سوت زالىنا 13 ادام جەتكىزىلدى، ارنايى ەمدەۋ مەكەمەسىندەگى تاعى ءبىرى سوت پروتسەسىنە ەمدەۋ ورنىنان قوسىلاتىنى حابارلاندى.

سوت زالىنا سىيماعان بۇقارالىق اقپارات قۇرالدارى سوت پروتسەسىن باسقا بولمەدەن مونيتور ارقىلى كورەتىن بولدى.

سوتقا تارتىلعان 14 ادام قازاقستانعا سيريادان "جۋسان" وپەراتسياسى بويىنشا ورالعان. قازاقستان ارنايى قىزمەتى بيىل، 2019 جىلدىڭ باسىنان بەرى بىرنەشە رەت "جۋسان" وپەراتسياسىن ۇيىمداستىرىپ، سيرياداعى ونداعان قازاقستان ازاماتىن الىپ كەلگەن. ولاردىڭ كوپشىلىگى ايەلدەر مەن بالالار.

17 قازاندا قازاقستاننىڭ ۇلتتىق قاۋىپسىزدىك كوميتەتى سيريادا "يسلام مەملەكەتى" تەرروريستىك توبىنىڭ قۇرامىندا بولعان" 14 ادامدى تەرگەۋ اياقتالعانىن حابارلاعان. ولارعا "تەرروريستىك توپ ارەكەتىنە قاتىستى", "تەرروريزمدى ناسيحاتتادى" جانە وزگە دە اۋىر قىلمىستار بويىنشا ايىپ تاعىلعان.

"جۋسان" وپەراتسياسى بويىنشا سيريادان ورالعان بىرنەشە ادام وسىعان دەيىن سوتقا تارتىلىپ، بىرنەشە جىلعا سوتتالعان.

ۇقك-ءنىڭ دەرەگىنشە، "وزگە مەملەكەتتىك ورگاندارمەن جانە شەتەل سەرىكتەستەرىمەن بىرلەسىپ", "جۋسان" وپەراتسياسى (سيريادان قازاقستان ازاماتتارىن قايتارۋ) اياسىندا سيريادان 595 قازاقستان ازاماتى قايتارىلعان. ولاردىڭ 400-دەن استامى - بالالار.

2018 جىلى شىلدە ايىندا قازاقستاننىڭ ۇلتتىق قاۋىپسىزدىك كوميتەتى (ۇقك) ازاتتىققا سيريا مەن يراكتا سوعىس باستالعالى قازاقستاننىڭ 800-گە جۋىق ازاماتى تاياۋ شىعىسقا كەتكەنىن حابارلاعان.

Abai.kz