قىزىلوردا وبلىسىنا ارىس قالاسىنىڭ 254 ءۇيى مەن 15 نىسانىن جوندەۋدەن وتكىزۋ جۇكتەلگەن بولاتىن، ونىڭ ىشىندە 9 ءۇي قالپىنا كەلتىرىلدى. ايماق باسشىسى قۋانىشبەك ىسقاقوۆ جۇمىس ساپارىمەن تۇركىستان وبلىسى ارىس قالاسىنا ارنايى بارىپ، قۇرىلىس جۇمىستارىمەن تانىستى.

ەستەرىڭىزگە سالا كەتەيىك، قىزىلوردا وبلىسىنا 14 كوشە بولىنگەن ەدى، وندا 254 جەكە ءۇي، 5 الەۋمەتتىك جانە 10 كوممەرتسيالىق نىسان ورنالاسقان.

1 شىلدەدەن باستاپ ۇيلەردىڭ ەسىك-تەرەزەلەرىن جانە شاتىرلارىن اۋىستىرۋ باستالدى، قۇرىلىس-مونتاج جۇمىستارى بەلگىلەنگەن جوسپارعا سايكەس ءتيىستى دەڭگەيدە جۇرگىزىلۋدە. بۇگىنگى كۇنى 9 ءۇي تولىق قالپىنا كەلتىرىلىپ، 74 ۇيدە قۇرىلىس-مونتاج جۇمىستارى جۇرگىزىلىپ جاتىر.

وبلىس اكىمى قۋانىشبەك ىسقاقوۆ ارىس قالاسىندا سىر وڭىرىنە بولىنگەن نىسانداردى جوندەۋ جۇمىستارى تۋرالى جۋرناليستتەرگە سۇقبات بەردى.

"تۇركىستان وبلىسىنىڭ ارىس قالاسىنداعى توتەنشە جانە قايعىلى جاعداي ەشكىمدى بەيجاي قالدىرمادى. حالقىمىز "بىرلىك بار جەردە تىرلىك بار" دەمەكشى، قازاق حالقى قيىن ساتتە ارقاشان ءبىر-بىرىنە قولداۋ كورسەتكەن. قايعىلى حاباردى ەستىگەندە سىر ءوڭىرىنىڭ تۇرعىندارى زارداپ شەككەندەرگە كومەك كورسەتۋ ءۇشىن قولدان كەلگەنىن  اياعان جوق. العاشقى كۇننەن باستاپ قىزىلوردالىقتار ارنايى قورعا اقشا اۋدارىپ، گۋمانيتارلىق كومەك جيناۋعا كىرىستى. سونداي - اق، ۇيلەردى قالپىنا كەلتىرۋگە وبلىستان ەرىكتىلەردەن قۇرالعان ارنايى توپ كەلىپ جۇمىس ىستەدى ", - دەدى ايماق باسشىسى.

ايتا كەتەيىك، 28-30 ماۋسىم ارالىعىندا مەملەكەتتىك ورگاندار، قۇرىلىس، جوبالاۋ، تەحنيكالىق قىزمەت ماماندارىنان قۇرالعان 66 ادامنان تۇراتىن توپ بولىنگەن اۋماقتاعى عيماراتتار مەن قۇرىلىستاردىڭ زارداپ شىعىندارىن انىقتاۋ جۇمىسىن جۇرگىزدى. 5 الەۋمەتتىك باعىتتاعى جانە 10 كوممەرتسيالىق نىساننىڭ جوندەۋ جۇمىستارى ءىرى قۇرىلىس كومپانيالارىنا بەكىتىلگەن. سونىمەن قاتار، ءبىر تۇرعىن ءۇيدى بۇزۋ، تەگىستەۋ جۇمىستارى اتقارىلدى.

"بۇل جۇمىستارعا قىزىلوردا وبلىسىنىڭ 20 قۇرىلىس كومپانياسىنان 4 توپ بولىنگەن. قازىرگى تاڭدا 96 جۇمىسشى جوندەۋ جۇمىستارىمەن اينالىسۋدا. جوسپارعا سايكەس شىلدە ايىنىڭ سوڭىنا دەيىن جوندەۋ جۇمىستارى تولىعىمەن اياقتالادى. جالپى، 2019 جىلدىڭ 25 ماۋسىمى مەن 1 شىلدەسى ارالىعىندا ارىس قالاسىنىڭ تۇرعىندارىنا قىزىلوردا وبلىسىنان 38 توننادان استام گۋمانيتارلىق كومەك، ياعني كيىم-كەشەك، ازىق-تۇلىك جانە ت. ب. تۇرمىستىق زاتتار جىبەرىلدى ", - دەدى وبلىس اكىمى.

2800 استام مەملەكەتتىك قىزمەتشى، بيۋدجەتتەن قارجىلاندىرىلاتىن مەكەمەلەر، قوعامدىق جانە ۇكىمەتتىك ەمەس ۇيىمدار، كاسىپورىندار، اكتسيونەرلىك قوعامدار مەن سەرىكتەستىكتەر، شارۋا قوجالىقتارى، جەكە كاسىپكەرلەر مەن مەتسەناتتار قارجىلاي  كومەگىن كورسەتتى.

26 ماۋسىم كۇنى سىر جاستارى اتىنان 50 جاس ەرىكتى كومەك كورسەتۋگە كەلدى. ولار 2كۇن بويى ۇيلەردى قالپىنا كەلتىرۋگە جاردەمدەستى. 3 شىلدە كۇنى تاعى 50 ەرىكتى كەلىپ جەتتى.

2019 جىلدىڭ 9-18 تامىز ارالىعىندا ارىس قالاسىنان 150 بالا قىزىلوردا وبلىستىق ءبىلىم باسقارماسىنىڭ "وبلىستىق وليمپيادالار مەن قوسىمشا ءبىلىم بەرۋ ورتالىعىندا" تەگىن دەمالادى. بالالار ءۇشىن پسيحولوگيالىق ترەنينگتەر، تاۋعا ەكسكۋرسيالار، ءتۇرلى ۇيىرمەلەر ۇيىمداستىرىلادى.

قىزىلوردادا قابىلداۋ پۋنكتتەرى دە جۇمىسىن جالعاستىرۋدا. سونىمەن قاتار، شىلدە ايىندا بارلىق بيۋدجەتتىك مەكەمە قىزمەتكەرلەرى ارىستىقتارعا تاعى دا ءبىر كۇندىك جالاقىلارىن اۋدارادى.

سونداي-اق، جۇمىس ساپارى بارىسىندا قىزىلوردا وبلىسىنىڭ اكىمى تۇركىستانداعى شىعىس مونشاسىنىڭ قۇرىلىسىمەن تانىستى. ەستەرىڭىزگە سالا كەتەيىك، تۇركىستان قالاسىندا شىعىس مونشاسى قۇرىلىسى ەلباسى ن.ءا.نازارباەۆتىڭ تاپسىرماسى اياسىندا جۇرگىزىلۋدە. ەلباسى جەرگىلىكتى اتقارۋشى ورگاندار مەن ۇلتتىق كومپانيالاردىڭ باسشىلارىنا جاڭا ايماققا الەۋمەتتىك-مادەني نىسانداردى سالىپ بەرۋ تۋرالى تاپسىرما بەرگەن ەدى.

Abai.kz