سارسەنبى, 29 قاڭتار 2020
758 1 پىكىر 25 قىركۇيەك, 2019 ساعات 12:34

"سينوپەك قازاقستان" جۇمىسشىلارى جالاقى ءوسىرۋدى تالاپ ەتتى

«سينوپەك قازاقستان حالىقارالىق مۇناي قىزمەتى كومپانياسىنىڭ» اقتاۋ فيليالىنىڭ ونداعان جۇمىسشىسى جالاقى ءوسىرۋدى تالاپ ەتتى. ماڭعىستاۋ وبلىسىنداعى قاراقۇدىق مۇناي جانە سولتۇستىك بۇزاشى كەن ورنىنداعى ۇنعىمالاردى جوندەيتىن جۇمىسشىلار 23 قىركۇيەك كەشكە جۇمىستى توقتاتقان.

بۇل تۋرالى ازاتتىققا 24 قىركۇيەككە كومپانيا بۇرعىلاۋشىسىنىڭ كومەكشىسى جانىبەك ەلدەشوۆ ايتتى. ونىڭ سوزىنشە، جۇمىسشىلار جالاقىنى 100 پايىزعا ءوسىرۋدى تالاپ ەتىپ، 24 قىركۇيەكتە كومپانيانىڭ اقتاۋداعى كەڭسەسىنە بارعان.

ەلدەشوۆ جۇمىسشىلار بۇعان دەيىن تالاپتارىن حاتقا ءتۇسىرىپ، كومپانيا باسشىلىعىنا، «نۇر وتان» پارتياسىنىڭ وبلىستىق فيليالىنا جانە مۇناي كومپانيالارىنىڭ كاسىپوداعىنا تاپسىرعانىن ايتادى. ونىڭ ايتۋىنشا، حاتقا قاراقۇدىق مۇناي جانە سولتۇستىك بۇزاشى كەن ورنىنىڭ 150-دەن استام جۇمىسشىسى قول قويعان.

ەلدەشوۆتىڭ سوزىنشە، جۇمىسشىلاردىڭ تالاپ ايتقان نارازىلىعى 23 قىركۇيەك جەرگىلىكتى ۋاقىت بويىنشا 17.00-دە باستالعان. ول «وسى ۋاقىتتان باستاپ جۇمىسشىلار كەن ورنىنا بارعانىمەن ەشقانداي جۇمىس ىستەمەي وتىرعانىن» ايتادى.

«سينوپەك قازاقستان حالىقارالىق مۇناي قىزمەتى كومپانياسىنان» جانە ماڭعىستاۋ وبلىسى اكىمدىگىنەن وسى جايتقا بايلانىستى پىكىر الۋ مۇمكىن بولمادى. تەك ماعىستاۋ وبلىسى ەڭبەك دەپارتامەنتى باستىعىنىڭ ورىنباسارى شىڭعىس دۇيسەنوۆ «قازىر جۇمىسشىلار مەن كومپانيا اراسىندا كەلىسسوز ءجۇرىپ جاتقانىن» ايتتى. ول جۇمىسشىلاردان دەپارتامەنتكە بۇعان دەيىن جالاقى ماسەلەسىنە قاتىستى شاعىم تۇسكەنىن راستادى.

تەڭگە قۇنسىزدانىپ، ينفلياتسيا كۇشەيگەن تۇستا قازاقستاننىڭ باتىسىندا مۇنايشىلاردىڭ جالاقى ءوسىرۋدى تالاپ ەتكەن نارازىلىق شارالارى كوبەيدى. بۇعان دەيىن بولعان جۇمىسشىلار نارازىلىعىندا كومپانيالار جۇمىسشىلاردىڭ تالابىن ورىنداعان.

Abai.kz

1 پىكىر