سەنبى, 8 تامىز 2020
COVID-19 قازاقستاندا. جۇقتىرعاندار — 96922. جازىلعاندار — 70680. قايتىس بولعاندار — 1058
2356 5 پىكىر 27 تامىز, 2019 ساعات 12:12

اقش رەسەيگە تاعى سانكتسيا سالدى

سكريپالداردىڭ ىسىنە بايلانىستى رەسەيگە قارسى امەريكالىق سانكتسيالاردىڭ ەكىنشى پاكەتى 26 تامىزدا كۇشىنە ەندى. قۇجاتقا اقش پرەزيدەنتى دونالد ترامپ تامىزدىڭ باسىندا قول قويعان.

جاڭا سانكتسيالار تۋرالى ەلدىڭ فەدەرالدىق رەەسترلەر سايتىنا جاريالانعان مالىمدەمەسىندە اقش حالىقارالىق قارجى ۇيىمدارىنان رەسەيگە نەسيە، قارجىلىق جانە تەحنيكالىق جاردەم بەرمەۋى كەرەكتىگىن تالاپ ەتكەن.

جاڭا سانكتسيالارعا سايكەس، اقش-تىڭ بارلىق بانكتەرى ورىس ۇكىمەتىنە ازىق-تۇلىك جانە باسقا اۋىل شارۋاشىلىعى ونىمدەرىن ساتىپ الۋدان باسقا ماقساتتار ءۇشىن نەسيە بەرە المايدى.

مۇنان بولەك امەريكالىق بانكتەر مەن جەكە ينۆەستورلاردىڭ باستاپقى نارىقتا رەسەي مەملەكەتتىك باعالى قاعازدارىن ساتىپ الۋعا تىيىم سالىنادى. بۇل تىيىم سانكتسيالار ەنگىزىلگەننەن كەيىن شىعارىلعان باعالى قاعازدارعا عانا تيەسىلى بولادى.

اقش «سكريپالداردىڭ ىسىنە» بايلانىستى رەسەيگە قارسى العاشقى سانكتسيالاردى وتكەن جىلى 22 تامىزدا ەنگىزگەن. ولار ۇلىبريتانيانىڭ ايماعىندا بۇرىنعى رەسەيلىك تىڭشى سەرگەي سكريپال مەن قىزى يۋليانىڭ ۋلانۋىنا بايلانىستى ەنگىزىلگەن. بۇل وقيعا اقش جانە ۇلىبريتانيا بيلىگى تارابىنان باسقا ولكەنىڭ اۋماعىندا بيولوگيالىق جانە حيميالىق قارۋ قولدانۋى رەتىندە باعالاعان.

سانكتسيالاردىڭ ءبىرىنشى كەزەڭىندە اقش-تىڭ ۇلتتىق قاۋىپسىزدىك كۇشىنە تيەسىلى تاۋارلاردى جانە تەحنولوگيالاردى، سول سەكىلدى ەلەكترونيكا، اۆياتسيا جانە مۇناي-گاز سالاسىندا قولداناتىن جابدىقتاردى رەسەيگە ەكسپورتتاۋعا تىيىم سالىنعان.

مۇنان بولەك امەريكالىق اۋەجايلاردىڭ رەسەيلىك اۋە كومپانيالارمەن جۇمىس ىستەۋىنە تىيىم سالۋ، رەسەيلىك بانكتەردى حالىقارالىق تولەم سيستەمالارىنان شىعارۋ جايى دا تالقىلانعان. بىراق بۇل يدەيالار جۇزەگە اسپادى.

Abai.kz

5 پىكىر