ارىستا جارىلىس سالدارىنان بۇلىنگەن ۇيلەر جوندەۋگە قىزىلوردالىق 22 مەردىگەر مەكەمە اتسالىسپاق، - دەپ حابارلايدى اباي-اقپارات.

بۇگىنگى تاڭدا 17 سەكتوردىڭ بارلىعىندا جۇمىس قىزۋ ءجۇرىپ جاتىر. ارىستاعى 104 كوپ قاباتتى، 7200 جەكە تۇرعىن ءۇي قورىن جاڭعىرتۋعا ەلىمىزدىڭ بارلىق ءوڭىرى جاردەم جاساۋدا. ەڭ العاش بولىپ ىسكە كىرىسكەن وڭىرلەردىڭ قاتارىندا ىرگەلەس قىزىلوردا وبلىسى دا بار. 16 كوشەدە ورنالاسقان ۇيلەردى تۇگەل جوندەپ شىعۋعا كىرىسكەن سىربويىلىق 22 مەردىگەر مەكەمە ءتيىستى جۇمىستاردى باستاپ تا كەتكەن. ولار وزدەرىمەن بىرگە جۇك كوتەرگىش، تاسىمالداعىش تەحنيكامەن قوسا، قۇرىلىس ماتەريالدارىن جەتكىلىكتى الا كەلگەن. سونىمەن قاتار پلاستيك تەرەزە جاساۋ، اعاش جونۋ جانە تەمىر-مەتالل دانەكەرلەۋ قۇرىلعىلارىن دا اكەلىپ، ىسكە كىرىسىپ كەتتى. باسپانالاردىڭ شاتىرى، ەسىك-تەرەزەلەرى سىنعان. جاڭعىرتۋ شارالارىنا 10 بريگادا جۇمىلدىرىلىپ وتىر. مەردىگەر مەكەمە وكىلدەرى وزدەرىنە بەرىلگەن اۋماقتاعى قۇرىلىس جۇمىستارىن تامىزعا دەيىن اياقتاۋدى جوسپارلاپ وتىر.

– بۇل جۇمىسقا قاتىستىرىلعان قازىر بىزدە 3 كاماز، 3 گازەل، 1 تيەگىش بارلىعى قامتىلعان. قازىرگى كەزدە جۇمىس ىستەپ جاتقان ادام سانى 30. وسى 1-2 كۇندە 120 ادامعا دەيىن تارتامىز دەپ وتىرمىز، - دەيدى قىزىلوردا وبلىستىق ساۋلەت، قۇرىلىس باقىلاۋ باسقارماسىنىڭ باسشىسى مارسبەك مولداباەۆ.

Abai.kz