ەلوردادا نۇر-سۇلتان قالاسىندا قىزىلوردا وبلىسىنىڭ اۋىل شارۋاشىلىعى ونىمدەرىنىڭ جارمەڭكەسى ءوتتى، - دەپ حابارلايدى اباي-اقپارات.

جارمەڭكەگە سىر وڭىرىنەن 355 توننا ءونىم جەتكىزىلگەن. قىزىلوردالىق تاۋار وندىرۋشىلەرى 40-تان استام ءونىم ءتۇرىن، ونىڭ ىشىندە 100 توننا كۇرىش، 174 توننا قاۋىن، قاربىز، اسقاباق سىندى باقشا داقىلدارىن، 5 توننا ءسۇت ونىمدەرىن، 16 توننا بالىق، 45 توننا، كارتوپ، باستى پياز، قيار، قىزاناق، 3,5 توننا جەمىس، 10 توننا اس تۇزىن، 1,5 توننا قىزىلوردا كونفەتتەرىن ساۋدالادى.

– وبلىستىڭ اۋىل شارۋاشىلىعى سالاسى سوڭعى 5 جىلدا جوعارى كورسەتكىشتەردى كورسەتۋدە. وبلىستىڭ ىشكى جالپى ءونىمىنىڭ قۇرىلىمىنداعى اۋىل شارۋاشىلىعىنىڭ ۇلەسى 2,5 پايىزدان 3,7 پايىزعا ارتتى، اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيا 45,9 ەسەگە، ال تاماق ونىمدەرىن ءوندىرۋ 10,0 پايىزعا ءوستى. شارۋاشىلىق سۋبەكتىلەرىندە سوڭعى 5 جىلدا ەت ءوندىرۋ 73,9, ءسۇت 31,6 پايىزعا ارتتى، - دەدى قىزىلوردا وبلىسى اكىمىنىڭ ورىنباسارى باقىت جاقانوۆ.

ونىڭ سوزىنشە، اۋىل شارۋاشىلىعى داقىلدارى وتكەن جىلمەن سالىستىرعاندا 5,8 مىڭ گەكتارعا ارتىق ەگىلگەن. ەگىنگە وراق سالۋ جۇمىستارى 20 تامىزدان باستالدى. بۇگىنگى كۇنى 87,9 مىڭ گەكتار كۇرىشتىڭ 37247 گەكتارى ورىلدى. ونىڭ 29102 گەكتارى باستىرىلىپ، 143,8 مىڭ توننا ءونىم الىندى. ورتا ءونىم گەكتارىنا 49,4 تسەنتنەردى قۇرايدى.

– 2019 جىلى جالپى قۇنى 8 ملرد تەڭگەنى قۇرايتىن 16 ينۆەستيتسيالىق جوبا ىسكە اسىرىلۋدا. ۇستىمىزدەگى جىلدىڭ 1 تامىزىنا اۋىل شارۋاشىلىعى ونىمدەرىنىڭ ەكسپورتى 93,6 پايىزدى قۇرايدى. ونىڭ ىشىندە كۇرىش ەكسپورتى 84,9 پايىز بولسا، باقشا داقىلدارى 8 ەسەگە، كوكونىستەر 2,6 ەسەگە ارتتى. اعىمداعى جىلى يران يسلام رەسپۋبليكاسىنا 789 باس قوي جانە وزبەكستان مەملەكەتىنە 59 باس تۇيە، 250 باس ءىرى قارا، بىرىككەن اراب امىرلىكتەرىنە 950 باس قوي جونەلتىلدى. جىل سوڭىنا دەيىن يران مەملەكەتىنە 150 باس ءىرى قارا، ءباا-گە 1000 باس ءىرى قارا جانە 200 باس قوي، سونداي-اق باقشا داقىلدارىن ەكسپورتتاۋ جوسپارلانىپ وتىر، - وبلىس اكىمىنىڭ ورىنباسارى.

ايتا كەتەيىك، قىزىلوردا وبلىسىنداعى جيىن-تەرىن ماۋسىمى 5-ءشى قازانعا دەيىن تولىق تامامدالادى دەپ جوسپارلانۋدا.

Abai.kz