قازاقستان رەسپۋبليكاسى ءبىلىم جانە عىلىم مينيسترلىگى، قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى جانە قۇرمانعازى اتىنداعى قازاق ۇلتتىق كونسەرۆاتورياسى بىرلەسىپ ۇيىمداستىرىپ وتىرعان XI رەسپۋبليكالىق ستۋدەنتتىك پاندىك وليمپياداسى ءوز جۇمىسىن باستادى. كونسەرۆاتوريانىڭ ۇلكەن كونتسەرتتىك زالىندا وليمپيادانىڭ سالتاناتتى تۇردە اشىلۋى ءوتتى.

جوبانىڭ ماقساتى - بولاشاق مامانداردىڭ كاسىبي مۇمكىندىكتەرىن دامىتۋ، ءبىلىم الۋشىنىڭ وقۋ-تانىمدىق بەلسەندىلىگىن ىنتالاندىرۋ، تالانتتى جانە دارىندى ءبىلىم الۋشىلاردى ىرىكتەۋ جانە قولداۋ بولىپ تابىلادى. «ونەر» جانە «ءبىلىم» باعىتىنداعى ءپان وليمپياداسى ۇلكەن جانە كىشى وليمپيادا تۇرىندە وتەدى. جوعارى وقۋ ورىندارىنىڭ ستۋدەنتتەرى ۇلكەن دودادا 12 ماماندىققا قاراستى 16 نوميناتسيا بويىنشا سايىسقا تۇسسە، مۋزىكالىق كوللەدجدەر مەن مامانداندىرىلعان مەكتەپتەردىڭ تالىمگەرلەرى كىشى وليمپيادادا 9 ماماندىق ىشىندەگى 13 نوميناتسيا بويىنشا بىلىمدەرىن ساراپقا سالماق. رەسپۋبليكامىزدىڭ اقتاۋ، اتىراۋ، اقتوبە، كوكشەتاۋ، قىزىلوردا، نۇر-سۇلتان، شىمكەنت، سەمەي، وسكەمەن جانە باسقا دا قالالارىنان كەلگەن ءوتىنىش حاتتاردىڭ جالپى سانى 350-دەن اسىپ وتىر.

سالتاناتتى جيىندى كونسەرۆاتوريا رەكتورى ارمان جۇدەباەۆ  اشتى. ول «بۇلاق كورسەڭ كوزىن اش» دەگەن ءسوز بار حالقىمىزدا. تاۋەلسىز ەلىمىزدىڭ بولاشاعى – جاستاردى قولداۋ ماقساتىندا ۇيىمداستىرىلىپ وتىرعان شارا بولاشاق مامانداردىڭ كاسىبي مۇمكىندىكتەرىن دامىتۋ، ءبىلىم الۋشىنىڭ وقۋ-تانىمدىق بەلسەندىلىگىن ىنتالاندىرۋ، دارىندى ءبىلىم الۋشىلاردى ىرىكتەۋ جانە ولارعا شىعارماشىلىق سەرپىن بەرۋدى كوزدەيدى. وسىنداي ءمانى جوعارى شارانى ۇيىمداستىرۋعا زور قولداۋ كورسەتىپ وتىرعان، كونسەرۆاتوريامەن تىعىز ىنتىماقتاستىقتا بىرنەشە بىرلەسكەن ءىس-شارالاردى اتقارىپ جۇرگەن قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورىنا العىس بىلدىرەمىن!» – دەپ اتاپ ءوتتى.

شارانى ۇيىمداستىرۋشىلاردىڭ ءبىرى قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ الماتىداعى وكىلدىگىنىڭ ديرەكتورى سەرگەي توحتاروۆ تا ءسوز الىپ، قاتىسۋشىلارعا ساتتىلىك تىلەدى. اشىلۋ سالتاناتى قۇرمانعازى اتىنداعى قازاق ۇلتتىق كونسەرۆاتورياسىنىڭ دارىندى ستۋدەنتتەرىنىڭ كونتسەرتتىك باعدارلاسىمەن جالعاستى. ولاردىڭ ىشىندە كونسەرۆاتوريانىڭ ارالاس حورى، ۇرمەلى اسپاپتار وركەسترى، 1 كۋرس ستۋدەنتتەرىنەن قۇرالعان «Grand Classic» تريوسى، حالىقارالىق بايقاۋلاردىڭ لاۋرەاتى ايدوس بايبوسىنوۆ جانە ت.ب ونەرپازدار بار.

جىل سايىن ءداستۇرلى تۇردە وتەتىن ستۋدەنتتىك پاندىك وليمپيادا بيىل قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ باستاماسىمەن جاريالانعان «جاستار جىلى» اياسىندا وتۋدە.

ايتا كەتەيىك، XI رەسپۋبليكالىق ستۋدەنتتىك پاندىك وليمپيادا ءساۋىر ايىنىڭ 18 دەيىن جالعاسادى.

Abai.kz