ماجىلىستە ۆلاديسلاۆ كوسارەۆ دەيتىن دەپۋتات بار. سول كىسى كەشە پاتەردى ءبىر تاۋلىككە جالعا بەرەتىندەرگە زاڭ بويىنشا تىيىم سالۋدى ۇسىندى. دەپۋتات ونداي جالدامالى پاتەرلەردى (تاۋلىكتىك) قايداعى جوق قاڭعىباستار (ۆسياكوگو رودا پروحوديمتسى) عانا پايدالانادى دەپتى. Tengrinews.kz سايتى سولاي دەپ جازدى. 

"مەنىڭ ويىمشا، تاۋلىگىنە جالعا بەرىلەتىن پاتەرلەرگە زاڭ بويىنشا تىيىم سالۋ كەرەك. ويتكەنى، پاتەرلەر قايداعى جوق قاڭعىباستاردىڭ ادەپسىز ارەكەتى ءۇشىن ەمەس، تۇرعىن ءۇي رەتىندە پايدالانىلۋى كەرەك" دەيدى دەپۋتات كوسارەۆ.

دەپۋتات بۇل ۇسىنىستى ماجىلىستەگى تكش (تۇرعىن ءۇي كەشەنى شارۋاشىلىعى) تۋرالى زاڭ جوباسىن تالقىلاۋ بارىسىندا ايتتى. وسى تالقىلاۋدان كەيىن-اق،، بۇل زاڭ جوباسى ءبىرىنشى وقىلىمدا ماقۇلداندى.

دەپۋتات كوسارەۆ تۇرعىن ءۇي كەشەندەرىندە ورنالاسقان حوستەلدەردى دە تىلگە تيەك ەتكەن.

"بۇنداي قوناقجايلار تاۋلىگىنە جالعا بەرىلەدى. وسى زاڭ جوباسى ارقىلى ءبىر بۇل ماسەلەنى باقىلاۋدا ۇستاۋدىڭ جايىن قاراستىردىق. الايدا ماسەلەنى تولىق شەشكەن جوقپىز. ءبىز ايتىپ وتىرعان "حوستەل" ءسوزى باسقاشا دا اتالۋى مۇمكىن. ول حوستەلدەردىڭ قوجايىندارى قاراپ وتىرمايدى. وزگە اتاۋ ويلاپ تاۋىپ الادى" دەپتى جانە.

كوممۋنيست دەپۋتاتتىڭ بۇل دەگەندەرىنە يندۋستريا جانە ينفراقۇرىلىم ءمينيسترى رومان سكليار مىرزا جاۋاپ بەرىپ، بۇل زاڭعا تومپاق كەلەتىن ۇسىنىس ەكەنىن، ەگەر ازاماتتاردىڭ ءوز مەنشىگىن پايدالانۋعا شەكتەۋ قويىلاتىن بولسا، ول ازاماتتاردىڭ قۇقىعىن بۇزعان بولىپ تابىلاتىنىن ايتىپتى.

"قوعامدىق ءتارتىپتى بۇزعاندار اكىمشىلىك جاۋاپكەرشىلىككە تارتىلادى. ول زاڭدا قاراستىرىلعان. مىسالى، تۇنگى ۋاقىتتا، 23:00 مەن 06:00 ارالىعىندا قاتتى شۋلاسا، زاڭدى جانە جەكە تۇلعالاردى اكىمشىلىك جاۋاپكەرشىلىككە تارتۋعا بولادى" دەيدى مينيستر.

Abai.kz