اگەنتتىك دەرەگىنشە، ليۆانعا ورالعاندار – تەڭىزدە جۇمىس ىستەيتىن "تەڭىزشەۆرويل" كومپانياسىنىڭ مەردىگەرى Consolidated Contractors كومپانياسىنىڭ جۇمىسشىلارى مەن ولاردىڭ وتباسىلارى. باسىلىمنىڭ جازۋىنشا، ازاماتتار ەلىنە 2 شىلدەدە جەتكەن.
يوردانيا سىرتقى ىستەر جانە شەتەلدىكتەر ءىسى مينيسترلىك سايتىنداعى اقپاراتقا قاراعاندا، تەڭىزدە جۇمىس ىستەيتىن 107 ازاماتتىڭ قىرىعى ەلگە قايتقان. اۋەجايدان ولاردى يوردانيا سىرتقى ىستەر ءمينيسترى ايمان اس-سافادي كۇتىپ العانى ايتىلادى.
1 شىلدە كۇنى "تەڭىزشەۆرويل" كومپانياسىنىڭ وكىلى ىرزابەك ارتىعاليەۆ شەتەلدىك جۇمىسشىلاردىڭ قاۋىپسىز جەرگە كوشىرىلگەنى تۋرالى اقپاراتتى تەرىستەگەن. بۇعان دەيىن يوردانيا مەن ليۆان بيلىگىنىڭ وكىلدەرى الەۋمەتتىك جەلىلەردەگى رەسمي پاراقشالارىندا تەڭىز جۇمىسشىلار كەنتىنەن ءوز ازاماتتارى شىعارىلعانىن حابارلاعان.
29 ماۋسىمدا اتىراۋ وبلىسى جىلىوي اۋدانى تەڭىز كەنتىندە "تەڭىزشەۆرويلدىڭ" مەردىگەرى Consolidated Contracting Engineering and Procurement S.A.L Offshore (CCEP) كومپانياسىنىڭ جۇمىسشىلارى اراسىندا جانجال شىققان. الەۋمەتتىك جەلىدە تاراعان ۆيدەولاردا سسەر دەگەن جازۋى بار جيلەت كيگەن جۇمىسشىلار باسقا ءبىر جۇمىسشىلاردى تەپكىلەپ، قولىنا تۇسكەن زاتتارمەن ۇرىپ جاتقانى كورىنەدى. قاتتى تاياق جەگەن كەيبىر جۇمىسشىلار جەردە جاتقان. تاعى ءبىر ۆيدەودا ءبىر توپ جۇمىسشى اۆتوبۋسقا تاس لاقتىرعانى بايقالادى.
تشو دەرەگىنشە، وقيعا كەزىندە شامامەن 40 ادام "ازداپ جاراقاتتانعان". ليۆاننىڭ The Daily Star گازەتىنىڭ جازۋىنشا، 10 ليۆاندىق زارداپ شەككەن.
"تەڭىزشەۆرويل" كومپانياسى مەن قازاقستان بيلىگى جۇمىسشىلار اراسىنداعى توبەلەستى "تۇرمىستىق جانجال" دەپ سيپاتتادى. ال يوردانيا مەن ليۆان بيلىگى تەڭىزدە جۇمىس ىستەيتىن ازاماتتارىن كەنىشتەن ەۆاكۋاتسيالاعانىن مالىمدەدى.
تەڭىز كەنىشى قۇلسارىدان - 120 شاقىرىم، اتىراۋدان 340 شاقىرىم جەردە ورنالاسقان. "تەڭىزشەۆرويل" قازاقستاندا 1993 جىلدان بەرى ىستەيدى. "تەڭىزشەۆرويل" مۇناي وڭدەۋ كونتسەرنىنە Chevron (50 % اكتسيا), ExxonMobil Kazakhstan Ventures Inc (25%), قازاقستاندىق "قازمۇنايگاز" (20%) جانە LUKArco (5%) كومپانياسى كىرەدى. اشىق اقپاراتتارداعى دەرەك بويىنشا، سonsolidated Contracting Engineering and Procurement S.A.L Offshore ەلەكتر قۇرىلعىلارىن ورناتۋمەن اينالىسادى. باس ءوفيسى ابۋ-دابيدە ء(باا) ورنالاسقان.
Abai.kz
