قىزىلوردادا قىزمەتتىك اۆتوكولىكتەردى جۇمىس بابىنان تىس پايدالانۋ فاكتىلەرىنە كۋا بولساڭىز WhatsApp ارقىلى قۇزىرلى ورگانعا حابارلاۋعا بولادى.

بۇل تۋرالى قر مەملەكەتتىك قىزمەت ىستەرى اگەنتتىگىنىڭ قىزىلوردا وبلىسى بويىنشا دەپارتامەنتى باسشىسىنىڭ ورىنباسارى ب.بايحوجاەۆ بريفينگتە مالىمدەدى.

قىزمەتتىك اۆتوكولىكتەردىڭ ماقساتتى پايدالانىلۋىنا مونيتورينگ جۇرگىزۋ ءۇشىن دەپارتامەنت WhatsApp مەسسەندجەرىندە اككاۋنت (+77057872626) اشقان. تۇرعىندار قىزمەتتىك اۆتوكولىكتەردى جۇمىس بابىنان تىس پايدالانۋ دەرەكتەرىن ۆيدەوعا نەمەسە سۋرەتكە ءتۇسىرىپ دەپارتامەنتكە جولداي الادى.

دەپارتامەنت باسشىسىنىڭ ورىنباسارى بەرىكبول بايحوجاەۆتىڭ ايتۋىنشا «ادەپ كودەكسىنىڭ تالاپتارىنا سايكەس مەملەكەتتىك قىزمەتشىلەر وزىنە سەنىپ تاپسىرىلعان مەملەكەتتىك مەنشىكتى، ونىڭ ىشىندە اۆتوكولىك قۇرالدارىن ۇتىمدى، ءتيىمدى جانە تەك قىزمەتتىك ماقساتتا عانا پايدالانۋى ءتيىس. سونداي-اق، كەز-كەلگەن ازاماتتىڭ WhatsApp ارقىلى مەملەكەتتىك ۇيىمدارعا تيەسىلى اۆتوكولىكتىڭ جەكە ماقساتتا پايدالانىلعانى تۋرالى فاكتىلەردى دالەلدەرىمەن بىرگە جولداۋ مۇمكىندىگى بار».

ايتا كەتۋ كەرەك، جىل باسىنان بەرى قىزمەتتىك اۆتوكولىكتى قىزمەتتىك ماقساتتان تىس پايدالانعان 2 مەملەكەتتىك ورگاننىڭ باسشىسىنا ادەپ جونىندەگى كەڭەس شەشىمىمەن تارتىپتىك جازا قولدانىلعان.

Abai.kz