سارسەنبى, 19 اقپان 2020
قۇلاقتىڭ اڭگىمەسى 7286 3 پىكىر 28 تامىز, 2018 ساعات 18:02

«جۇمباق سىيلىق» ءھام وزگەرگەن وتباسىلىق سۋرەت

رەسەيلىك رەجيسسەر سەرگەي كوماروۆتىڭ  “جۇمباق سىيلىق” (“زاگادوچنىي دار”) اتتى مەلودراماسى بار. ستسەناري اۆتورى – اركادي ينين. 2016 جىلى شىققان تۋىندى ەكەن.

ليزا ەسىمدى قىزدىڭ ماحاببات وقيعاسىمەن قاتار ونىڭ  ەرەكشە قاسيەتى تۋرالى باياندالادى. وسى فيلمدە ءبىزدىڭ نازارىمىزدى اۋدارعان ءبىر ەپيزود بولدى. ول – باس كەيىپكەر ليزانىڭ داۆلات اتتى اۋلا سىپىرۋشى جىگىتپەن بولعان اڭگىمەسى.

تاجىكستاننان كەلگەن جىگىت ليزاعا وتباسىلىق سۋرەتىن كورسەتەدى. زەر سالىپ قاراساڭىز ول قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ وتباسىمەن تۇسكەن سۋرەتى. بىراق، پرەزيدەنتتىڭ ورنىنا تاجىك شالدىڭ سۋرەتىن الماستىرعان. ال، اينالاسىندا وتىرعان سارا نازارباەۆا، تيمۋر قۇلىباەۆ باستاعان باسقا دا وتباسى مۇشەلەرىن كورۋگە بولادى.

داۆلات ول “وتباسىن” جەكە-جەكە تانىستىرادى.

ء“بىز نەگىزى ون ءبىر اعايىندىمىز. مىناۋ مەنىڭ ۇلكەن اپكەم فاتيما” دەپ سارا الپىسقىزىنىڭ سۋرەتىن كورسەتەدى. ال، مىنا كىشكەنتاي راحيم دەيدى، ول كىم ەكەنىن ناقتى بىلمەدىك. مىناۋ تاعى ءبىر اپكەم زۋلفيا دەيدى.

ليزانىڭ «اپكەڭ وتە ادەمى ەكەن» دەگەن سوزىنە:

– ەڭ ادەمىسى مىنا كىسى، – دەپ ەلباسىنىڭ ورنىنا وزگەرتىپ قويعان قاريانىڭ سۋرەتىن كورسەتەدى. – بابا راحيم. 92 جاستا. وعان ءالى كۇنگە قالىڭدىقتار كەلەدى. بىراق، اقشام جوق دەپ ۇيلەنبەي ءجۇر، – دەيدى.

وسى ەكى مينۋتتىق ەپيزود ءبىزدى ءبىراز ويعا قالدىردى.

ءبىزدىڭ تۇسىنبەگەنىمىز، فيلمگە نەگە ءدال وسى سۋرەت تاڭدالدى؟ رەجيسسەر بۇل ەپيزود ارقىلى نە ايتقىسى كەلدى؟ ءبىر ەلدىڭ پرەزيدەنتىن جانە وتباسىن تانىماي قالدى دەۋ قيسىنسىز. كەزدەيسوقتىق دەۋگە دە كەلمەيدى. ال، ونى وسىلاي پايدالانۋىنىڭ استارىندا نە جاتىر؟

مۇمكىن، كوماروۆتىڭ تاجىكتىڭ جوعارى ءبىلىمدى ازاماتىنا رەسەيدە جاي عانا اۋلا سىپىرتىپ قويۋى دا كەزدەيسوقتىق ەمەس شىعار. ءتىپتى، ليزانىڭ قۇربىسى سول تاجىك جىگىتپەن اڭگىمە اراسىندا «كەڭەس يمپەرياسى كەزىندە جاقسى ەدى، ءبارىمىز ءبىر وتباسىنداي بولدىق. قازىر عوي، ۇرلاپ كەتتى، ءولتىرىپ كەتتى دەگەن حابارلاردان كوز اشپايمىز» دەگەن سوزدەر ايتادى. ءيا، قاراپايىم عانا اۋلادا بولعان اڭگىمە. بىراق، استارىنا ۇڭىلسەڭىز، ءبىراز دۇنيەنى اڭعارۋعا بولاتىنداي...

ءبىزدىڭ بىلۋىمىزشە، كينو – يدەولوگيالىق قۇرال. رەجيسسەر كەيبىر اشىق ايتا المايتىن  دۇنيەلەرىن حالىققا كينو كەيىپكەرلەرىنىڭ تىلىمەن ايتقىزىپ جاتاتىن ساتتەرى بولادى. دەمەك، وسى ءبىر ءۇش ساعاتتىق تۋىندىنىڭ دا ايتار ويى، ارقالاعان مىندەتى بار بولۋعا ءتيىس.

بىراق، بۇل “جۇمباق سىيلىقتىڭ” استارىندا تاعى قانداي جۇمباقتار جاتقانىن باعامداۋدى سىزدەرگە قالدىردىق...

نۇربيكە بەكسۇلتانقىزى

Abai.kz

 

3 پىكىر