بۇگىنگى تاڭدا ەلىمىزدە كاسىپكەر ايەلدەردىڭ ۇلەسى 50%-دان اساتىنىن، سونىمەن قاتار شاعىن جانە ورتا بيزنەس كاسىپورىندارىنىڭ 60% - دان استامىن ايەلدەر باسقارادى ەكەن،- دەپ حابارلايدى اباي-اقپارات.

قىزىلوردا وبلىسىندا شاعىن جانە ورتا بيزنەس سالاسىندا 93 مىڭنان استام ادام جۇمىس ىستەيدى. ايتا كەتەيىك، بۇل ەكونوميكالىق بەلسەندى جۇمىسپەن قامتىلعان حالىقتىڭ ۇشتەن ءبىر بولىگى بولىپ سانالادى.

سىردىڭ باس شاھارىندا وتكەن ىسكەر ايەلدەر فورۋمىنا وڭىرلىك قارجى ۇيىمدارىنىڭ جانە مەملەكەتتىك ورگانداردىڭ باسشىلارى مەن كاسىپكەرلەر قاتىستى. سونداي-اق، شارا شەڭبەرىندە ىسكەر ايەلدەر ءوز ونىمدەرىن كورمەگە قويدى.

– رەسپۋبليكا بويىنشا كاسىپكەر ايەلدەردىڭ ۇلەسى 50%-دان اساتىنىن، سونىمەن قاتار شاعىن جانە ورتا بيزنەس كاسىپورىندارىنىڭ 60% - دان استامىن ايەلدەر باسقارادى. بۇعان مەملەكەتتىڭ كاسىپكەرلىكتى دامىتۋداعى جان-جاقتى قولداۋلارى، ياعني مەملەكەتتىك، ۇكىمەتتىك جانە وڭىرلىك باعدارلامالاردىڭ، سونداي-اق قارجى ينستيتۋتتارى مەن «دامۋ» قورىنىڭ ءتۇرلى باعدارلامالارى ءوز سەپتىگىن تيگىزۋدە. ونىڭ ىشىندە، 5 ملرد تەڭگە مەملەكەتتىك باعدارلامالار اياسىندا قارجىلاي ەمەس قولداۋعا، قايتارىمسىز گرانتتار بەرۋگە جانە شاعىن نەسيەلەرمەن قامتاماسىز ەتۋگە باعىتتالۋدا. ايتا كەتۋ قاجەت، ءبىز جىل باسىنان بەرى «ەڭبەك» مەملەكەتتىك باعدارلاماسىنىڭ قاراجاتىن كۇتپەي-اق، «قىزىلوردا» وڭىرلىك ينۆەستيتسيالىق ورتالىعى ارقىلى ميكروكرەديتتەر بەرۋ ءۇشىن وبلىستىق بيۋدجەتتەن 500 ملن تەڭگە بولدىك. قازىردىڭ وزىندە، ورتالىقپەن جالپى قۇنى 522 ملن تەڭگەنى قۇرايتىن 106 جوبا قارجىلاندىرۋ ءۇشىن ماقۇلداندى. ونىڭ ىشىندە، ايەلدەردىڭ ۇلەسىنە جالپى قۇنى 112 ملن تەڭگەنى قۇرايتىن 26 جوبا تيەسىلى،- دەدى وبلىس اكىمى قىرىمبەك كوشەرباەۆ. ايماق باسشىسى.

سونىمەن قاتار، ايماق باسشىسى بيىل اۋىل جاستارىنا جانە كوپبالالى انالاردىڭ بيزنەس-جوبالارىن قولداۋعا باسىمدىق بەرىلگەنىن اتاپ ءوتتى.

فورۋم بارىسىندا "مانساپ" جشس ديرەكتورى ناتاليا ميشۋكوۆا، "بالانس پليۋس" جشس ديرەكتورى اقمارال بايماحانوۆا، ايگۇل بورامباەۆا، دينارا المۋساەۆا، جۇلدىز نۇرجانوۆا ءسوز سويلەپ، ۇسىنىس-پىكىرلەرىن ورتاعا سالىپ، ءوز تاجىريبەلەرىمەن ءبولىستى. سونداي-اق، وڭىردەگى بەلسەندى كاسىپكەر ايەلدەر وبلىس اكىمىنىڭ العىس حاتتارىمەن ماراپاتتالدى.

ەستەرىڭىزگە سالا كەتەيىك، اتالمىش فورۋم ايماقتا ەكىنشى رەت وتكىزىلىپ وتىر.

Abai.kz