نۇر-سۇلتان قالاسىندا باقىتجان ءابدىرايىمنىڭ توراعالىعىمەن قر كاسىپوداقتار فەدەراتسياسى باس كەڭەسىنىڭ وتىرىسى ءوتتى.

وتىرىس بارىسىندا قركف توراعاسى «قازاقستان رەسپۋبليكاسى كاسىپوداقتار فەدەراتسياسىنىڭ 2018-2019 جىلدارعا ارنالعان جاڭعىرتۋ جول كارتاسى» بويىنشا اتقارىلعان جۇمىستار تۋرالى بايانداما وقىدى. بۇل قۇجاتتا الەۋمەتتىك ادىلەتتىلىكتى ناسيحاتتاۋ جانە ەڭبەككەرلەردىڭ قۇقىعىن قورعاۋ شارالارى نەگىزگە الىنعان.

«ەلباسى نۇرسۇلتان نازارباەۆ كاسىپوداقتار فەدەراتسياسى قازاقستاندىقتاردى ءتورتىنشى ونەركاسىپتىك رەۆوليۋتسيانىڭ جاڭا شارتتارىنا الەۋمەتتىك بەيىمدەۋ ءۇشىن قوزعاۋشى كۇش بولۋى تيىستىگىن اتاپ ءوتتى»، - دەدى ءوز سوزىندە ب. ءابدىرايىم.

وسى ورايدا فەدەراتسيا باسشىسى كاسىپوداقتار قىزمەتىندەگى وزەكتى ماسەلەلەرگە، سونىڭ ىشىندە ۇجىمدىق شارتتاردىڭ سانىن ارتتىرۋ، ەڭبەك داۋلارىن شەشۋ، ەڭبەك قاتىناستارىن زاڭداستىرۋ، جۇمىس ورىندارىن ساقتاۋ جانە قاۋىپسىز ەڭبەك شارتتارىن قالىپتاستىرۋ ماسەلەلەرىنە توقتالىپ ءوتتى. جول كارتاسىنىڭ باسىم باعىتتارى، سونىڭ ىشىندە حەۇ-نىڭ ستاندارتتارىن ناسيحاتتاۋ جانە كاسىپورىنداردا الەۋمەتتىك تۇراقتىلىقتى قامتاماسىز ەتۋ ماسەلەلەرى ايتىلدى.

سونداي-اق، قر پرەزيدەنتى قاسىم-جومارت توقاەۆتىڭ الەۋمەتتىك باستامالارىنىڭ وزەكتىلىگى جانە ءوز ۋاقىتىنا ساي ەكەندىگى، سونىمەن قاتار،  كاسىپوداقتاردىڭ باستى قۇندىلىقتارىمەن ۇيلەسىم تاباتىندىعى اتالىپ ءوتتى.

باس كەڭەستىڭ مۇشەلەرى ەلىمىزدە ورىن الىپ جاتقان الەۋمەتتىك-ەڭبەك رەفورمالارى ۋاقىت تالابى دەپ سانايدى. بۇل رەفورمالار كاسىپوداقتار قىزمەتىن جاڭعىرتۋ جانە ەڭبەك ادامىن قورعاۋداعى تيىمدىلىگىن ارتتىرۋ ءۇشىن باعىت-باعدار بولۋى ءتيىس. وسى رەتتە الەۋمەتتىك ارىپتەستىكتىڭ ەرەكشە ءرولى مەن ارىپتەستىكتى نىعايتۋ ماڭىزدىلىعى كورسەتىلدى.

باقىتجان ءابدىرايىم ايتىپ وتكەندەي، قر ۇكىمەتى، قركف جانە «اتامەكەن» ۇكپ اراسىنداعى 2018-2020 جىلدارعا ارنالعان باس كەلىسىم، سونىمەن قاتار، 21 سالالىق جانە 16 اۋماقتىق كەلىسىمدەر كاسىپوداقتاردىڭ ۇشجاقتى كوميسسيا، داعدارىسقا قارسى شتاب، قوعامدىق جانە ۇيلەستىرۋ كەڭەستەرىنىڭ وتىرىسىنا كەڭىنەن قاتىسۋىنا مۇمكىندىك بەردى.

ۇشجاقتى كوميسسيا اياسىندا مۇشە ۇيىمدار ءتيىستى سالالارداعى كاسىپوداق ۇيىمدارىنىڭ قىزمەتىن بىرىكتىرە الدى. الەۋمەتتىك ارىپتەستەرمەن ءوزارا  ىنتىماقتاستىقتىڭ ايقىن دالەلى - كاسىپوداقتار فەدەراتسياسىنا  مۇشە ۇيىمدار سانىنىڭ 18-دەن 23 سالالىق كاسىپوداقتارعا ارتۋى بولىپ تابىلادى. 40 مىڭ ەڭبەككەردى قامتيتىن 500-گە جۋىق باستاۋىش كاسىپوداق ۇيىمدارى قۇرىلدى.

قركف باس كەڭەسىنىڭ وتىرىسىندا كاسىپوداق مۇشەلەرىنىڭ سانى 45 مىڭعا جۋىق «QAZMED» مەديتسينا جانە ونىمەن ساباقتاس سالالار قىزمەتكەرلەرىنىڭ سالالىق كاسىپوداعى فەدەراتسيا قۇرامىنا قابىلداندى.

جۇمىس ناتيجەلەرىن قورىتا كەلە، باس كەڭەس مۇشەلەرى قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ماشبەكۇلى ساپارباەۆتىڭ الەۋمەتتىك ارىپتەستىك تاراپتارى اراسىندا ءوزارا ءتيىمدى بايلانىس جۇيەسىن قالىپتاستىرۋعا قوسقان ۇلەسىن جوعارى باعالاي وتىرىپ، «ۇزدىك الەۋمەتتىك ارىپتەس» بەلگىسىمەن ماراپاتتادى.

ايماقتىق دەڭگەيدەگى الەۋمەتتىك ارىپتەستىكتى دامىتۋعا قوسقان زور ۇلەستەرى ءۇشىن پاۆلودار وبلىسىنىڭ اكىمى بولات باقاۋوۆتى جانە اتىراۋ وبلىسىنىڭ اكىمى نۇرلان نوعاەۆتى وسى بەلگىمەن ماراپاتتاۋ تۋرالى شەشىم قابىلداندى.

وتىرىس سوڭىندا قركف باسشىسى باس كەڭەس مۇشەلەرىن كاسىپوداقتاردىڭ ىنتىماقتاستىعى مەن باستى قۇندىلىقتارىن كەڭىنەن ناسيحاتتاۋعا شاقىردى.

Abai.kz