاردى بەكىتتى.

اتالعان قۇجاتتا جازىلۋىنشا، بيلىك كونستيتۋتسيانىڭ 25 جىلدىعىنا ارنالعان مەرەكەلىك كونتسەرت پەن 2020 جىلعى تامىزدا ەلىمىزدىڭ اتا زاڭىنىڭ 25 جىلدىعىنا ارنالعان حالىقارالىق كونفەرەنتسيانى ۇيىمداستىرۋعا 504,8 ملن تەڭگە بولگەن. سونىمەن قاتار، قازاقستان حالقى اسسامبلەياسىنىڭ 25 جىلدىعىنا وراي كەلەسى جىلى ءساۋىر ايىندا وتەتىن كونتسەرتكە رەسپۋبليكالىق بيۋدجەتتەن 225,3 ملن تەڭگە بولىنگەن.

قازاقستان حالقى اسسامبلەياسىنىڭ 25 جىلدىعىن اتاپ ءوتۋ جايلى اتالعان ۇيىمنىڭ توراعاسى، ەكس-پرەزيدەنت نۇرسۇلتان نازارباەۆ ارنايى تاپسىرما بەرگەن. بۇل تۋرالى بيىل ءساۋىر ايىندا قحا توراعاسىنىڭ ورىنباسارى جانسەيىت تۇيمەباەۆتى قابىلداعاندا ايتقان.

– كەلەسى جىلى ءبىز قازاقستان حالقى اسسامبلەياسىنىڭ 25 جىلدىعىن اتاپ ءوتۋدى جوسپارلاپ وتىرمىز. اسسامبلەيانىڭ مەرەيتويىن ورتالىقتا دا، بارلىق وڭىردە دە جوعارى دەڭگەيدە وتكىزۋىمىز كەرەك. كەلىسىم، تۇراقتىلىق، حالىقتار دوستىعى، ءتۇرلى ەتنيكالىق توپتار، ءدىني كونفەسسيالار اراسىنداعى ءوزارا قۇرمەت مەملەكەتىمىزدىڭ جانە دامۋىمىزدىڭ نەگىزى سانالادى. بۇل جوسپارلانعان ءىس-شاراعا ارقاۋ بولۋعا ءتيىس، – دەگەن ەدى نۇرسۇلتان نازارباەۆ.

بۇل ءىس-شارالاردىڭ جاۋاپتى اتقارۋشىسى مادەنيەت جانە سپورت مينيسترلىگى.

ال قارجى ءمينيسترىنىڭ ءبىرىنشى ورىنباسارى بەرىك شولپانقۇلوۆتىڭ ايتۋىنشا، ەل ۇكىمەتى مادەنيەت پەن سپورتتى دامىتۋ ءۇشىن 2020-2022 جىلدارى 304,7 ملرد تەڭگە جۇمساۋ جوسپارلانىپ وتىر. ونىڭ 120,1 ملرد-ى 2020 جىلعا بولىنگەن. بۇل قاراجات تەاتر، مۋزەي، كىتاپحانا مەن ارحيۆتەر قىزمەتىن قامتاماسىز ەتۋگە، سپورت پەن ءتۋريزمدى دامىتۋعا، كادرلار دايىنداۋعا، فيلمدەر شىعارۋعا جۇمسالادى ەكەن.