بۇگىن Abai.kz پورتالىنىڭ ۇلتتىق ءباسپاسوز ايدىنىنا قۇلاش سەرمەگەنىنە تۋرا 10 جىل تولدى. عالامتور الەمىندەگى ءاربىر قازاق بۇگىندەرى قازاق سايتتارىنىڭ كوپتىگىمەن ماقتانۋى دا مۇمكىن. دەسە دە، ءوزىنىڭ ورەلى وقىرمانىن سوزىنە ۇيىتا ءبىلۋ، قوعامدىق پىكىر قالىپتاستىرىپ، ۇلتتىق ماقسات-مۇرات جولىندا ءوتىمدى ويىن جەتكىزە الۋ جاعىنان بىردە-ءبىر ينتەرنەت-باسىلىم «ابايدىڭ» الدىن وراپ كەتە العان جوق.

Abai.kz اقپاراتتىق پورتالى 2009 جىلى 15 ساۋىردە جارىق كورىسىمەن قازاق ينتەرنەتى كەڭىستىگىنە تىڭ سەرپىن اكەلگەن ەرەكشە باسىلىم بولدى. بۇل سايت 10 جىل بويى ەلىمىزدەگى مىقتى ساياساتكەرلەردىڭ، زيالىلاردىڭ، مادەنيەت پەن ونەر قايراتكەرلەرىنىڭ، ۇكىمەتتەگى جاۋاپتى تۇلعالار مەن پارلامەنت دەپۋتاتتارىنىڭ جانە ءار ايماق-وبلىستىڭ زيالى ازاماتتارىنىڭ ويىن بىلدىرەتىن باستى مىنبەرى بولىپ وتىر.

قولىنا قالام ۇستاعان قاراپايىم قازاقتان باستاپ، جايلى كرەسلودا وتىرعان مينيستر-دەپۋتاتتارعا دەيىن Abai.kz اقپاراتتىق پورتالىنا ماقالا جازىپ، ماسەلە كوتەرۋدى قۇپ كورەدى. پورتال 10 جىل بويى وسى قارقىننان تايعان جوق.  مۇنىڭ سىرى نەدە؟ بۇرىن قازاق سايتتارى بولمادى. قازىر جۇزدەگەن ينتەرنەت باسىلىمدار بولا تۇرا جارىققا اسىق كوبەلەكتەي وقىرماننىڭ "ابايدىڭ"  اينالاسىنا توپتاسۋىنىڭ استارىندا نە بار؟ مۇنداي سانسىز سۇراقتىڭ جاۋابى قىسقا...

شىندىعىن ايتۋ كەرەك، بۇل پورتال جان-جاقتان تسەنزۋرا شەڭگەلدەپ تۇرعاننىڭ وزىندە جول تاۋىپ، حالىقتىڭ ءسوزىن سويلەي الدى. سويلەپ كەلەدى.

وتكەن ون جىلدىقتى اقتارماي-اق (ۇزاققا كەتپەۋ ءۇشىن) سوڭعى ۋاقىتقا زەر سالىڭىزشى. جەر ماسەلەسىن تۇڭعىش بولىپ، "اباي" كوتەردى (ماقسات ءىلياسۇلىنىڭ ماقالاسى). سول-اق ەكەن، قازاقتىڭ قايسار ۇل-قىزدارى اتقا قونىپ، مۇقىم قازاق جەردى قورعاۋعا تاس-ءتۇيىن دايىن ەكەنىن كورسەتتى. بۇل ماسەلەنى بيلىك وڭىنان شەشپەسە، وماقاساتىنىن بايقادى. بۇل ءبىر.

