نۇر-سۇلتان قالاسىن ەندى ەلىمىزدەگى ەڭ جاس اكىمدەردىڭ ءبىرى التاي كولگىنوۆ باسقارادى. بۇل تۋرالى اقوردانىڭ رەسمي سايتىندا پرەزيدەنت قاسىم-جومارت توقاەۆتىڭ جارلى جاريالاندى.

التاي كولگىنوۆ 2016 جىلدىڭ 26 ناۋرىزىنان باتىس قازاقستان وبلىسىنىڭ اكىمى قىزمەتىن اتقارىپ كەلگەن.

التاي سەيدىرۇلى 1978 جىلى دۇنيەگە كەلگەن. ول ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىن، قر پرەزيدەنتى جانىنداعى مەملەكەتتىك باسقارۋ اكادەمياسىن، «بولاشاق» باعدارلاماسى بويىنشا ۇلىبريتانيانىڭ ابەردين ۋنيۆەرسيتەتىن بىتىرگەن. مەملەكەتتىك جانە جەرگىلىكتى باسقارۋ ماگيسترى، حالىقارالىق كوممەرتسيالىق قۇقىق ماگيسترى.

2000 جىلى قازاقستان رەسپۋبليكاسىنىڭ قارۋلى كۇشتەرىندە قىزمەت ەتكەن. 2001-2008 جىلدارى قر ادىلەت مينيسترلىگى، مەملەكەتتىك قىزمەت ىستەرى اگەنتتىگى جانە باس پروكۋراتۋرا ورگاندارىندا ءار ءتۇرلى لاۋازىمدا قىزمەت اتقارادى. 2008-2010 جىلدارى - «الاشمەدياگرۋپپ» جشس باس ديرەكتورىنىڭ ورىنباسارى. 2010-2012 جىلدارى قر پرەزيدەنتى اكىمشىلىگىنىڭ ايماقتىق-ۇيىمداستىرۋ جانە مەملەكەتتىك باقىلاۋ جۇمىستارى ءبولىمىنىڭ مەملەكەتتىك ينسپەكتورى قىزمەتىن اتقاردى. 2012-2013 جىلدارى باتىس قازاقستان وبلىسى اكىمىنىڭ ورىنباسارى. 2013-2016 جىلدارى ورال قالاسىنىڭ اكىمى قىزمەتىندە بولدى.

Abai.kz