قىزىلوردا وبلىسىندا سۋ قويمالارىن سالۋ جانە سۋارمالى سۋدى ءتيىمدى پايدالانۋ بويىنشا اۋقىمدى جوبالار جۇزەگە اسىرىلادى، - دەپ حابارلايدى اباي-اقپارات.

ماسەلەن، يرريگاتسيالىق جانە درەناجدىق جەلىلەردى جەتىلدىرۋ ارقىلى سۋارمالى سۋدى 30 پروتسەنتكە دەيىن ۇنەمدەۋ كوزدەلگەن. اتالعان سالاعا جاۋاپتى ماماندار جەراستى سۋ كوزدەرىن پايدالانۋ، تامشىلاتىپ، جاڭبىرلاتىپ سۋارۋ ادىستەرىن قولدانۋ ەسەبىنەن سۋارمالى جەرلەردى 95 مىڭ گەكتارعا كوبەيتىپ، 300 مىڭعا جەتكىزۋدى جوسپارلاپ وتىر. سونىڭ ارقاسىندا اسىراۋشى سالانىڭ ءوندىرىس كولەمى 75 ملرد تەڭگەگە ۇلعايىپ، 4 مىڭعا جۋىق جاڭا جۇمىس ورنى اشىلماق.

– ورتاشا ەسەپپەن 240 مىڭ گەكتاردان استام سۋارمالى جەر بار دەپ ەسەپتەلەدى وبلىستا. ءبىز ورتاشا پايدالانىپ جۇرگەن 185 مىڭ گەكتاردىڭ شاماسىندا بولسا ەڭبەك ونىمدىلىگىن ۇلعايتۋعا بايلانىستى، بىزدەگى وبلىستا وندىرىلەتىن اۋىل شارۋاشىلىعى ونىمدەرىن ۇلعايتۋ، ونى ەكسپورتقا ۇلعايتۋ باعىتىندا بىزگە ەڭ ءبىرىنشى سۋارمالى جەرلەردى ۇلعايتۋ قاجەت، - دەيدى قىزىلوردا وبلىسى اۋىل شارۋاشىلىعى باسقارماسى باسشىسىنىڭ مىندەتىن اتقارۋشى سەيىلبەك نۇرىمبەتوۆ.

بۇدان بولەك، وڭىردە سۋارىلمايتىن ءشول-ەگىندى جەرلەردە مايلى جانە ازىقتىق داقىلدار ەگىسىن كەڭەيتۋ جوسپارلانۋدا. ول ءۇشىن عالىمداردىڭ يننوۆاتسيالىق جوبالارى پايدالانىلادى.

ايتا كەتەيىك، بيىل سىر وڭىرىندە 183 مىڭ گەكتار القاپقا ەگىن ەگىلدى. ونىڭ 88 مىڭ گەكتارى – كۇرىش.

Abai.kz