ەكىنشىدەن، قىتايداعى قانداستاردىڭ قانشاما پروبلەماسى "ابايدا" جاريالانىپ، بيلىكتىڭ نازارىن وزىنە اۋداردى. ونىڭ ءبارىن ءتىزىپ ايتۋ مۇمكىن ەمەس. ماسەلەن، ەكى-ۇشەۋىن عانا ايتايىق. "250 وتباسىنىڭ تاعدىرىن ويرانداعالى وتىرعان جوقپىز با، ساعىنتاەۆ مىرزا؟!" دەگەن ءبىر ماقالانىڭ كۇشى 250 شاڭىراقتىڭ ماسەلەسىن ەكى-اق ايدا شەشۋگە سەپتەستى. سايراگۇل ساۋىتبايدىڭ جايىن دا العاش كوتەرگەن "اباي" بولاتىن. "ابايدىڭ" الاقانداي عانا ماقالاسىنان باستالعان ءىس بۇۇ بوسقىندار ءىسى جونىندەگى كوميسسارياتتىڭ مىنبەرىنە دەيىن جەتتى. مۇنىڭ سىرتىندا "اباي" ءۇيسىن بابان, جايناگۇل عاجاپقىزى سەكىلدى ونداعان ازاماتتىڭ تاعدىرىنا اراشا بولدى.

قۇدايعا شۇكىر، "ابايدىڭ" جازعانى ەلەنبەي قالعان كەز از. باسقانى بىلاي قويعاندا، قازىر قازاققا قاجەتتى زاڭ الدىمەن "ابايدىڭ" بەتىندە جازىلاتىن بولدى. مىسالى، اۋىت مۇقيبەك باۋىرىمىز كوشى-قون تۋرالى زاڭنىڭ وسال تۇستارىن اشكەرەلەپ، "اباي" ارقىلى قانشاما تۇزەتۋ ەنگىزدى. ونىڭ ءبارىن ءبىر ماقالانىڭ اياسىندا ءتىزىپ شىعۋ استە مۇمكىن ەمەس.

"اباي" ايمان ساعيدوللا باستاعان مۇعالىمدەر پروبلەماسىن شەشتى. "اباي" اسەل نازارباەۆا ءىسى سەكىلدى ءتىل ماسەلەسىن كوتەرگەن قىزدىڭ ارقا تۇتارى بولدى. بۇل از دەسەڭىز، "اباي" پورتالى سەگىز بالالى انانىڭ باسپانالى بولۋىنا دا سەپتىگىن تيگىزدى.

قوش! قىسقارتا ايتقاندا "اباي" جەرىن قورعادى، قىتايداعى قانداسقا اراشا ءتۇستى، قازاقتىڭ ءدىلى مەن ءدىنى ءۇشىن كۇرەستى، زاڭ-زاكۇن جازدى، ءتىپتى "باسپاناسىزعا باسپانا دا الىپ بەردى"...

سوڭعى جىلدارداعى وسى جەڭىستەردىڭ وزىنەن-اق "ابايدىڭ" ون جىلىنىڭ بوسقا وتپەگەنىن بايقايسىز.

بۇعان دەيىن Abai.kz اقپاراتتىق پورتالىنىڭ  307 975 تۇراقتى تۇتىنۋشىسى بار بولاتىن. قازىر سول سان 246 594 ادامعا كوبەيىپ، پورتالىمىزدى ۇزبەي وقيتىن وقىرمان سانى 581 مىڭنان اسىپ وتىر. كورسەتكىش پە، كورسەتكىش... قازىرگى ەسەپ بويىنشا Abai.kz اقپاراتتىق پورتالىنداعى كورىلىم سانى 1 ملن. 200 مىڭنان اسادى. بۇل پورتالىمىزدا جاريالانعان ماقالالاردىڭ قالاي كوپ وقىلاتىنىن بىلدىرسە كەرەك.

بار بولعانى 10 جىلدىق تاريحى بار باسىلىمنىڭ وسىنداي دارگەيگە جەتۋى - الدىمەن وقىرماننىڭ ارقاسى. سوندىقتان دا، "ابايدىڭ" 10 جىلدىق مەرەكەسىمەن سىزدەردى قۇتتىقتاعىمىز كەلەدى، قۇرمەتتى وقىرمان!

Abai.kz اقپاراتتىق پورتالى