سەنبى, 24 قازان 2020
COVID-19 قازاقستاندا. جۇقتىرعاندار — 110250. جازىلعاندار — 105566. قايتىس بولعاندار — 1796
ءجون-اق 5268 22 پىكىر 1 تامىز, 2019 ساعات 11:29

قۇنى قالماعان "قۇرمەتتى ازامات" دەگەن اتاقتى بەرۋدى توقتاتۋ كەرەك

ويتكەنى بۇل اتاقتىڭ قۇنى ءتۇسىپ كەتتى. "جەر ساتۋشى" اتانعان اكىم دە، پاراقورلىعىنىڭ ءيسى مۇڭكىپ تۇرعانى ءۇشىن قىزمەتىنەن تۇسىرىلگەن سۋديا دا، ءتىپتى ءوڭىر باسشىسىنا "وڭدى" باتا بەرگەن دارىنسىز جۋرناليست تە، وبلىس اكىمىنە كانديداتتىق ديسسەرتاتسيا جازىپ بەرگەن عالىم دا "قۇرمەتتى ازامات" اتانعانىن جۇرت كۇلكى ەتىپ ايتىپ ءجۇر.

ء"بىر قىزىمنان ءبىر قىزىم سوراقى" دەگەندەي، جۋىردا بۇرىن سىبايلاس جەمقورلىق قىلمىسى ءۇشىن سوتتالىپ، تۇرمەدە بىرنەشە جىل وتىرىپ شىققان شەنەۋنىككە دە ءبىر اۋداننىڭ "قۇرمەتتى ازاماتى" اتاعى بەرىلىپتى دەپ ەستىدىم...

سوندىقتان وسى، قۇنى قالماعان اتاقتى بەرۋدى توقتاتىپ، ونىڭ ورنىنا بالەنباي اۋداننىڭ جانە بالەنباي وبلىستىڭ "قۇرمەتتى مەتسەناتى" نەمەسە "اتىمتاي جومارتى" دەگەن جاڭا اتاق ەنگىزسەك قالاي بولادى؟

مۇنداي اتاقتى تۋعان اۋىلدارىنا ميلليونداعان تەڭگەنىڭ الەۋمەتتىك-مادەني عيماراتتارىن سالىپ بەرگەن كاسىپكەر ازاماتتارعا جانە باسقا دا بايلارعا بەرسەك...

بالكىم، سوندا جەرگىلىكتى باسشىلارعا اركىمدى سالىپ، اتاق سۇراۋشىلىق مۇلدەم تىيىلار. ال جاڭا اتاقتىڭ ءجونى بولەك قوي. داڭعوي اعايىندارعا اتاق كەرەك بولسا، اتامەكەندەرىنە قول ۇشىن بەرسىن.

كارىباي مۇسىرمان

ءماجىلىس دەپۋتاتى

Abai.kz

22 پىكىر