بۇگىن نۇر-سۇلتاندا اباي قۇنانبايۇلىنىڭ 175 جىلدىق مەرەيتويىن وتكىزۋ تۋرالى مەملەكەتتىك كوميسسيانىڭ العاشقى وتىرىسى ءوتتى. وعان قازاقستان پرەمەر-ءمينيسترىنىڭ ورىنباسارى گۇلشارا ابدىحالىقوۆا توراعالىق ەتتى. 

اتالعان جيىندا اباي قۇنانبايۇلىنىڭ 175 جىلدىعىن اتاپ ءوتۋدىڭ باستى جوسپارى ءھام اتقارىلاتىن شارالاردىڭ جوباسى قارالدى. ول بويىنشا حالىقارالىق، رەسپۋبليكالىق جانە وڭىرلىك دەڭگەيلەردەگى 500-گە جۋىق شارا قامتىلعان.

ولاردىڭ ىشىندە، ەلوردادا حالىقارالىق عىلىمي-پراكتيكالىق كونفەرەنتسيا، "اباي" كوركەم ءفيلمىنىڭ شىعارىلىمى، اباي شىعارمالارىن شەت تىلدەرىنە اۋدارۋ سەكىلدى ماسەلەلەر قاراستىرىلعان.

سونىمەن قاتار، اباي ءۇيى-مۋزەيىنىڭ جان-جاقتى تىنىستىرىلىمى شاراسىن وتكىزۋ، ابايدىڭ "جيدەباي-ءبورىلى" مەملەكەتتىك تاريحي-مادەني جانە ادەبي-مەموريالدىق قورىق-مۋزەيىنىڭ عىلىمي-رەستاۆراتسيالىق جۇمىستارىن جۇرگىزۋ، قۇنانبايدىڭ تۇلعالىق ماڭىزدىلىعى مەن تاريحي-مادەني ءرولىن ارتتىرۋ شارالارىن قابىلداۋ قامتىلعان.

تاعى ءبىر ايتا كەتەرلىگى، قازىر الەۋمەتتىك جەلىلەردە تاراپ جۇرگەن اباي قۇنانبايۇلى ولەڭدەرى مەن قارا سوزدەرىن وقۋدان  #Abai175 ەستافەتاسى الەمدىك اۋقىمدا جالعاسىن تاباتىن بولدى.

مەملەكەتتىك كوميسسيانىڭ وتىرىسىندا گ. ابدىقالىقوۆا مەرەيتويدى ۇيىمداستىرۋعا قاتىستى مەملەكەتتىك ورگاندارعا بىرقاتار تاپسىرمالار بەردى.

ەستەرىڭىزگە سالا كەتەيىك، بيىل 30 مامىردا "اباي قۇنانبايۇلىنىڭ 175 جىلدىق مەرەيتويىن مەرەكەلەۋ تۋرالى" قر پرەزيدەنتى قاسىم-جومارت توقاەۆتىڭ جارلىعى شىققان بولاتىن.

دايىندىق جۇمىستارى مەن مەرەيتويدى وتكىزۋگە بايلانىستى ارنايى مەملەكەتتىك كوميسسيا قۇرىلدى. ونىڭ قۇرامىنا پارلامەنت دەپۋتاتتارى، كورنەكتى جازۋشىلار مەن قوعام قايراتكەرلەرى، ورتالىق مەملەكەتتىك ورگانداردىڭ باسشىلارى، شىعارماشىلىق قوعام وكىلدەرى ەندى.

Abai.kz